Skanda Purana · Chapter 7.20

// pulastya uvāca // //
tato gaccheta caṃdreśaṃ prabhāsaṃ nṛpasattama //
prabhā tatra purā prāptā caṃdreṇa sumahātmanā

dakṣasya kanyakā rājansaptaviṃśatisaṃkhyayā //
ūḍhāścaṃdreṇa tāḥ sarvā aśvinīpramukhāḥ purā

tāsāṃ madhye ca rohiṇyā saha reme sa nityadā //
tyaktāḥ sarvāśca caṃdreṇa dakṣakanyāḥ suduḥkhitāḥ //
gatvā svapitaraṃ natvā prāhurasrāvilekṣaṇāḥ

vayaṃ tyaktāḥ prajānātha nirdoṣāḥ patinā tataḥ //
śaraṇaṃ tvāmanuprāptā duḥkhena mahatānvitāḥ

gatirbhava suraśreṣṭha sarveṣāṃ tvaṃ hitaṃ kuru //
asmākamupadiśyainaṃ caṃdraṃ ca rohiṇīratam

// pulastya uvāca // //
sa tāsāṃ vacanaṃ śrutvā gato yatra niśākaraḥ //
abravīcca samaṃ paśya sarvāsu tanayāsu me

atha vrīḍāsamāyuktaścaṃdrastaṃ pratyabhāṣata //
tava vākyaṃ kariṣyāmi dakṣa gaccha namostu te

gate dakṣe tato bhūyaścaṃdramā rohiṇīrataḥ //
tyaktvā ca kanyakāḥ sarvāḥ prajāpatisamudbhavāḥ

atha gatvā punaḥ sarvā dakṣamūcuḥ suduḥkhitāḥ //
na kṛtaṃ tava vākyaṃ vai caṃdreṇaiva durātmanā

daurbhāgyaduḥkhasaṃtaptā mariṣyāma na saṃśayaḥ //
anena jīvitenāpi maraṇaṃ niścayaṃ bhavet

// pulastya uvāca // //
atha roṣasamāyukto dakṣo gatvā'bravīdvidhum //
mama vākyaṃ tvayā caṃdra yasmātpāpa kṛtaṃ na hi

kṣayameṣyasi tasmāttvaṃ yakṣmaṇā nāsti saṃśayaḥ//
evaṃ dattvā tataḥ śāpaṃ gato dakṣaḥ svamālayam

yakṣmaṇā vyāpitaścaṃdraḥ kṣayaṃ yāti dinedine //
kṣīṇo dyutivihīnastu ciṃtayāmāsa caṃdramāḥ

ki karttavyaṃ mayā tatra hyasmiñchāpe sudāruṇe //
atha kiṃ pūjayiṣyāmi sarvakāmapradaṃ śivam

sa evaṃ niścayaṃ kṛtvā gatorbudamathācalam //
tapastepe jitakrodho japahomaparāyaṇaḥ

tasmai tuṣṭo mahādevo varṣāṇāmayute gate //
abravīdvarado'smīti tato'smai darśanaṃ dadau

// īśvara uvāca // //
varaṃ varaya bhadraṃ te yatte manasi vartate //
tava dāsyāmyahaṃ caṃdra yadyapi syātsudurllabham

// caṃdra uvāca// //
vyādhikṣayaṃ suraśreṣṭha kuru me tripurāṃtaka //
yakṣmaṇā vyāpito deho mamāyaṃ ca jagatpate

// īśvara uvāca // //
dakṣaśāpena te caṃdra yakṣmā kāye vyavasthitaḥ //
na śakto hyanyathā kartuṃ śāpastasya mahātmanaḥ

tasmāttvaṃ tasya tāḥ sarvāḥ kanyakā mama vākyataḥ //
niśākara samaṃ paśya tava vyādhirgamiṣyati

kṛṣṇe kṣayaśca te caṃdra śukle vṛddhirbhaviṣyati //
varaṃ varaya bhadraṃ te anyamiṣṭaṃ sudurllabham

// caṃdra uvāca // //
caṃdragrahe naro yo'tra somavāre ca śaṃkara //
bhaktyā snānaṃ karotyeva sa yātu paramāṃ gatim

piṇḍadānena deveśa svargaṃ gacchaṃtu pūrvajāḥ //
prasādāttava deveśa tīrthaṃ bhavatu muktidam

// īśvara uvāca // //
bhaviṣyaṃti naro'traiva vipāpmāno niśākara //
yasmātprabhā tvayā prāptā tīrthe'sminvimalodake

prabhāsatīrthaṃ vikhyātaṃ tasmādetadbhaviṣyati//
yatra somagrahe prāpte somavāre viśeṣataḥ

kariṣyaṃti narāḥ snānaṃ te yāsyaṃti parāṃ gatim //
ye'tra śrāddhaṃ kariṣyaṃti piṃḍadānaṃ tathā narāḥ //

gayāśrāddhasamaṃ puṇyaṃ teṣāṃ caṃdra bhaviṣyati //
tathā dānaṃ prakartavyaṃ soma lokairgrahe tava

// pulastya uvāca // //
evamuktvā virūpākṣastatraivāṃtaradhīyata //
candro'pi bubhuje sarvāḥ patnīśca dakṣasaṃbhavāḥ

iti śrīskānde mahāpurāṇa ekāśītisāhasryāṃ sahitāyāṃ saptame prabhāsakhaṇḍe tṛtīye'rbudakhaṇḍe caṃdraprabhāsatīrthamāhātmyavarṇanaṃnāma viṃśo'dhyāyaḥ