Skanda Purana · Chapter 7.203

//īśvara uvāca // //
tato gacchenmahādevi maṃkīśvara mahālayam //
rāmeśāduttare bhāge devamātuḥ samīpagam

arkasthalāttato yāmye pūrvataśca kṛtasmarāt //
liṃgaṃ mahāprabhāvaṃ tu maṃkinā sthāpitaṃ purā

taṃ dṛṣṭvā mānavaḥ samyagaśvamedhaphalaṃ labhet

// devyuvāca // //
ko'sau maṃkirmahādeva kathaṃ liṃgaṃ pratiṣṭhitam //
kiṃ prabhāvaṃ ca talliṃgametanme vada vistarāt

// īśvara uvāca // //
maṃkirnāmābhavatpūrvaṃ kubjakāyo dvijottamaḥ //
prabhāsaṃ kṣetramāsādyatapastepe mahattamam

pratiṣṭhāpya mahādevaṃ śivabhaktiparāyaṇaḥ //
na tutoṣa harastasya vahuvarṣagaṇārcitaḥ

tasyaivaṃ tapyamānasya siddhiṃ prāptā hyanekaśaḥ //
tatrārādhya mahādevaṃ svargalokamito gatāḥ

tato duḥkhaṃ samabhavanmaṃkestatra varānane //
kasmānme bhagavāṃstuṣṭiṃ na gacchati maheśvaraḥ

tatastīvraratiṃ cakre kṛtvā tīvranivartanam //
evaṃ vṛddhatvamāpanno japadhyānaparāyaṇaḥ

tasya tuṣṭo mahādevo vayaso'nte varaṃ dadau //
parituṣṭo'smi te maṃke brūhi kiṃ karavāṇi te

// maṃkiruvāca // //
kiṃ vareṇa suraśreṣṭha mama vṛddhasya sāṃpratam //
kiñcinme paramaṃ duḥkhaṃ sthitasyātra paraṃ prabho

// śiva uvāca // //
śṛṇu yatkāraṇaṃ tatra teṣāṃ tava tapasvinām //
vratacaryāptaye viprāḥ pūjayantyadhikaṃ hi te

te puṣpāṇi samānīya nānāvarṇāni sarvaśaḥ //
vṛkṣāṇāmatigaṃdhīni na teṣāṃ harṣakāraṇam

tvaṃ punaḥ kubjarūpaśca yajñapūjāparāyaṇaḥ //
na ca prāpnoṣi vṛkṣāṇāṃ śākhāgrāṇyatiyatnavān

ekenāpi pradattena puṣpeṇa dvijasattama //
bhaktyā śirasi liṃgasya labhyate yājñikaṃ phalam

liṃgasya dakṣiṇe brahmā svayameva vyavasthitaḥ //
vāme ca bhagavānviṣṇurmadhyehaṃ vai pratiṣṭhitaḥ

trayo'pi pūjitāstena yena liṃgaṃ prapūjitam

bilvapatraṃ śamīpatraṃ karavīraṃ ca mālatīm //
unmattakaṃ campakaṃ ca sadyaḥ prītikaraṃ bhavet

caṃpakāśoka kahlāraiḥ karavīraistathā mama //
pūjeṣṭā dvijaśārdūla ye cānye vahugaṃdhinaḥ //
etairhi pūjito nityaṃ śīghraṃ tuṣṭiṃ prayāmyaham

//
// brāhmaṇa uvāca // //
yadi tuṣṭo'si me deva yadi deyo varo mama //
ihāgatya naraḥ snātvā yo jalenāpi siñcati

liṃgametaddhi sarvāsāṃ pūjānāṃ phalamāpnuyāt //
adyaprabhṛti ye vṛkṣā daivikāḥ pārthivāśca ye //
teṣāṃ sānnidhyamatrāstu prasādāttava śaṃkara

// bhagavānuvāca // //
salilenāpi yaḥ pūjāmasmim̐lliṃge vidhāsyati //
tasya pūjāphalaṃ sarvaṃ bhaviṣyati dvijottama //

vṛkṣāṇāmatrasānnidhyaṃ sarveṣāṃ ca bhaviṣyati //
adyaprabhṛti nāmnaitannāgasthānaṃ bhaviṣyati

yatastu sarvanāgānāṃ sāṃnidhya matra saṃsthitam /
tvamapi dvijaśārdūla prayāsyasi mamāntikam

evamuktvā tu bhagavāṃstatraivāntaradhīyata //
maṃkistu dehamutsajya śivalokaṃ tato gataḥ

ityevaṃ kathitaṃ devi maṃkīśodbhavamuttamam //
śrutaṃ harati pāpāni samyakchraddhāsamanvitaiḥ

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye maṃkīśvaramāhātmyavarṇanaṃnāma tryuttaradviśatatamo'dhyāyaḥ //