Skanda Purana · Chapter 7.204

// devyuvāca // //
bhagavandevadeveśa saṃsārārṇavatāraka //
sarasvatyāśca māhātmyaṃ vistarātkathayasva me

yātrāgatānāṃ deveśi puruṣāṇāṃ jitātmanām//
mukhadvāre tu kiṃ puṇyaṃ snānadāne ca śaṃkara

avagāhanena cānyatra phalaṃ kiṃsvitprajāyate //
śrāddhasya kiṃ vidhānaṃ tu ke maṃtrāstatra ke dvijāḥ

kiṃ grāhyaṃ kiñca bhoktavyaṃ brāhmaṇaiḥ śrāddhakarmaṇi //
kāni dānāni deyāni nṛbhiryātrā phalepsubhiḥ

// īśvara uvāca // //
śṛṇu devipravakṣyāmi dānaśrāddhavidhikramam //
sarasvatyāśca māhātmyaṃ kīrtyamānaṃ nibodha me

puṇyaṃ sārasvataṃ toyaṃ yatra tatrāvagāhyate //
sāgareṇa tu saṃmiśraṃ devānāmapi durlabham

sarasvatī sarvanadīṣu puṇyā sarasvatī lokasukhāvagāhā //
sarasvatīṃ prāpya na duḥkhitā narāḥ sadā na śocaṃti paratra ceha vā

puṇyaṃ sārasvataṃ tīrthaṃ puṇyakṛllabhate naraḥ //
durlabhaṃ triṣu lokeṣu vaiśākhyā somaparvaṇi/

amā somena saṃyuktā yadi tatraiva labhyate //
tatra kiṃ kriyate devi parvakoṭiśatairapi

cāndrāyaṇāni kṛcchrāṇi mahāsāṃ tapanāni ca //
prāyaścittāni dīyante yatra nāsti sarasvatī

yāvadasthi śarīrasya tiṣṭhetsārasvate jale //
tāvadvarṣasahasrāṇi viṣṇuloke vase nnaraḥ //
jātyandhaiste samā jñeyā mṛtaiḥ paṃgubhireva ca

samarthā ye na paśyanti prabhāsasthāṃ sarasvatīm //
te deśāstāni tīrthāni āśramāste ca parvatāḥ

yeṣāṃ sarasvatī devī madhye yāti saridvarā //
trailokyapāvanīṃ puṇyāṃ saṃśritā ye sarasvatīm //
saṃsārakardamāmodamājighranti na te punaḥ

śabdavidyeva vistīrṇā mataiva jagataḥ priyā //
satāṃ matiriva svacchā ramaṇīyā sarasvatī

trailokyaśobhitāṃ devīṃ divya toyāṃ sunirmalām//
sa nīco yaḥ pumānetāṃ na vandeta sarasvatīm

svarganiśreṇisaṃbhūtā prabhāse tu sarasvatī //
nāpuṇyavadbhiḥ saṃprāptuṃ puṃbhiḥ śakyā mahānadī

candrabhāgā ca gaṃgā ca tathā yatra sarasvatī //
devāste na manuṣyāste tisro nadyaḥ pibanti ye

satyameva mayā devi jāhnavī śirasā dhṛtā //
yāḥ kāścitsarito loke tāsāṃ puṇyā sarasvatī

darśanena sarasvatyā rājasūyo na rājate //
gaṃḍūṣaścāśvamedhādvai sarva kratuvaraṃ payaḥ

bhasmāsthicarmatoyāni nakhakeśādikāni ca //
vātairapi dhutānyeva tathā sārasvate jale

/
vahanti yeṣāṃ kālena te na kāla vaśā narāḥ //
devi kiṃ bahunoktena varṇitena punaḥpunaḥ//
sarasvatyāḥ paraṃ tīrthaṃ na bhūtaṃ na bhaviṣyati

tatraiva durlabhaṃ snānaṃ yatra sāgarasaṃgamaḥ //
tatra snānena dānena koṭiyajñaphalaṃ labhet

yatra sārasvataṃ toyaṃ sāgarormisamākulam //
tatra snāsyaṃti ye martyā bhāgyavanto yugeyuge

te dhanyāste namaskāryāsteṣāṃ sphītataraṃ yaśaḥ //
yeṣāṃ kalevaraṃ nṝṇāṃ siktaṃ sārasvatairjalaiḥ

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye sarasvatīsaṃgamamāhātmyavarṇanaṃnāma caturuttaradviśatatamo'dhyāyaḥ