Skanda Purana · Verses 7.16-3

// īśvara uvāca // //
pātālavivarasyāpi māhātmyaṃ śṛṇu sāṃpratam //
pūrvapṛṣṭaṃ mahādevi brahmaṇā viśvakarmaṇā

tamobhāve samutpanne jātāstatraiva rākṣasāḥ //
sūryasya dveṣiṇaḥ sarve hyasaṃkhyātā mahābalāḥ //

te tu dṛṣṭvā mahātmānaṃ samudyaṃtaṃ divākaram //
te dhūmrapramukhāḥ sarve jahasuḥ sūryamaṃjasā

asmākamaṃtakaḥ ko'yaṃ vidyate pāpakarmakṛt//
ityūcurvividhā vācaḥ sūryasyāgre sthitāstadā

iti śrutvā tadā devaḥ krodhasphuritādharaḥ//
rākṣasānāṃ vacaścaiva bhakṣyamāṇo divākaraḥ

tataḥ krodhābhibhūtena cakṣuṣā cāvalokayat//
sa krūrarakṣaḥkṣayakṛttimiradvipakesarī

mahāṃśumānkhagaḥ sūryastadvināśamaciṃtayat//
ajānannaṃtataśchidraṃ rākṣasānāṃ divaspatiḥ

sa dharmavicyutāndṛṣṭvā pāpopahatacetasaḥ//
evaṃ saṃciṃtya bhagavāndadhyau dhyānaṃ prabhākaraḥ//८/
ajānaṃstejasā grastaṃ trailokyaṃ rajanīcaraiḥ //
tataste bhānunā dṛṣṭāḥ krodhādhmātena cakṣuṣā

nipeturaṃbarabhraṣṭāḥ kṣīṇapuṇyā iva grahāḥ //
rākṣasairveṣṭito dhūmro nipatañchuśubheṃ'barāt

arddhapakvaṃ yathā tālaphalaṃ kapibhirāvṛtam //
yadṛcchayā nipetuste yaṃtramuktā yathopalāḥ

tato vāyu vaśādbhraṣṭā bhittvā bhūmiṃ rasātalam//
jagmuste kṣetramāsādya prabhāsaṃ varavarṇini

yatra cārkasthalo devaḥ sarvasiddhipradāyakaḥ //
tatsānnidhyasthitaṃ devi pātālavivaraṃ mahat

anyāni koṭiśaḥ saṃti tāni luptāni bhāmini //
kṛtasmarātsamārabhya yāvadarkasthalo raviḥ

devamāturvaraṃ prāpya siddhayo'ṣṭau vyavasthitāḥ //
etasminnaṃtare devi sūryakṣetramudāhṛtam

sūryasya tejaso devi madhyabhāgaṃ hi tatsmṛtam //
sarvaṃ hemamayaṃ devi nāpuṇyastatra vīkṣate

vivarāṇāṃ śataṃ caikaṃ sparśāścaiva tu koṭiśaḥ //
tatra saṃti mahādevi siddheśastu prarakṣati

idaṃ kṣetraṃ mahādevi priyaṃ sūryasya sarvadā //
sūryaparvaṇisaṃprāpte kurukṣetrādhikaṃ priye

brāhmī caiva hiraṇyā ca saṃgamaśca mahodadheḥ //
etattrisaṃgamaṃ devi koṭitīrtha phalapradam

devamātā ca tatraiva maṃkīśastatra tiṣṭhati //
nāgasthānaṃ nagasthānaṃ tatraiva samudāhṛtam /१ 7.1.16.२० //
iti saṃkṣepataḥ proktamarkasthalama- hodayam //
rākṣasānāṃ ca saṃpātādabhūcca vivaraṃ yathā

anyāni tatra deveśi luptāni vivarāṇi vai //
evaṃ tu prakaṭaṃ tatra dṛśyate'dyāpi bhāmini

śrīmukhaṃ nāma taddvāraṃ rakṣyate mātṛbhiḥ priye //
varṣamekaṃ caturddaśyāṃ niyamādyastu pūjayet

tatra mātṛgaṇāndevi sunaṃdādyānvidhānataḥ//
paśupuṣpopahāraiśca dhūpadīpaistathottamaiḥ //
viprāṇāṃ bhojanairdevi tasya siddhirbhaviṣyati

tasmātsarvaprayatnena tatrārkasthalasaṃnidhau //
pūjayenmātaraḥ sarvā yadīcchetsiddhimātmanaḥ

etāstu mātaro devi sunaṃdāgaṇanāmataḥ //
khyātiṃ yāṃti prabhāse tu kṣetresminvaravarṇini

etatsaṃkṣepataḥ proktaṃ pātālottaramadhyataḥ //
tacchrutvā mucyate devi sarvāpadbhyo narottamaḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye arkasthalamāhātmye pātālavivarasunaṃdādimātṛgaṇotpattivarṇanaṃnāma ṣoḍaśo'dhyāyaḥ //