Skanda Purana · Chapter 7.186

// īśvara uvāca // //
tato gacchenmahādevi nāgasthānamanuttamam //
maṃkīśātpaścime bhāge saṃgamatritayaṃ gatam

pāpaghnaṃ sarvajaṃtūnāṃ pātālavivaraṃ mahat

balabhadraḥ purā devi śrutvā kṛṣṇasya paṃcatām //
bhallatīrthe tu bhallena tataḥ prabhāsamāgataḥ

kṣetraṃ mahāprabhāvaṃ hi jñātvā sarvārthasiddhidam //
yādavānāṃ kṣayaṃ kṛtvā tato vairāgyameyivān //

śeṣanāgeśarūpeṇa niṣkramya ca śarīrataḥ //
gacchangacchaṃstadā prāpya tīrthaṃ traisaṃgamaṃ param

pātālasya tadā dṛṣṭvā dvāraṃ vivararūpakam //
praviṣṭo'tha jagāmāśu yatrānaṃtaḥ svayaṃ sthitaḥ

yato nāgasvarūpeṇa sthāne'smiṃśca samāviśat //
tatprabhṛtyeva deveśi nāgasthānamiti śrutam

nāgarādityapūrveṇa yatra kāyo visarjitaḥ //
tadadyāpi prasiddhaṃ vai śeṣasthānamiti śrutam

ataḥ snātvā mahādevi tatra tīrthe trisaṃgame /
nāgasthānaṃ samabhyarcya pañcamyāmakṛtāśanaḥ

śrāddhaṃ kṛtvā yathāśaktyā dattvā viprāya dakṣiṇām //
vimuktaḥ sarvaduḥkhebhyo rudralokaṃ sa gacchati

pāyasaṃ madhusaṃmiśraṃ bhakṣyabhojyaiḥ samanvitam //
śeṣanāgaṃ samuddiśya vipraṃ yastatra bhojayet //
koṭibhojyaṃ kṛtaṃ tena jāyate nātra saṃśayaḥ

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye nāga sthānamāhātmyavarṇanaṃnāma ṣaḍaśītyuttaraśatatamo'dhyāyaḥ