Skanda Purana · Chapter 7.18

// // pulastya uvāca // //
tato gacchennṛpaśreṣṭha yamatīrthamanuttamam //
mocakaṃ narakebhyaśca prāṇināṃ pāpanāśanam

purā citrāṃgado nāma rājā paramalobhavān //
na tena sukṛtaṃ kiṃcitkṛtaṃ pārthivasattama

atīva niṣṭhuro duṣṭo devabrāhmaṇapīḍakaḥ //
paradāraharo nityaṃ paravittaharastathā

satyaśaucavihīnastu māyāmatsarasaṃyutaḥ //
sa kadācinmṛgayāsakta ārūḍho'rbudaparvate

aṭanātsa pariśrāṃtaḥ kṣutpipāsāsamākulaḥ //
tena tatra hradaḥ prāptaḥ svacchodakaprapūritaḥ

padminībhiḥ samākīrṇo grāhanakrajhaṣākulaḥ //
nānāpakṣisamāyukto manohārī suvistaraḥ

tṛṣārtaḥ saṃpraviṣṭaḥ sa tasminneva jalāśaye //
grāheṇa tatkṣaṇāddhṛtvā bhakṣito nṛpasattama

tasyārthe narakā raudrā nirmitāśca yamena ca //
yamadūtaistataḥ kṣiptaḥ sa nītvā pāpakṛttamaḥ

tasya sparśena te sarve narakasthā sukhaṃ gatāḥ //
te dūtā dharmarājāya vṛttāṃtaṃ narako dbhavam //
ācakhyurvismayāviṣṭā narakasthānāṃ sukhodbhavam

tadā vaivasvataḥ prāha bhūmāvastyarbudācalaḥ //
tatra me'tipriyaṃ tīrthaṃ yatra taptaṃ mayā tapaḥ

tatrāsau mṛtyumāpanno bhātyadastviha kāraṇam //
tairuktaṃ satyametaddhi mṛto'sāvarbudācale //
grāheṇa sa dhṛtastatra mṛtyuṃ prāpto nṛpādhamaḥ

//
// yama uvāca // //
mucyatāmāśu tenāyaṃ nāneyāścāpare janāḥ //
ye mṛtā mama tīrthe vai sarvapātakanāśane

tatastaiḥ kiṃkarairmukto yamavākyānnṛpottama //
triviṣṭapaṃ mudā prāptaḥ sevyamāno'psarogaṇaiḥ

yastu bhaktisamāyuktaḥ snānaṃ tatra samācaret //
sa yāti paramaṃ sthānaṃ jarāmaraṇavarjitam

tasmātsarvaprayatnena snānaṃ tatra samācaret //
caitraśuklatrayodaśyāṃ yatra siddhiṃ gato yamaḥ

tasminneva naraḥ samyakchrāddhakṛtyaṃ samācaret //
ākalpaṃ pitarastasya svarge tiṣṭhaṃti pārthiva

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsa khaṃḍe tṛtīye'rbudakhaṇḍe yamatīrthamāhātmyavarṇanaṃnāmāṣṭādaśo'dhyāyaḥ