સ્કંદ પુરાણ · અધ્યાય 7.21

॥ પુલસ્ત્ય ઉવાચ॥ ॥
તતો ગચ્છેન્નૃપશ્રેષ્ઠ પિણ્ડોદકમનુત્તમમ્ ॥
તીર્થં યત્ર તપસ્તપ્તં પિણ્ડોદકદ્વિજાતિના

પુરા પિણ્ડોદકોનામ બ્રાહ્મણોઽભૂન્મહામતે ॥
મન્દપ્રજ્ઞોઽલ્પમેધાવી સોપાધ્યાયેન પાઠિતઃ

અશક્તોઽધ્યયનં કર્તું જાડ્યભાવાન્મહીપતે ॥
સ વૈરાગ્યં પરં ગત્વા સંપ્રાપ્તો ગિરિગહ્વરે

એતસ્મિન્નેવ કાલેતુ તત્રૈવ ચ સરસ્વતી॥
વીણાવિનોદસંયુક્તા વિવિક્તે તમુપસ્થિતા

તં દૃષ્ટ્વા બ્રાહ્મણં ખિન્નં વૈરાગ્યેણ સમન્વિતમ્ ॥
કૃપાવિષ્ટા મહાદેવી વાક્યમેતદુવાચ હ

॥ સરસ્વત્યુવાચ ॥ ॥
કસ્માત્ત્વં ખિદ્યસે વિપ્ર વિરક્ત ઇવ ભાસસે ॥
કસ્માન્ન હૃષ્યસિ હૃદા કસ્માદત્ર ત્વમાગતઃ ॥
વદ શીઘ્રં મહાભાગ તવાંતિકે વસામ્યહમ્

॥ પિણ્ડોદક ઉવાચ ॥ ॥
અહં વૈરાગ્યમાપન્ન ઉપાધ્યાયતિરસ્કૃતઃ ॥
જ્ઞાનહીનો મહાભાગે મૃત્યું વાંછામિ સાંપ્રતમ્

ન મે સરસ્વતી દેવી જિહ્વાગ્રે પરિવર્તતે ॥
કારણં નાન્યદસ્તીહ મૃત્યોર્મમ વરાનને ॥ ॥
દૃષ્ટોઽકસ્માત્ત્વયા ચાહં તતો યાસ્યામિ ચાન્યતઃ ॥
મરણં હિ મમ શ્રેયો મૂકભાવાન્ન જીવિતમ્

॥ સરસ્વત્યુવાચ ॥. ॥
અહં સરસ્વતી દેવી સદાસ્મિન્વરપર્વતે॥
નિશાસુખે ત્રયોદશ્યાં કરોમિ વસતિં દ્વિજ ॥
તસ્માત્ત્વં પ્રાર્થય વરં યદભીષ્ટં સુદુર્લભમ્

॥ પિણ્ડોદક ઉવાચ ॥ ॥
પ્રસાદાત્તવ વૈ વાણિ સર્વજ્ઞત્વં મમેપ્સિતમ્ ॥
એતત્તીર્થં તુ મન્નામ્ના ખ્યાતિં યાતુ શુચિસ્મિતે

॥ સરસ્વત્યુવાચ ॥ ॥
અદ્યપ્રભૃતિ સર્વજ્ઞો હ્યત્ર લોકે ભવિષ્યસિ ॥
નામ્ના તવ તથા તીર્થમેતત્ખ્યાતિં પ્રયાસ્યતિ

નિશામુખે ત્રયોદશ્યાં યોઽત્ર સ્નાનં કરિષ્યતિ ॥
ભવિષ્યતિ સ સર્વજ્ઞો યદ્યપિ સ્યાત્સુમન્દધીઃ

અત્ર મે સતતં વાસો ભવિષ્યતિ દ્વિજોત્તમ ॥
યસ્માત્તસ્માત્સદા સ્નાનં કર્તવ્યં સુસમાહિતૈઃ

એવમુક્ત્વા તતો દેવી તત્રૈવાંતરધીયત ॥
પિણ્ડોદકો હિ સર્વજ્ઞો ભૂત્વાથ સ્વગૃહં યયૌ ॥
વ્યસ્માપયજ્જનાન્સર્વાંસ્તત્તીર્થસ્ય સમાશ્રયાત્

ઇતિ શ્રીસ્કાંદે મહાપુરાણ એકાશીતિ સાહસ્ર્યાં સંહિતાયાં સપ્તમે પ્રભાસખણ્ડે તૃતીયેઽર્બુદખણ્ડે પિણ્ડોદકતીર્થમાહાત્મ્યવર્ણનંનામૈકવિંશોઽધ્યાયઃ