Skanda Purana · Chapter 7.21

// pulastya uvāca// //
tato gacchennṛpaśreṣṭha piṇḍodakamanuttamam //
tīrthaṃ yatra tapastaptaṃ piṇḍodakadvijātinā

purā piṇḍodakonāma brāhmaṇo'bhūnmahāmate //
mandaprajño'lpamedhāvī sopādhyāyena pāṭhitaḥ

aśakto'dhyayanaṃ kartuṃ jāḍyabhāvānmahīpate //
sa vairāgyaṃ paraṃ gatvā saṃprāpto girigahvare

etasminneva kāletu tatraiva ca sarasvatī//
vīṇāvinodasaṃyuktā vivikte tamupasthitā

taṃ dṛṣṭvā brāhmaṇaṃ khinnaṃ vairāgyeṇa samanvitam //
kṛpāviṣṭā mahādevī vākyametaduvāca ha

// sarasvatyuvāca // //
kasmāttvaṃ khidyase vipra virakta iva bhāsase //
kasmānna hṛṣyasi hṛdā kasmādatra tvamāgataḥ //
vada śīghraṃ mahābhāga tavāṃtike vasāmyaham

// piṇḍodaka uvāca // //
ahaṃ vairāgyamāpanna upādhyāyatiraskṛtaḥ //
jñānahīno mahābhāge mṛtyuṃ vāṃchāmi sāṃpratam

na me sarasvatī devī jihvāgre parivartate //
kāraṇaṃ nānyadastīha mṛtyormama varānane // //
dṛṣṭo'kasmāttvayā cāhaṃ tato yāsyāmi cānyataḥ //
maraṇaṃ hi mama śreyo mūkabhāvānna jīvitam

// sarasvatyuvāca //. //
ahaṃ sarasvatī devī sadāsminvaraparvate//
niśāsukhe trayodaśyāṃ karomi vasatiṃ dvija //
tasmāttvaṃ prārthaya varaṃ yadabhīṣṭaṃ sudurlabham

// piṇḍodaka uvāca // //
prasādāttava vai vāṇi sarvajñatvaṃ mamepsitam //
etattīrthaṃ tu mannāmnā khyātiṃ yātu śucismite

// sarasvatyuvāca // //
adyaprabhṛti sarvajño hyatra loke bhaviṣyasi //
nāmnā tava tathā tīrthametatkhyātiṃ prayāsyati

niśāmukhe trayodaśyāṃ yo'tra snānaṃ kariṣyati //
bhaviṣyati sa sarvajño yadyapi syātsumandadhīḥ

atra me satataṃ vāso bhaviṣyati dvijottama //
yasmāttasmātsadā snānaṃ kartavyaṃ susamāhitaiḥ

evamuktvā tato devī tatraivāṃtaradhīyata //
piṇḍodako hi sarvajño bhūtvātha svagṛhaṃ yayau //
vyasmāpayajjanānsarvāṃstattīrthasya samāśrayāt

iti śrīskāṃde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe piṇḍodakatīrthamāhātmyavarṇanaṃnāmaikaviṃśo'dhyāyaḥ