Skanda Purana · Chapter 7.173

// īśvara uvāca // //
tato gacchenmahādevi liṃgānāṃ ca catuṣṭayam //
ekasthānasthitānāṃ tu sāvitryāstatra paścime

liṃgānāṃ dvitayaṃ pūrve paścime sammukhadvayam //
kuśakeśvaranāmeti liṃgaṃ vai prathamaṃ smṛtam

gargeśvaraṃ dvitīyaṃ tu tṛtīyaṃ puṣkareśvaram //
maitreyeśvaranāmeti caturthaṃ samudāhṛtam

etāni yastu liṃgāni paśyedbhaktyā jitendriyaḥ //
sa muktaḥ pātakaiḥ sarvairgacchecchivapuraṃ mahat //

śuklapakṣe caturdaśyāṃ vaiśākhe tu viśeṣataḥ //
snānaṃ kṛtvā prayatnena brāhmaṇāṃstatra bhojayet

tebhyo dadyādyathāśaktyā kāñcanaṃ vasanāni ca //
evaṃ kṛte bhavedyātrā paripūrṇā sureśvari

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye kuśakādiliṃgacatuṣṭayamāhātmyavarṇanaṃnāma trisaptatyuttaratatamo'dhyāyaḥ