સ્કંદ પુરાણ · અધ્યાય 7.18

॥ ॥ પુલસ્ત્ય ઉવાચ ॥ ॥
તતો ગચ્છેન્નૃપશ્રેષ્ઠ યમતીર્થમનુત્તમમ્ ॥
મોચકં નરકેભ્યશ્ચ પ્રાણિનાં પાપનાશનમ્

પુરા ચિત્રાંગદો નામ રાજા પરમલોભવાન્ ॥
ન તેન સુકૃતં કિંચિત્કૃતં પાર્થિવસત્તમ

અતીવ નિષ્ઠુરો દુષ્ટો દેવબ્રાહ્મણપીડકઃ ॥
પરદારહરો નિત્યં પરવિત્તહરસ્તથા

સત્યશૌચવિહીનસ્તુ માયામત્સરસંયુતઃ ॥
સ કદાચિન્મૃગયાસક્ત આરૂઢોઽર્બુદપર્વતે

અટનાત્સ પરિશ્રાંતઃ ક્ષુત્પિપાસાસમાકુલઃ ॥
તેન તત્ર હ્રદઃ પ્રાપ્તઃ સ્વચ્છોદકપ્રપૂરિતઃ

પદ્મિનીભિઃ સમાકીર્ણો ગ્રાહનક્રઝષાકુલઃ ॥
નાનાપક્ષિસમાયુક્તો મનોહારી સુવિસ્તરઃ

તૃષાર્તઃ સંપ્રવિષ્ટઃ સ તસ્મિન્નેવ જલાશયે ॥
ગ્રાહેણ તત્ક્ષણાદ્ધૃત્વા ભક્ષિતો નૃપસત્તમ

તસ્યાર્થે નરકા રૌદ્રા નિર્મિતાશ્ચ યમેન ચ ॥
યમદૂતૈસ્તતઃ ક્ષિપ્તઃ સ નીત્વા પાપકૃત્તમઃ

તસ્ય સ્પર્શેન તે સર્વે નરકસ્થા સુખં ગતાઃ ॥
તે દૂતા ધર્મરાજાય વૃત્તાંતં નરકો દ્ભવમ્ ॥
આચખ્યુર્વિસ્મયાવિષ્ટા નરકસ્થાનાં સુખોદ્ભવમ્

તદા વૈવસ્વતઃ પ્રાહ ભૂમાવસ્ત્યર્બુદાચલઃ ॥
તત્ર મેઽતિપ્રિયં તીર્થં યત્ર તપ્તં મયા તપઃ

તત્રાસૌ મૃત્યુમાપન્નો ભાત્યદસ્ત્વિહ કારણમ્ ॥
તૈરુક્તં સત્યમેતદ્ધિ મૃતોઽસાવર્બુદાચલે ॥
ગ્રાહેણ સ ધૃતસ્તત્ર મૃત્યું પ્રાપ્તો નૃપાધમઃ

॥
॥ યમ ઉવાચ ॥ ॥
મુચ્યતામાશુ તેનાયં નાનેયાશ્ચાપરે જનાઃ ॥
યે મૃતા મમ તીર્થે વૈ સર્વપાતકનાશને

તતસ્તૈઃ કિંકરૈર્મુક્તો યમવાક્યાન્નૃપોત્તમ ॥
ત્રિવિષ્ટપં મુદા પ્રાપ્તઃ સેવ્યમાનોઽપ્સરોગણૈઃ

યસ્તુ ભક્તિસમાયુક્તઃ સ્નાનં તત્ર સમાચરેત્ ॥
સ યાતિ પરમં સ્થાનં જરામરણવર્જિતમ્

તસ્માત્સર્વપ્રયત્નેન સ્નાનં તત્ર સમાચરેત્ ॥
ચૈત્રશુક્લત્રયોદશ્યાં યત્ર સિદ્ધિં ગતો યમઃ

તસ્મિન્નેવ નરઃ સમ્યક્છ્રાદ્ધકૃત્યં સમાચરેત્ ॥
આકલ્પં પિતરસ્તસ્ય સ્વર્ગે તિષ્ઠંતિ પાર્થિવ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસ ખંડે તૃતીયેઽર્બુદખણ્ડે યમતીર્થમાહાત્મ્યવર્ણનંનામાષ્ટાદશોઽધ્યાયઃ