સ્કંદ પુરાણ · શ્લોક 7.19-2

॥ પ્રહ્લાદ ઉવાચ ॥ ॥
તચ્છ્રુત્વા દેવદેવેશશ્ચિંતયિત્વા પુનઃપુનઃ ॥ ઉવાચ વચનં તત્ર દુર્વાસસમકલ્મષમ્

॥ શ્રીભગવાનુવાચ ॥ ॥
પરાધીનોઽસ્મિ વિપ્રેન્દ્ર ભક્ત્યા ક્રીતોઽસ્મિ નાન્યથા ॥
બલેરાદેશકારી ચ દૈત્યેન્દ્રવશગો હ્યહમ્

તસ્માત્પ્રાર્થય વિપ્રેન્દ્ર દૈત્યં વૈરોચનિં બલિમ્॥
અસ્યાદેશાત્કરિષ્યામિ યદભીષ્ટં તવાધુના

તચ્છ્રુત્વા વચનં વિપ્રો બલિં પ્રોવાચ સત્વરમ્ ॥
યજ્વનાં ત્વં વરિષ્ઠશ્ચ દાતૄણાં ત્વં મતોઽધિકઃ

પારાવારઃ કૃપાયાશ્ચ દયાં કુરુ મમોપરિ ॥
પ્રેષયસ્વ મહાભાગ દેવં દૈત્યવિનિગ્રહે

સંપૂર્ણનિયમઃ સ્નાતસ્ત્વત્પ્રસાદાદ્ભવામ્યહમ્॥
તચ્છુત્વા વચનં દૈત્યો નાતિહૃષ્ટમનાસ્તદા ॥
દુર્વાસસમુવાચેદં નૈતદેવં ભવિષ્યતિ

અન્યત્પ્રાર્થય વિપ્રેન્દ્ર યત્તે મનસિ વર્ત્તતે ॥
તદ્દાસ્યામિ ન સન્દેહો યદ્યપિ સ્યાત્સુદુર્લભમ્

આત્માનમપિ દાસ્યામિ નાહં ત્યક્ષ્યે હરિં દ્વિજ ॥
બહુભિઃ સુકૃતૈઃ પ્રાપ્તં કથં ત્યક્ષ્યામિ કેશવમ્

॥ દુર્વાસા ઉવાચ ॥ ॥
નાતિલુબ્ધં હિ માં વિદ્ધિ કિમન્યત્પ્રાર્થયામ્યહમ્ ॥
રક્ષ મે જીવિતં દૈત્ય પ્રેષયસ્વ જનાર્દ્દનમ્

॥ બલિરુવાચ ॥ ॥
જાનાસિ ત્વં યથા વિપ્ર હિરણ્યાક્ષં નિપાતિતમ્ ॥
ભૂત્વા યજ્ઞવરાહસ્તુ દધારોર્વીં બલાદ્દિવિ

યથા ચ દૈત્યપ્રવરમવધ્યં દૈત્યદાનવૈઃ ॥
હતવાન્હિરણ્યકશિપું નૃસિંહઃ સર્વગઃ પ્રભુઃ

તથૈવ વૃત્રં નમુચિં રક્ષો લંકેશ સંજ્ઞકમ્ ॥
જઘાન માયયા વિષ્ણુઃ સુરાર્થં સુરસત્તમઃ

પ્રથમં વામનો ભૂત્વા હ્યયાચત પદત્રયમ્ ॥
પુનસ્ત્રિવિક્રમો ભૂત્વા ભુવનાનિ જહાર મે

મયા પુણ્યવશાદ્વિષ્ણુર્યદિ પ્રાપ્તઃ કથઞ્ચન ॥
નાહં ત્યક્ષ્યે જગન્નાથં માયાવામનકં પ્રભુમ્

॥ દુર્વાસા ઉવાચ ॥ ॥
નાહં ભોક્ષ્યે વિના સ્નાનં ગોમત્યુદધિસંગમે ॥
યદિ ન પ્રેષ્યસિ હરિં તતસ્ત્યક્ષ્યે કલેવરમ્

॥ બલિરુવાચ ॥ ॥
યદ્ભાવ્યં તદ્ભવતુ તે યજ્જાનાસિ તથા કુરુ ॥
બ્રહ્મરુદ્રેન્દ્રનમિતં નાહં ત્યક્ષ્યે પદદ્વયમ્

તદા વિવદમાનૌ તૌ દૃષ્ટ્વા સ જગદીશ્વરઃ ॥
બ્રહ્મણ્યદેવઃ કૃપયા બ્રાહ્મણં તમુવાચ હ

સ્વસ્થો ભવ દ્વિજશ્રેષ્ઠ સ્નાપયિષ્યે ન સંશયઃ ॥
હત્વા દૈત્યગણાન્સર્વાન્ગોમત્યુદધિસંગમે

॥ પ્રહ્લાદ ઉવાચ ॥ ॥ ।
શ્રુત્વા ભગવતો વાક્યં બ્રાહ્મણં પ્રતિ દૈત્યરાટ્ ॥
દૃઢં જગ્રાહ ચરણૌ પતિત્વા પાદયોસ્તદા

તતઃ સમૃદ્ધિમગમત્પાદૌ દત્ત્વા બલેઃ પ્રભુઃ ॥
શંખચક્રગદાપાણિર્વિષ્ણુર્દુર્વાસસાઽન્વિતઃ

પ્રસ્થિતૌ તૌ તદા દૃષ્ટ્વા દુર્વાસસજનાર્દ્દનૌ ॥
અનન્તઃ પુરુષો ઽગચ્છન્મુશલી ચ હલાયુધઃ

મુશલી ચાગ્રતોઽગચ્છત્તતો વિષ્ણુસ્ત્રિવિક્રમઃ ॥
તયોરન્વગમદ્વિપ્રા દુર્વાસા ભૂતલાદ્બહિઃ

ભિત્ત્વા રસાતલં સર્વે સમુત્તસ્થુસ્ત્વરાન્વિતાઃ ॥
આવિર્બભૂવુસ્તત્રૈવ ગોમત્યુદધિસંગમે

સન્નદ્ધૌ દૃઢધન્વાનૌ સંકર્ષણજનાર્દનૌ ॥
ઊચતુસ્તૌ તદા વિપ્રં કુરુ સ્નાનં યદૃચ્છયા

તયોસ્તુ વચનં શ્રુત્વા સ્નાનં ચક્રે ત્વરાન્વિતઃ ॥
સ્નાત્વા ચાવશ્યકં કર્મ કર્તુમારભત દ્વિજઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે ચતુર્થે દ્વારકામાહાત્મ્યે ચક્રતીર્થે કૃષ્ણબલરામદુર્વાસસસમાગમપૂર્વકં દુર્વાસસઃ સ્નાનાદ્યાહ્નિકવિધિવિધાન- વર્ણનંનામૈકોનવિંશતિતમોઽધ્યાયઃ ॥