સ્કંદ પુરાણ · અધ્યાય 7.186

॥ ઈશ્વર ઉવાચ ॥ ॥
તતો ગચ્છેન્મહાદેવિ નાગસ્થાનમનુત્તમમ્ ॥
મંકીશાત્પશ્ચિમે ભાગે સંગમત્રિતયં ગતમ્

પાપઘ્નં સર્વજંતૂનાં પાતાલવિવરં મહત્

બલભદ્રઃ પુરા દેવિ શ્રુત્વા કૃષ્ણસ્ય પંચતામ્ ॥
ભલ્લતીર્થે તુ ભલ્લેન તતઃ પ્રભાસમાગતઃ

ક્ષેત્રં મહાપ્રભાવં હિ જ્ઞાત્વા સર્વાર્થસિદ્ધિદમ્ ॥
યાદવાનાં ક્ષયં કૃત્વા તતો વૈરાગ્યમેયિવાન્ ॥

શેષનાગેશરૂપેણ નિષ્ક્રમ્ય ચ શરીરતઃ ॥
ગચ્છન્ગચ્છંસ્તદા પ્રાપ્ય તીર્થં ત્રૈસંગમં પરમ્

પાતાલસ્ય તદા દૃષ્ટ્વા દ્વારં વિવરરૂપકમ્ ॥
પ્રવિષ્ટોઽથ જગામાશુ યત્રાનંતઃ સ્વયં સ્થિતઃ

યતો નાગસ્વરૂપેણ સ્થાનેઽસ્મિંશ્ચ સમાવિશત્ ॥
તત્પ્રભૃત્યેવ દેવેશિ નાગસ્થાનમિતિ શ્રુતમ્

નાગરાદિત્યપૂર્વેણ યત્ર કાયો વિસર્જિતઃ ॥
તદદ્યાપિ પ્રસિદ્ધં વૈ શેષસ્થાનમિતિ શ્રુતમ્

અતઃ સ્નાત્વા મહાદેવિ તત્ર તીર્થે ત્રિસંગમે ।
નાગસ્થાનં સમભ્યર્ચ્ય પઞ્ચમ્યામકૃતાશનઃ

શ્રાદ્ધં કૃત્વા યથાશક્ત્યા દત્ત્વા વિપ્રાય દક્ષિણામ્ ॥
વિમુક્તઃ સર્વદુઃખેભ્યો રુદ્રલોકં સ ગચ્છતિ

પાયસં મધુસંમિશ્રં ભક્ષ્યભોજ્યૈઃ સમન્વિતમ્ ॥
શેષનાગં સમુદ્દિશ્ય વિપ્રં યસ્તત્ર ભોજયેત્ ॥
કોટિભોજ્યં કૃતં તેન જાયતે નાત્ર સંશયઃ

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખંડે પ્રથમે પ્રભાસક્ષેત્રમાહાત્મ્યે નાગ સ્થાનમાહાત્મ્યવર્ણનંનામ ષડશીત્યુત્તરશતતમોઽધ્યાયઃ