Skanda Purana · Verses 7.18-3

// sūta uvāca // //
iti proktā tadā devī śaṃkareṇa yaśasvinī //
punaḥ papraccha vipreṃdrāḥ kṣetramāhātmyavistaram

// devyuvāca // //
adya me saphalaṃ janma saphalaṃ ca tapaḥ prabho //
devatvamadya me jātaṃ tvatprasādena śaṃkara

adyāhaṃ kṛtakalyāṇī jñānadṛṣṭiḥ kṛtātvayā //
adya me bhūṣitau karṇau kṣetra māhātmyabhūṣaṇau

adya me tejasaḥ piṃḍo jāto jñānaṃ hṛdi sthitam //
adya me kulaśīlaṃ ca adya me rūpalakṣaṇam

adya me bhrāṃtirucchinnā tīrthabhramaṇasaṃbhavā //
prabhāse niścalaṃ jātaṃ mano me mānināṃ vara

ārādhito mayā pūrvaṃ tuṣṭo me'dya sureśvaraḥ //
vahninā veṣṭitā sāhamekapādena saṃsthitā

tattapaḥ saphalaṃ tvadya jātaṃ me bhaktavatsala //
prabhāsakṣetramāhātmyamadya me prakaṭīkṛtam

punaḥ pṛcchāmi deveśa yāthātathyaṃ vada prabho

adyāpi saṃśayo nātha tīrthamāhātmyasaṃbhavaḥ//
anyatkautūhalaṃ deva kathayasva maheśvara

ayaṃ yo varttate deva caṃdraste śirasi sthitaḥ //
kasyāyaṃ kathamutpannaḥ kasminkāle vada prabho

// īśvara uvāca // //
asminkāle mahādevi vārāha iti viśrute //
parārddhe tu dvitīye'sminvartamāne tu vedhasaḥ

dvitīyamāsasyādau tu pratipadyā prakīrtitā //
vārāheṇoddhṛtā tasyāṃ tathā cādau dharā priye //
tena vārāhakalpeti nāma jātaṃ dharātale

tasminkalpe mahādevi gate saṃdhyāṃśake priye //
prathamasya manoścādau devi svāyaṃbhuvasya hi

kṣīrode mathyamāne tu daivatairdānavairapi //
ratnāni jajñire tatra caturddaśamitāni vai

teṣāṃ madhye mahātejāścaṃdramāstattvasaṃbhava //
so'yaṃ mayā dhṛto devi adyāpi śirasi priye

viṣe pīte mahādevi prabhāsasthasya me sadā //
bhūṣaṇaṃ muktaye devairmama caṃdraḥ kṛtaḥ purā

śaśinābhūṣito yasmāttenāhaṃ śaśibhūṣaṇaḥ//
tatra sthāne sthito'dyāpi svayaṃbhūrliṃgamūrttimān

sarvasiddhipradātā ca kalpasthāyī sadā priye //
ityetatkathitaṃ devi kimanyatparipṛcchasi

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye śivaśirobhūṣaṇa candrotpattivṛttāntavarṇanaṃnāmāṣṭādaśo'dhyāyaḥ