Skanda Purana · Chapter 7.19

// pulastya uvāca // //
tato gacchennṛpaśreṣṭha tīrthaṃ pāpapraṇāśanam //
vārāhasya hareriṣṭaṃ sadā vāsasukhapradam

vārāheṇāvatāreṇa pṛthvī tatra samuddhṛtā //
hariṇoktā sthirā tiṣṭha na bhetavyaṃ kadācana

ahaṃ ceto gamiṣyāmi vaikuṇṭhe ca punaḥ śubhe //
varaṃ varaya kalyāṇi yadyadiṣṭaṃ sudurlabham

// pṛthivyuvāca // //
yadi deyo varo mahyaṃ śaṃkhacakragadādhara //
anena vapuṣā tiṣṭha hyasmiṃstīrthe sadā hare

// hariruvāca // //
anena vapuṣā devi parvate'rbudasaṃjñake //
ahaṃ sthāsyāmi te vākyātsadā loka hite rataḥ

mamāgre yo hradaḥ puṇyaḥ sunirmalajalānvitaḥ //
māghamāse site pakṣa ekādaśyāṃ samāhitaḥ

tatra snātvā naro bhaktyā mucyate brahmahatyayā //
tatra śrāddhaṃ kariṣyaṃti manuṣyāḥ śraddhayānvitāḥ

pitṝṇāṃ jāyate tṛptiryāvadābhūtasaṃplavam //
tasmātsarvaprayatnena snānaṃ tatra samācaret

// pulastya uvāca // //
ityuktvāṃtardadhe rājangoviṃdo garuḍadhvajaḥ //
tasmindine nṛpaśreṣṭha snātvā vrataṃ samācaret

tarpaṇaṃ piṃḍadānaṃ ca yaḥ kuryādbhaktitatparaḥ //
sa yāti viṣṇusālokyaṃ pūrvajaiḥ saha pārthiva

tatra dānaṃ praśaṃsaṃti gatvā brāhmaṇasattame //
asmiṃstīrthe nṛpaśreṣṭha godānaṃ ca karoti yaḥ

romasaṃkhyāni varṣāṇi svarge tiṣṭhati mānavaḥ //
tasmātsarvātmanā rājangodānaṃ ca samācaret

ekādaśyāṃ viśeṣeṇa karttavyaṃ snānamuttamam //
dānaṃ kuryādyathāśaktyā sa yāti paramāṃ gatim

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe tṛtīye'rbudakhaṃḍe vārāhatīrthamāhātmyavarṇanaṃnāmaikonaviṃśodhyāyaḥ