Skanda Purana · Verses 7.19-2

// prahlāda uvāca // //
tacchrutvā devadeveśaściṃtayitvā punaḥpunaḥ // uvāca vacanaṃ tatra durvāsasamakalmaṣam

// śrībhagavānuvāca // //
parādhīno'smi viprendra bhaktyā krīto'smi nānyathā //
balerādeśakārī ca daityendravaśago hyaham

tasmātprārthaya viprendra daityaṃ vairocaniṃ balim//
asyādeśātkariṣyāmi yadabhīṣṭaṃ tavādhunā

tacchrutvā vacanaṃ vipro baliṃ provāca satvaram //
yajvanāṃ tvaṃ variṣṭhaśca dātṝṇāṃ tvaṃ mato'dhikaḥ

pārāvāraḥ kṛpāyāśca dayāṃ kuru mamopari //
preṣayasva mahābhāga devaṃ daityavinigrahe

saṃpūrṇaniyamaḥ snātastvatprasādādbhavāmyaham//
tacchutvā vacanaṃ daityo nātihṛṣṭamanāstadā //
durvāsasamuvācedaṃ naitadevaṃ bhaviṣyati

anyatprārthaya viprendra yatte manasi varttate //
taddāsyāmi na sandeho yadyapi syātsudurlabham

ātmānamapi dāsyāmi nāhaṃ tyakṣye hariṃ dvija //
bahubhiḥ sukṛtaiḥ prāptaṃ kathaṃ tyakṣyāmi keśavam

// durvāsā uvāca // //
nātilubdhaṃ hi māṃ viddhi kimanyatprārthayāmyaham //
rakṣa me jīvitaṃ daitya preṣayasva janārddanam

// baliruvāca // //
jānāsi tvaṃ yathā vipra hiraṇyākṣaṃ nipātitam //
bhūtvā yajñavarāhastu dadhārorvīṃ balāddivi

yathā ca daityapravaramavadhyaṃ daityadānavaiḥ //
hatavānhiraṇyakaśipuṃ nṛsiṃhaḥ sarvagaḥ prabhuḥ

tathaiva vṛtraṃ namuciṃ rakṣo laṃkeśa saṃjñakam //
jaghāna māyayā viṣṇuḥ surārthaṃ surasattamaḥ

prathamaṃ vāmano bhūtvā hyayācata padatrayam //
punastrivikramo bhūtvā bhuvanāni jahāra me

mayā puṇyavaśādviṣṇuryadi prāptaḥ kathañcana //
nāhaṃ tyakṣye jagannāthaṃ māyāvāmanakaṃ prabhum

// durvāsā uvāca // //
nāhaṃ bhokṣye vinā snānaṃ gomatyudadhisaṃgame //
yadi na preṣyasi hariṃ tatastyakṣye kalevaram

// baliruvāca // //
yadbhāvyaṃ tadbhavatu te yajjānāsi tathā kuru //
brahmarudrendranamitaṃ nāhaṃ tyakṣye padadvayam

tadā vivadamānau tau dṛṣṭvā sa jagadīśvaraḥ //
brahmaṇyadevaḥ kṛpayā brāhmaṇaṃ tamuvāca ha

svastho bhava dvijaśreṣṭha snāpayiṣye na saṃśayaḥ //
hatvā daityagaṇānsarvāngomatyudadhisaṃgame

// prahlāda uvāca // // /
śrutvā bhagavato vākyaṃ brāhmaṇaṃ prati daityarāṭ //
dṛḍhaṃ jagrāha caraṇau patitvā pādayostadā

tataḥ samṛddhimagamatpādau dattvā baleḥ prabhuḥ //
śaṃkhacakragadāpāṇirviṣṇurdurvāsasā'nvitaḥ

prasthitau tau tadā dṛṣṭvā durvāsasajanārddanau //
anantaḥ puruṣo 'gacchanmuśalī ca halāyudhaḥ

muśalī cāgrato'gacchattato viṣṇustrivikramaḥ //
tayoranvagamadviprā durvāsā bhūtalādbahiḥ

bhittvā rasātalaṃ sarve samuttasthustvarānvitāḥ //
āvirbabhūvustatraiva gomatyudadhisaṃgame

sannaddhau dṛḍhadhanvānau saṃkarṣaṇajanārdanau //
ūcatustau tadā vipraṃ kuru snānaṃ yadṛcchayā

tayostu vacanaṃ śrutvā snānaṃ cakre tvarānvitaḥ //
snātvā cāvaśyakaṃ karma kartumārabhata dvijaḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe caturthe dvārakāmāhātmye cakratīrthe kṛṣṇabalarāmadurvāsasasamāgamapūrvakaṃ durvāsasaḥ snānādyāhnikavidhividhāna- varṇanaṃnāmaikonaviṃśatitamo'dhyāyaḥ //