Skanda Purana · Chapter 7.187

// īśvara uvāca // //
tato gacchenmahādevi sarvakāmaphalapradam //
prabhāsapaṃcakaṃ puṇyamādyaṃ tatra vyavasthitam

tasyaiva paścime bhāge prabhāsa iti cocyate //
vṛddhaprabhāsaśca tato dakṣiṇe nātidūrataḥ

jala prabhāsaśca tato dakṣiṇena varānane //
kṛtasmaraprabhāsaśca śmaśānaṃ yatra bhairavam

evaṃ paṃcaprabhāsānyaḥ paśyedbhaktayā samanvitaḥ //
sa yāti paramaṃ sthānaṃ jarāmaraṇavarjitam

na nivartati yatprāpya duṣprāpyaṃ tridaśairapi //
prabhāsaṃ prathamaṃ tīrthaṃ triṣu lokeṣu viśrutam

devānāmapi duṣprāpyaṃ mahāpātakanāśanam //
prabhāse tvekarātreṇa amāvāsyāṃ kṛtodakaḥ

mucyate pātakaiḥ sarvaiḥ śivalokaṃ sa gacchati //
saptajanmakṛtaṃ pāpaṃ gaṃgāsāgarasaṃgame

janmanāṃ ca sahasreṇa yatpāpaṃ kurute naraḥ //
snānādevāsya naśyeta sāgare lavaṇāṃbhasi

caturdaśyāmamāvāsyāṃ pañcadaśyāṃ viśeṣataḥ //
ahorātroṣito bhūtvā brāhmaṇānbhojya śaktitaḥ

dattvā gāṃ kāṃcanaṃ tebhyaḥ śivaḥ prīto bhavatviti //
evaṃ kṛtvā naro devi kulānāṃ tārayecchatam

// devyuvāca // //
prabhāsapaṃcakaṃ hyetadyattvayā parikīrtitam //
kathamatra samudbhūtametanme kautukaṃ mahat

eka eva śruto'smābhiḥ prabhāsastīrthavāsitaḥ //
prabhāsāḥ paṃca deveśa yattvayā parikīrtitāḥ

etanme saṃśayaṃ sarvaṃ yathāvadvaktumarhasi //

// īśvara uvāca // //
śṛṇu devi pravakṣyāmi kathāṃ pāpapraṇāśanīm //
yāṃ śrutvā mānavo bhaktyā prāpnoti paramāṃ gatim

purā maheśvaro devaścacāra vasudhāmimām //
divyarūpadharaḥ kānto digvāsāḥ sa yadṛcchayā

evaṃ ca ramamāṇastu ṛṣīṇāmāśramaṃ mahat //
jagāma kautukāviṣṭo bhikṣārthaṃ dāruke vane

bhramamāṇasya tasyātha dṛṣṭvā rūpamanuttamam //
tā nāryaḥ kāmasaṃtaptā babhūvurvyathitendriyāḥ

sānurāgāstataḥ sarvā anugacchaṃti taṃ sadā //
samāliṃgaṃti tāḥ kāścitkāśca vīkṣaṃti rāgataḥ

prārthayaṃti tathā cānyāḥ parityajya gṛhānsvakān

evaṃ tāsāṃ svarūpaṃ te dṛṣṭvā sarve maharṣayaḥ //
kopena mahatā yuktāḥ śepustaṃ vṛṣabhadhvajam //

yasmāttvaṃ nagnatāmetya āśrame'sminmamāgataḥ //
mohayānaḥ striyo'smākaṃ lajjāṃ naivaṃ karoṣi ca //
tasmātte patatālliṃgaṃ sadya eva vṛṣadhvaja

tatastatpatitaṃ liṃgaṃ tatkṣaṇācchaṃkarasya ca //
tasminprapatite bhūmau prākaṃpata vasuṃdharā

kṣubhitāḥ sāgarāḥ sarve maryādā vijahustadā //
śīrṇāni giriśṛṃgāṇi trastāḥ sarve divaukasaḥ

tato devāḥ sagandharvāḥ samahoragakinnarāḥ //
ūcuḥ pitāmahaṃ gatvā kimetatkāraṇaṃ vibho

sāgarāḥ kṣubhitā yena plāvayaṃti vasuṃdharām //
śīryaṃte giriśṛṅgāṇi kaṃpate ca vasuṃdharā

cihnāni lokanāśāya dṛśyante dāruṇāni ca //
teṣāṃ tadvacana śrutvā brahmaloke pitāmahaḥ

dhyātvā tu suciraṃ kālaṃ vākyametaduvāca ha //
śivaliṃgaṃ nipatitaṃ pṛthivyāṃ surasattamāḥ

śāpena ṛṣimukhyānāṃ bhārgavāṇāṃ mahātmanām //
tasminnipatite bhūmau trailokyaṃ sacarācaram

etadavasthatāṃ prāptaṃ tasmāttatraiva gamyatām //
viṣṇunā saha gīrvāṇāstathā nītirvidhīyatām

tataḥ kṣīrodadhiṃ jagmurbrahmādyāstridivaukasaḥ //
yatra śete caturbāhuryoganidrāṃ ca saṃgataḥ

tasmai sarvaṃ samācakhyustenaiva sahitāstataḥ //
jagmuryatra mahādevo liṃgena rahito vibhuḥ

ūcuḥ samāhitāḥ sarve praṇipatya divaukasaḥ

liṃgamutkṣipyatāmetadyatkṣitau patitaṃ vibho //
ete mahārṇavāḥ sarve plāvayaṃti vasuṃdharām

// bhagavānuvāca // //
ṛṣibhiḥ pātitaṃ hyetanmama liṃgaṃ sureśvarāḥ //
na tu śakyo mayā kartuṃ bādhasteṣāṃ mahātmanām

śāpo hi bhārgavendrāṇāmato me śrūyatāṃ vacaḥ //
pūjayadhvaṃ surāḥ sarve brahmaviṣṇupurassarāḥ

liṃgametattataḥ sarve sarvaṃ lipsatha sattamāḥ //
prakṛtiṃ sāgarāḥ sarve yāsyaṃti girayastathā

etatpuṇyatame kṣetre dhṛtvā sarve samāhitāḥ //
athoddhṛtya surāḥ sarve prabhāsaṃ kṣetramāgatāḥ

tatraiva nidadhuḥ sarve tataḥ pūjāṃ pracakrire //
brahmaṇā pūjitaṃ liṃgaṃ viṣṇunā prabhaviṣṇunā

śakreṇātha kubereṇa yamena varuṇena ca //
ūcuścaiva tato devā liṃgaṃ saṃpūjya bhaktitaḥ

adyaprabhṛti rudrasya liṃgaṃ saṃpūjya bhaktitaḥ //
bhaviṣyāmo na saṃdehastathā pitṛgaṇāśca ye

ya enaṃ pūjayiṣyaṃti bhaktiyuktāśca mānavāḥ //
yāsyaṃti te surāvāsaṃ saśarīrā narottamāḥ

atraiva prathamaṃ ligaṃ yatosmā'bhiḥ pratiṣṭhitam //
prabhāsaṃ nāma cāsyāpi prabhāseti bhaviṣyati

evamuktvā gatāḥ sarve tridivaṃ surasattamāḥ //
taṃ dṛṣṭvā tridivaṃ yānti bhūyāṃsaḥ prāṇino bhuvi

tatastriviṣṭapaṃ vyāptaṃ bahubhiḥ prāṇibhiḥ priye //
taddṛṣṭvā tridivaṃ vyāptaṃ sahasrākṣaḥ suduḥkhitaḥ

jñātvā liṃgaprabhāvaṃ tu tataścāgatya bhūtalam //
vajreṇācchādayāmāsa samaṃtātsa varānane

tataḥ prabhṛti no devi svargaṃ gacchaṃti mānavāḥ //
iti saṃkṣepataḥ proktaḥ prabhāsasya mahodayaḥ //
sarvapāpopaśamanaḥ sarvakāmaphalaṃ pradaḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathameprabhāsakṣetramāhātmye prabhāsapañcakamāhātmyavarṇanaṃnāma saptāśītyuttaraśatatamo'dhyāyaḥ