Skanda Purana · Chapter 7.196

// īśvara uvāca // //
tato gacchenmahādevi prabhāsaṃ jalasaṃsthitam //
vṛddhaprabhāsāddakṣiṇato nātidūre vyavasthitam

tasyaiva devi devasya śṛṇu māhātmyamuttamam

jāmadagnyena rāmeṇa yadā kṣattravadhaḥ kṛtaḥ //
tadā'sya paramā jātā ghṛṇā manasi bhāmini

tatastvārādhayāmāsa mahādevaṃ sureśvaram//
ugraṃ tapaḥ samāsthāya bahūnvarṣa gaṇānpriye

tatastuṣṭo mahādevastasya pratyakṣatāṃ gataḥ //
abravīdvaradaste'haṃ varaṃ varaya suvrata

// rāma uvāca // //
yadi tuṣṭo'si me deva yadi deyo varo mama //
darśayasva svakaṃ liṃgaṃ yajñe vajreṇa chāditam

ghṛṇā me mahatī jātā hatvemānkṣatriyānbahūn //
darśanāttava liṃgasya yena me naśyate ghṛṇā

tathā me pātakaṃ sarvaṃ prasādāttava śaṃkara

// śaṃkara uvāca // //
mama liṃgaṃ sahasrākṣa utthitaṃ tu punaḥpunaḥ //
vajreṇācchādayatyeva bhayena mahatā vṛtaḥ

na te'haṃ darśanaṃ yāsye liṃgarūpī kadācana

yanmāṃ vadasi ghṛṇayā vṛto'haṃ pātakena tu //
tatte'haṃ nāśayiṣyāmi sparśanāttu dvijottama

asmiñjalāśraye puṇye jalamadhye mahāmate //
utthāsyati mahāliṃgaṃ tasya tvaṃ darśanaṃ kuru //

gamiṣyati ghṛṇā sarvā niṣpāpastvaṃ bhaviṣyasi //
uktvaivamudatiṣṭhacca jalamadhyādvarānane

jalaprabhāsanāmāsya tato jātaṃ dharātale //
tasyālaṃ sparśanāddevi śivalokaṃ vrajennaraḥ

ekaṃ bhojayate yo'tra brāhmaṇaṃ śaṃsitavratam //
bhojito'haṃ bhavettena sapatnīko na saṃśayaḥ

eṣā jalaprabhāsasya saṃbhūtiste mayoditā //
śrutā pāpopaśamanī sarvakāmaphalapradā

iti śrīskāṃde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye jalaprabhāsamāhātmyavarṇanaṃnāma ṣaṇṇavatyuttaraśatatamo'dhyāyaḥ