Skanda Purana · Chapter 7.174
// īśvara uvāca // //
tato gacchenmahādevi kuntīśvaramanuttamam //
sāvitryāḥ pūrvabhāgasthaṃ khātamadhye vyavasthitam
kuntyā pratiṣṭhitaṃ devi kṣetre prābhāsike priye //
pāṇḍavāstu yadā pūrvaṃ prabhāsakṣetramāgatāḥ
tīrthayātrāprasaṃgena kuntyā caiva samanvitāḥ //
tasminkāle mahādevi jñātvā kṣetramanuttamam
kuntyā pratiṣṭhitaṃ liṃgaṃ sarvapāpabhayāpaham//
kārtikyāṃ tu viśeṣeṇa yastaṃ pūjayate naraḥ//
sa sarvakāmatṛptātmā rudraloke mahīyate
vācikaṃ mānasaṃ pāpaṃ karmaṇā yadupārjitam//
tatsarvaṃ naśyate devi tasya liṃgasya darśanāt
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye kuntīśvaramāhātmyavarṇanaṃnāma catuḥsaptatyuttaraśatatamo'dhyāyaḥ //
Original text: skandapurāṇam · Sanskrit Wikisource contributors · Sanskrit Wikisource · CC BY-SA 4.0