Skanda Purana · Verses 7.18-2

// śrīprahlāda uvāca // //
pūjayedgaṇanāthaṃ taṃ rukmiṇaṃ rukmabhūṣitam //
durvāsasaṃ ca kṛṣṇaṃ ca balabhadraṃ ca bhaktitaḥ

yajatyeko mahāyajñaiḥ saṃpūrṇavaradakṣiṇaiḥ //
ekaḥ paśyati deveśaṃ kṛṣṇaṃ tulyaphalau hi tau

vāpīkūpataḍāgāni karotyekaḥ samāhitaḥ //
ekaḥ paśyati deveśaṃ kṛṣṇaṃ tulyaphalau hi tau

gobhūtilahiraṇyādi dadātyeko dinedine //
ekaḥ paśyati deveśaṃ kṛṣṇaṃ tulyaphalau hi tau

prāṇāyāmādisaṃyukto japadhyānaparāyaṇaḥ //
ekaḥ paśyati deveśaṃ kṛṣṇaṃ tulyaphalau hi tau

jāhnavyādiṣu tīrtheṣu susnātvaikaḥ samāhitaḥ //
ekaḥ paśyati deveśaṃ kṛṣṇaṃ tulyaphalau hi tau

tribhirvikramaṇairyena vikrāṃtaṃ bhuvanatrayam //
trivikramaṃ ca taṃ dṛṣṭvā mucyate pātakatrayāt

// ṛṣaya ūcuḥ // //
kathaṃ traivikramī mṛrttirāgateyaṃ dharātale //
kalānyāsācca kṛṣṇatvaṃ kadeyaṃ prāptavatyatha

daitya saṃśayamasmākaṃ chettumarhasyaśeṣataḥ //
durvāsasaśca kṛṣṇasya saṃbhavaḥ kathyatāmiti

// prahlāda uvāca // //
tacchrūyatāṃ dvijaśreṣṭhā yathā mūrttistrivikramī //
durvāsasā samāyuktā saṃbhūtā dharaṇītale

pūrvaṃ kṛtayugasyāṃte balinā ca puraṃdaraḥ //
nirjitya bhraṃśitaḥ sthānāttadarthaṃ madhusūdanaḥ //

kaśyapādvāmano jajñe tato'bhūcca trivikramaḥ //
tribhiḥ kramairmitām̐llokānākramya madhuhā hariḥ

baliṃ cakāra bhagavānpātālatalavāsi nam //
bhaktyā tvananyayā kṛṣṇo daityena paritoṣitaḥ

svayaṃ caivā'vasattatra bhaktyā krīto haristadā //
anugrahāya bhagavāndvārapālo babhūva ha

durvāsāścāpi bhagavānātreyo munisattamaḥ//
aṭaṃstīrthāni mokṣārthaṃ muktikṣetramaciṃtayat

evaṃ citayamānaḥ sa jñānadṛṣṭyā mahāmuniḥ//
gomatyā saṃgamo yatra cakratīrthena bho dvijāḥ

tanmuktikṣetramājñāya gamanāya matiṃ dadhe //
sotītya nagaragrāmānudyānāni vanāni ca

ānarttaviṣayaṃ prāpya daityabhūmiṃ viveśa ha //
niḥsvādhyāyavaṣaṭkārāṃ vedadhvanivivarjjitām

kuśena daityarājena sevitāṃ pālitāṃ tathā //
bahumleccha samākīrṇāmadharmopārjakairjanaiḥ

pratyāsannāmiti jñātvā cakratīrthamagāddvijaḥ //
snātvā ca saṃgame puṇye mokṣye'haṃ ca kṛtāhnikaḥ

iti kṛtvā sa niyamaṃ yayau śīghraṃ munistadā //
snātvā śīghraṃ prayāsyāmi daityabhūmiṃ vihāya ca

ityevaṃ ciṃtayanmārge śīghrameva jagāma saḥ//
dṛṣṭvā ca saṃgamaṃ puṇyaṃ gomatyā sāgarasya ca

nidhāya vāsasī tatra mṛdamālabhya gomayam //
śikhāṃ ca baddhvā karayoḥ kṛtvā ca niyataḥ kuśān //

yāvatsnāti ca vipro'sau dṛṣṭo daityairdurātmabhiḥ //
bruvaṃtaḥ ko'yamityevaṃ hanyatāṃhanyatāmiti

asmābhiḥ pālite deśe kaḥ snāti manujādhamaḥ //
bruvaṃta iti jaghnuste jānubhirmuṣṭibhistathā

brāhmaṇo'haṃ na haṃtavyaḥ śrutvā cā'tīva pīḍitaḥ //
taṃ dṛṣṭvā hanyamānaṃ tu brāhmaṇaṃ tairdurātmabhiḥ

nivārayāmāsa ca tānrururnāma mahāsuraḥ //
jagṛhustasya vastrāṇi kuśāṃste cikṣipurjale

cakarṣuścaraṇau gṛhya śapaṃto duṣṭacetasaḥ //
pade gṛhītvā tamṛṣiṃ nītvā sīmni vyasarjayan

taṃ tadā mūrchitaprāyaṃ dṛṣṭvocuḥ kupitāśca te //
atrāgato yadi punarhaniṣyāmo na saṃśayaḥ //
ānarttaviṣayāṃstānvai dṛṣṭvā tatra jalāśayam

prāṇasaṃśayamāpannastataściṃtāparo'bhavat //
śapyehaṃ yadi daiteyāṃstapasaḥ kiṃ vyayena me

athavā niyamabhraṣṭastyakṣye cedaṃ kalevaram //
mama pakṣaṃ ca kaḥ kuryyātko me dāsyati jīvitam

cakratīrthe ca kaḥ snānaṃ kārayiṣyati māmiha //
ko vā daityagaṇānetāñchakto jetuṃ mahāmṛdhe //
taṃ vinā puṇḍarīkākṣaṃ bhaktānāmabhayapradam

brahmādīnāṃ ca netāraṃ śaraṇāgatavatsalam //
cakrahastaṃ vinā medya konyaḥ śarmmaprado bhavet

iti dhyātvā ca suciraṃ jñātvā pātālavāsi nam //
ātreyo viṣṇuśaraṇaṃ jagāma dharaṇītalam

upavāsaiḥ kṛśo dīno bhūtalaṃ praviveśa ha //
sa daittyarājabhavanaṃ gandharvāpsarasāvṛtam //

śobhitaṃ suramukhyena viṣṇunā prabhaviṣṇunā //
durvāsāḥ praviveśātha prahṛṣṭenāṃtarātmanā

durvāsasamathāyāṃtaṃ dṛṣṭvā daityapatistadā //
pratyutthāyārhayāṃcakre svāsane saṃnyaveśayat

madhuparkaṃ ca gāṃ caiva dattvārghyaṃ pārśvataḥ sthitaḥ //
provāca praṇato brahmankathamatrāgato bhavān

sukhopaviṣṭaḥ sa ṛṣistatrāpaśyattrivikramam //
daityendradvāradeśe tu tiṣṭhantamakutobhayam

taṃ dṛṣṭvā devadeveśaṃ śrīvatsāṃkaṃ caturbhujam //
ruroda sa ṛṣiśreṣṭhastrāhitrāhītyuvāca ca

saṃsārabhayabhītānāṃ duḥkhitānāṃ janārdana //
śatrubhiḥ paribhūtānāṃ śaraṇaṃ bhava keśava

mama duḥkhābhitaptasya śatrubhiḥ karṣitasya ca //
parābhūtasya dīnasya kṣudhayā pīḍitasya ca

apūrṇaniyamasyā'tha kleśitatya ca dānavaiḥ //
brahmaṇyadeva viprasya śaraṇaṃ bhava keśava

ityuktvā darśayāmāsa śarīraṃ daityatāḍitam //
tadbrāhmaṇāvamānaṃ ca dṛṣṭvā cukrodha vāmanaḥ

kenāpamānito brahmanniyamaḥ kena khaṇḍitaḥ //
kathayasva mahābhāga dharmapāle mayi sthite

// durvāsā uvāca // //
muktitīrthamahaṃ jñātvā jñānena madhusūdana //
cakratīrthaṃ gataḥ snātuṃ yātrāyāṃ harṣasaṃyutaḥ

akṛtasnāna evā'haṃ dṛṣṭo daityairdurāsadaiḥ //
gale gṛhītaḥ kṛṣṇāhaṃ muṣṭibhistāḍitastathā

balādgṛhītvā vāsāṃsi kuśāṃścaivākṣataiḥ saha //
jale kṣiptvā caraṇayorgṛhītvā māṃ samākṛṣan

sīmāṃte māṃ tu prakṣipya procuste dānavādhamāḥ //
haniṣyāmo yadi punarāgaṃtāsi na saṃśayaḥ

snāto'haṃ cakratīrthe tu kariṣye bhojanaṃ vibho //
tasmātsnāpaya goviṃda niyamaṃ saphalaṃ kuru

tava prasādātsnātvā'haṃ bhuktvā ca prītamānasaḥ //
pratijñāṃ saphalāṃ kṛtvā vicariṣye mahīmimām

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe caturthe dvārakāmāhātmye cakratīrthamāhātmye rākṣasakṛtadurvāsaḥparābhavavṛttāntavarṇanaṃ nāmāṣṭādaśo'dhyāyaḥ