Skanda Purana · Chapter 7.195

// īśvara uvāca // //
tato vṛddhaprabhāsaṃ tu gacchecca niyatātmavān //
ādiprabhāsāddakṣiṇato nātidūre vyavasthitam

caturmukhaṃ mahāliṃgaṃ darśanātpāpanāśanam

// śrīdevyuvāca // //
kathaṃ vṛddhaprabhāsaṃ tu nāma tasyābhavatprabho //
tasmindṛṣṭe phalaṃ kiṃ syātstute saṃpūjite tathā

etatkathaya me deva saṃkṣepānnātivistarāt

// īśvara uvāca // //
ādau svāyaṃbhuve devi pūrvamanvantare purā //
tretāyuge caturthe tu prabhāse kṣetra uttame

tasminkāle mahādevi pūrvamanvaṃtare purā //
tretāyuge caturthe tu ṛṣayastatra saṃgatāḥ

darśanārthaṃ prabhāsasya uttarāpathagāminaḥ //
taṃ dṛṣṭvā''cchāditaṃ devaṃ vajreṇa tu maheśvari

viṣādaṃ paramaṃ jagmurvākyaṃ cedamathābuvan //
adṛṣṭvā śāṃkaraṃ ligaṃ na yāsyāmo vayaṃ gṛham

svargārthino vayaṃ prāptā mahadadhvānameva hi //
tasmādatraiva tiṣṭhāmo yāvalliṃgasya darśanam

evaṃ te niścayaṃ kṛtvā parasmiṃstapasi sthitāḥ //
varṣāsvākāśagā bhūtvā hemaṃte salilāśrayāḥ

pañcāgnisādhanā grīṣme niyatā brahmacāriṇaḥ //
bahūnvarṣagaṇānviprā jarāgrastāstadā'bhavan

evaṃ vṛddhatvamāpannā yadā te varavarṇini //
chandyamānā varaiste tu śaṃkareṇa mahātmanā

liṃgasya darśanaṃ muktvā na te'nyaṃ vavrire varam

teṣāṃ tu niścayaṃ jñātvā sarveṣāṃ vṛṣabhadhvajaḥ //
anukampāparo bhūtvā svaliṃgaṃ tānadarśayat

etasminneva kāle tu bhittvā caiva vasundharām //
utthitaṃ sahasā liṃgaṃ tadeva varavarṇini

ṛṣayaste ca taṃ dṛṣṭvā sarve ca tridivaṃ gatāḥ //
atha teṣu prayāteṣu śakrastaptamanā hyabhūt

tamapi cchādayāmāsa vajreṇa śataparvaṇā

vṛddhabhāve yatasteṣāmṛṣīṇāṃ darśanaṃ gataḥ //
ato vṛddhaprabhāsaṃ tatkīrtyate vasudhātale

!
tasmindṛṣṭe varārohe adyāpi labhate phalam //
rājasūyāśvamedhānāṃ naro bhaktisamanvitaḥ

evaṃ tatra samutpannaṃ prabhāsaṃ vṛddhasaṃjñakam //
tatrokṣā brāhmaṇe deyaḥ samyagyātrāphalepsubhiḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye vṛddhaprabhāsamāhātmyavarṇanaṃnāma pañcanavatyuttaraśatatamo'dhyāyaḥ