Skanda Purana · Chapter 7.200

// īśvara uvāca // //
evaṃ vidhvaṃsite yajñe gatāste brāhmaṇā gṛham //
aprāptakāmanā devi ye cānye tatra vai gatāḥ

haro'pi vigatāmarṣaḥ kailāsaṃ parvataṃ gataḥ

etasminneva kāle tu tārakonāma dānavaḥ //
utpannaḥ sa mahābāhurdevānāṃ baladarpahā

tena indrādikānsarvānsurāñjitvā mahāhave //
svargaḥ svairvyāpito devi brahmalokaṃ tato gatāḥ //
ūcuḥ surā duḥkhayuktā brahmāṇaṃ parvatātmaje

tārakeṇa suraśreṣṭha svargānnirvāsitā vayam //
svayamindraḥ samabhavadvasavo'nye tathā kṛtāḥ

rudrāḥ sādhyāstathā viśve aśvinau marutastathā //
ādityāśca vadhopāyaṃ tasmādvada pitāmaha

// brahmovāca // //
avadhyaḥ sa tu sarveṣāṃ devānāmiti me matiḥ //
ṛte tu śāṃkaraṃ tejo nānyena vinipātyate //
tasmādgacchata bhadraṃ vo devadevaṃ maheśvaram

tasya bhāryā mṛtā pūrvaṃ jātā himavato gṛhe //
tasyāṃ ca jāyate putraḥ sa haniṣyati tārakam //
tasmātprasādayadhvaṃ vai tadarthaṃ śūlapāṇinam

tato devaiḥ samādiṣṭaḥ kāmadevo varānane //
mṛtabhāryaṃ haraṃ gatvā tataḥ pīḍaya sāyakaiḥ

yenāsau kāmasaṃtapto bhāryārthaṃ yatnavānbhavet //६
ayaṃ gacchatu te bhrātā vasaṃtaśca manoharaḥ

sa tatheti pratijñāya kailāsaṃ parvataṃ gataḥ //
tato dṛṣṭvā mahādevaḥ kāmadevaṃ dhṛtāyudham

vasantasahitaṃ devi rudro'ndhakaniṣūdanaḥ //
gaṃgādvāramanuprāpya apaśyadyāvadagrataḥ

dattāyudhaṃ kāmadevaṃ dudruve sa bhayātpunaḥ //
tato vārāṇasīṃ gatvā naimiṣaṃ puṣkaraṃ tathā

śrīkaṃṭhaṃ rudrakoṭiṃ ca kurukṣetraṃ gayāṃ tathā //
jvālāmārgaṃ prayāgaṃ ca viśālāmarbudaṃ śubham

bahūnvarṣagaṇānevaṃ bhramansa dharaṇītale //
kāmadevabhayāddevi devadevo maheśvaraḥ

avaikṣata tadā kāmaṃ visphārya nayanaṃ tadā //
tṛtīyaṃ devadeveśi devadevastrilocanaḥ

tasya taṃ vīkṣamāṇasya saṃjātāḥ pāvakārciṣaḥ //
tābhiḥ sa dhanuṣā yukto bhasmasātsamapadyata

taṃ dagdhvā bhagavāñchaṃbhurgatvā roṣasya nirṇayam //
nivāsamakarottatra kṣetre prābhāsike śubhe

tasmindagdhe tadā kāme ratiḥ śokaparāyaṇā //
vilalāpa suduḥkhārtā patibhaktiparāyaṇā

hā nāthanātha bhoḥ svāminkiṃ jahāsi pativratām //
pativratāṃ patiprāṇāṃ kasmānmāṃ tyajasi prabho

evaṃ vilapatīṃ tāṃ tu vāguvācāśarīriṇī //
mā tvaṃ ruda viśālākṣi punareva patistava

prasādāddevadevasya ucchvāsyati śivasya tu //
etāṃ vācaṃ ratiḥ śrutvā tataḥ svasthā babhūva ha

tato devāḥ śivaṃ natvā prārthayāmāsurīśvari //
kalatrasaṃgrahaṃ deva kuru kāryārthasaṃgrahe

eṣa kāmastvayā dagdhaḥ krodhena mahatā svayam //
vinā tena vibho naṣṭā sṛṣṭirvai dharaṇītale

// bhagavānuvāca // //
eṣa kāmo mayā dagdhaḥ krodhena surasattamāḥ //
tasmādanaṃga evaiṣa prajāsu pracariṣyati //
tadvīryastatprabhāvaśca vinā dehaṃ bhaviṣyati

// devā ūcuḥ // //
bhagavankuru pūrvaṃ tvaṃ saṃsmarasva ratīśvaram //
hitāya sarva lokānāṃ yathā naḥ pratyayo bhavet

tataḥ sa smṛtavānkāmaṃ svayaṃ devo maheśvaraḥ //
tatastacchāśvataṃ liṃgaṃ samuttasthau mahītale

kṛtasmaraḥ punastatra anaṃgo balavāṃstathā //
tenoḍhā śailajā tena śaṃkareṇa mahātmanā

jātaḥ skandaḥ suraśreṣṭhastārako yena sūditaḥ //
patitenaiva liṃgena yasmāccaiva kṛtasmaraḥ

tasmātkṛtasmaro loke kīrtyate sa mahītale //
taṃ dṛṣṭvā na jaḍo nāṃdho nāsukhī na ca durbhagaḥ //
jāyate tu kadā martyo na daridro na rogavān

evaṃ te sarvamākhyātaṃ yanmāṃ tvaṃ paripṛcchasi //
dagdho yathā smaraḥ pūrvaṃ punarvīryānvitaḥ sthitaḥ

// īśvara uvāca // //
tatraiva saṃsthitaṃ kuṇḍaṃ dakṣiṇena kṛtasmarāt //
kāmakuṃḍeti vai nāma yatrodbhūtaḥ punaḥ smaraḥ

anaṃgarūpī devyatra snānādvai rūpavānbhavet //
ikṣavastatra vai deyāḥ suvarṇaṃ gāstathaiva ca //
vastrāṇi caiva vidhivadbrāhmaṇe vedapārage

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye kāmakuṇḍamāhātmyavarṇanaṃnāma dviśatatamo'dhyāyaḥ