Skanda Purana · Chapter 7.17

// pulastya uvāca // //
paṃgu tīrthaṃ tato gacchetsarvapātakanāśanam //
yatra pūrvaṃ tapastaptaṃ paṃgunā brāhmaṇena ca

paṃgunāmā dvijaḥ pūrvaṃ cyavanasyānvaye'bhavat //
aśaktaścalituṃ bhūmau paṃgubhāvānnṛpottama

gṛhakṛtyaniyukto'sāvekadā bāndhavairnṛpa //
paṃgurgaṃtuṃ na śakto'sau paraṃ duḥkhamavāptavān

athāsau taiḥ parityakto gatvārbudamathācalam //
ekaṃ saraḥ samāsādya tapastepe sudāruṇam

liṃgaṃ saṃsthāpya tatraiva pūjayāmāsa taṃ vibhum //
gandhapuṣpādinaivedyaiḥ samyakchraddhāsamanvitaḥ

śivabhaktiparo jāto vāyubhakṣo babhūva ha //
japahomarato nityaṃ paṃgunāmā dvijottamaḥ

tatastuṣṭo mahādevo brāhmaṇaṃ nṛpasattama //
paṃguṃ prati mahārāja vākyametaduvāca ha

// īśvara uvāca // //
paṃgo tuṣṭo mahādevo varaṃ varaya suvrata //
tava dāsyāmyahaṃ sarvaṃ yadyapi syātsudurlabham

// paṃguruvāca // //
nāmnā me khyātimāyātu tīrthametatsureśvara //
paṃgubhāvo'tra me yātu prasādāttava śaṃkara

tavāstu satataṃ cātra sāṃnidhyaṃ saha bhāryayā //
evamuktaḥ sa tenātha vipraṃ prati vacobravīt

// īśvara uvāca // //
nāmnā tava dvijaśreṣṭha tīrthametadbhaviṣyati //
khyātiṃ tapaḥprabhāvena tīrthaṃ yāsyati sattama

caitraśuklacaturddaśyāṃ sāṃnidhyaṃ me bhavettathā

//
// pulastya uvāca // //
snānamātreṇa vipro'sau divyarūpamavāpa ha //
tatra tasthau mahādevo gauryā saha maheśvaraḥ

tasmindine nṛpaśreṣṭha snānaṃ tatra samācaret //
sa paṃgutvādvinirmukto divyarūpamavāpnuyāt

iti śrīskānde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe paṃgutīrthamāhātmyavarṇanaṃnāma saptadaśo'dhyāyaḥ