Skanda Purana · Verses 7.19-4

// rājovāca // //
gṛhītvā dakṣiṇāṃ daityānmahāviṣṇurjanārdanaḥ ///
cakāra kiṃ mamācakṣva paraṃ kautūhalaṃ hi me

// sārasvata uvāca // //
evaṃ stutaḥ surairdevo gṛhītvā medinīṃ hariḥ //
baliṃ nirvāsayāmāsa saṃpūrṇe yajñakarmaṇi //
yajñāṃte dakṣiṇāṃ labdhvā saṃpūrṇo'bhūdathādhvaraḥ

bhagavānapyasaṃpūrṇe tṛtīye tu krame vibhuḥ //
samabhyetya baliṃ prāha īṣatprasphuritādharaḥ

ṛṇe bhavati daityendra baṃdhanaṃ ghoradarśanam //
tvaṃ pūraya padaṃ tanme nocedbandhaṃ pratīccha bhoḥ

tanmurārivacaḥ śrutvā puro bhūtvā baleḥ sutaḥ //
bāṇo vāmanamācaṣṭe tadā taṃ viśvarūpiṇam

kṛtvā mahīmalpatarāṃ vapuḥ kṛtvā tu vāmanam//
padatrayaṃ yācayitvā viśvarūpamagāḥ katham

yadi tṛtīyaṃ kramaṇaṃ yācase jagadīśvara //
punarvāmanatāṃ yāhi balirdāsyati tatpadam

yādṛgvidhāya balinā vāmanāyodakaṃ kṛtam//
tattādṛśāya dātavyamatha kiṃ viśvarūpiṇe

bhavatkṛtamidaṃ viśvaṃ viśvasminvartate baliḥ //
chadmanā naiva gṛhṇanti sādhavo ye maheśvara

jagadetajjagannātha tāvakaṃ yadi manyase //
jñātvā balimamaryādaṃ bhavadbhaktiparāṅmukham

kaṃṭhapāśena niṣkāsya kena vai vāryate bhavān//
gopālamanyaṃ kurute rakṣaṇāya ca gopatiḥ //
sutṛṇaṃ cārayanpūrvo gopaḥ kiṃ kurute tadā

ityevamukte tenātha vacane balisūnunā //
provāca bhagavānvākyamādikartā janārdanaḥ

yānyuktāni vacāṃsītthaṃ tvayā bālena sāṃpratam//
teṣāṃ tvaṃ hetusaṃyuktaṃ śṛṇu pratyuttaraṃ mama

pūrvamuktastava pitā mayā bāṇa padatrayam //
dehi mahyaṃ pramāṇena tadetatsamanuṣṭhitam

kiṃ na vetti pramāṇaṃ me balistava pitā suta //
balerapi hitārthāya kṛtametatpadatrayam

tasmādyanmama bāleya tvatpitrāṃ'bu kare mahat //
dattaṃ tenāsya sutale kalpaṃ yāvadvasiṣyati

gate manvantare bāṇa śrāddhadevasya sāmpratam //
sāvarṇike tvāgate ca balirindro bhaviṣyati

iti proktvā balisutaṃ bāṇaṃ devastrivikramaḥ //
provāca balimabhyetya vacanaṃ madhurākṣaram

// śrībhagavānuvāca // //
apūrṇadakṣiṇe yāge gaccha rājanmahātalam //
sutalaṃnāma pātālaṃ vasa tatra nirāmayaḥ

// baliruvāca // //
sutalasthasya me nātha kathaṃ caraṇayostava //
darśanaṃ pūjanaṃ bhogo nivasāmi yathāsukham

śrībhagavānuvāca // //
daityendra hadaye nityaṃ tāvake nivasāmyaham //
ataste darśanaṃ prāptaḥ punaḥ sthāsye tavāntikam

tathānyamutsavaṃ puṇyaṃ vṛtte śakramahotsave //
dīpapratipannāmā'sau tatra bhāvī mahotsavaḥ

tatra tvāṃ naraśārdūlā hṛṣṭāḥ puṣṭāḥ svalaṃkṛtāḥ //
puṣpadīpapradānena arcayiṣyaṃti yatnataḥ //

tatrotsavaḥ puṇyatamo bhaviṣyati dharātale //
tava nāmāṃkito daitya tena tvaṃ vatsaraṃ sukhī

bhaviṣyasi narā ye tu dṛḍhabhaktisahā nvitāḥ //
tvāmarcayanti vidhivatte'pi syuḥ sukhabhāginaḥ

yathaiva rājyaṃ bhavatastu sāṃprataṃ tathaiva sā bhāvyatha kaumudīti //
ityevamuktvā madhumaditīśvaraṃ nivāsayitvā sutalaṃ sabhāryakam

urvī samādāya jagāma tūrṇaṃ sa śakrasadmāmarasaṃghajuṣṭam //
dattvā maghone madhujittriviṣṭapaṃ kṛtvā tu devānmakhabhāgabhoginaḥ

antardadhe viśvapatirmaheśaḥ saṃpaśyatāṃ vai vasudhādhipānām

gṛhītveti bale rājyaṃ manuputre niyojitam //
dvīpāṃtare ca te daityāḥ preṣitāścājñayā svayam

pātālanilayā ye tu te tatraiva niveśitāḥ //
devānāṃ paramo harṣaḥ saṃjāto balinigrahe

nivāsāya punaścakre vāmano vāmano manaḥ //
tatra kṣetre svanagare vāmanaḥ sa nyuvāsa ha

// sārasvata uvāca // //
prādurbhāvaste kathito narendra puṇyaḥ śucirvāmanasyāghahārī //
smṛte yasminsaṃśrute kīrtite ca pāpaṃ yāyātsaṃkṣayaṃ puṇyameti

// īśvara uvāca // //
iti sārasvatavacaḥ śrutvā bhojaḥ sa bhūpatiḥ //
namaskṛtya muniśreṣṭhaṃ pūjayāmāsa bhaktitaḥ

tato yathoktavidhinā sa bhojo nṛpasattamaḥ //
vastrāpathakṣetra yātrāṃ parivārajanaiḥ saha //
kṛtvā kṛtārthatāṃ prāpto jagāmānte paraṃ padam

etanmayā puṇyatamaṃ prabhāsakṣetre ca vasrāpathamīritaṃ te //
śrutvā paṭhitvā parayā sameto bhaktyā tu viṣṇoḥ padamabhyupaiti

yathā pāpāni dhūyaṃte gaṃgāvārivigāhanāt //
tathā purāṇaśravaṇādduritānāṃ vinā śanam

idaṃ rahasyaṃ paramaṃ tavoktaṃ na vācyametaddharibhaktivarjite //
dvijasya nindānirate'tipāpe gurāvabhakte kṛtapāpabuddhau

idaṃ paṭhedyo niyataṃ manuṣyaḥ kṛtabhāvanaḥ //
tasya bhaktiḥ śive kṛṣṇe niścalā jāyate dhuvam

tadbhaktyā sakalānarthānprāpnoti puruṣottamaḥ ///
purāṇavācine dadyādgobhūsvarṇavibhūṣaṇam

vittaśāṭhyaṃ na kartavyaṃ kurvandāridryamāpnuyāt //
triḥkṛtvā prapaṭhañchṛṇvaṃnsarvānkāmānavāpnuyāt

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe dvitīye vastrāpathakṣetramāhātmye balaye vāmanakṛtavarapradānavṛttāntavarṇana pūrvakaṃ vastrāpathakṣetrayātrāmāhātmya sārasvatabhojasaṃvādasamāptipuraḥsara vastrāpathakṣetramāhātmyasamāptivarṇanaṃ nāmaikonaviṃśatitamo'dhyāyaḥ

//
iti śrīskānde mahāpurāṇe saptame prabhāsakhaṇḍe dvitīyaṃ vastrāpathakṣetramāhātmyaṃ sampūrṇam // ( ७ - २) //