Skanda Purana · Chapter 7.172

// īśvara uvāca // //
tato gacchenmahā devi liṃgaṃ tadbharateśvaram //
tasmāduttarakoṇasthaṃ nātidūraṃ vyavasthitam

bharatonāma rājā'bhūdāgnīdhraḥ prathitaḥ kṣitau //
yasyedaṃ bhārataṃ varṣaṃ nāmnā lokeṣu gīyate

sa ca cakre tapo ghoraṃ kṣetre'sminpārvati priye //
divyaṃ varṣasahasraṃ tu pratiṣṭhāpya maheśvaram

putrakāmo naraśreṣṭhaḥ pūjayāmāsa śaṃkaram //
tatastuṣṭaḥ sa bhagavānvaraṃ dātuṃ samutsukaḥ

aṣṭau putrāndadau tasmai kanyāṃ caikāṃ yaśasvinīm //
sa tu prāpyābhilaṣitaṃ kṛtakṛtyo narādhipaḥ

bhārataṃ navadhā kṛtvā putrebhyaḥ pradadau pṛthak //
teṣāṃ nāmāṃkitānyeva tato dvīpāni jajñire

indradvīpaḥ kaseruśca tāmravarṇo gabhastimān //
nāgadvīpastathā saumyo gāndharvastvatha cāruṇaḥ

ayaṃ tu navamo dvīpaḥ kumāryā saṃjñitaḥ priye //
aṣṭau dvīpāḥ samudreṇa plāvitāśca tathāpare

grāmādideśasaṃyuktāḥ sthitāḥ sāgaramadhyagāḥ //
eka eva sthitasteṣāṃ kumāryākhyastu sāṃpratam

biṃdusaraḥ prabhṛtyeva sāgarāddakṣiṇottaram //
yojanānāṃ sahasraṃ tu ekaṃ vistīrṇa eva tu

yojanānāṃ sahasrāṇi nava dairghyaṃ prakīrtitam //
tasyaitajjṛmbhitaṃ devi bharatasya mahātmanaḥ

ṣaṭpañcāśadaśvamedhāngaṃgāmanu cakāra yaḥ//
yastriṃśadyamunāprānte bharato lokapūjitaḥ

sa ceśvaraprasādena modate divi devavat

yastatpratiṣṭhitaṃ liṃgaṃ bhārataṃ pūjayiṣyati //
sa sarvayajñadānānāṃ phalaṃ prāpayitā dhuvam

kārttikyāṃ kṛttikā yoge yastaṃ paśyati mānavaḥ //
na sa paśyati svapnepi narakaṃ ghoradāruṇam

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye bharateśvaramāhātmyavarṇanaṃnāma dvisaptatyuttaraśatatamo'dhyāyaḥ