Skanda Purana · Verses 7.16-2

prahlāda uvāca//
tato gaccheddvijaśreṣṭhā gadātīrthamanuttamam//
yatra snātvā naro bhaktyā labhedbhūdānajaṃ phalam

tarpayetpitṛdevāṃśca ṛṣīṃścaiva yathākramam //
śrāddhaṃ ca kārayettatra pitṝṇāṃ tṛptihetave

gadātīrthe tu deveśaṃ viṣṇuṃ vārāharūpiṇam //
samabhyarcya naro bhaktyā viṣṇuloke mahīyate

nāgatīrthaṃ tato gacchetsaraḥ paramaśo bhanam//
yatra snātvā naraḥ samyaṅnāgalokamavāpnuyāt

bhadratīrthaṃ tato gacchetsarastribhuvanārcitam //
snānamātreṇa labhate tiladhenuphalaṃ naraḥ //

citrātīrthaṃ tato gacchetsaraḥ paramaśobhanam //
snānamātreṇa labhate ghṛtadhenuphalaṃ naraḥ

yadā dvārāvatī viprā plāvitā sāgareṇa hi //
puṇyāni bahutīrthāni cchannāni jalapāṃsubhiḥ

dṛśyāni katicitsaṃti hyadṛśyānyaparāṇi ca //
tāni sarvāṇi viprendrāḥ kathayiṣyāmi sarvataḥ

caṃdrabhāgāṃ tato gacchetsarvapāpapraṇāśinīm //
yatra snātvā naro bhaktyā vājapeyaphalaṃ labhet

devī caṃdrārcitā yatra yaśodā naṃdanaṃdinī //
kaumārikā śaktihastā khaṅgakheṭakadhāriṇī

keśyādidaityadalinī svasā vai rāmakṛṣṇayoḥ //
yasyā darśanamātreṇa sarvānkāmānavāpnuyāt

tato gaccheta viprendrāstīrthaṃ mahiṣasaṃjñakam //
yasya darśanamātreṇa mucyate sarvapātakaiḥ

muktidvāraṃ tato gacchettīrthaṃ pāpa praṇāśanam

vasiṣṭhena samānītā muninā yatra gomatī //
snāto bhavati gaṃgāyāṃ yatra snātvā kalau yuge

gomatī niḥsṛtā yasmā tpraviṣṭā varuṇālayam //
tatra snātvā naro bhaktyā aśvamedhaphalaṃ labhet

bhṛguṇā hi tapastaptaṃ sthāpitā yatra cāṃbikā //
bhṛgvarcitā tato devī prasiddhā śrūyate kṣitau

saṃsiddhiṃ paramāṃ yāti yasyāḥ saṃsmaraṇānnaraḥ //
śivaliṃgānyanekāni yatra santi mahītale

tato gaccheta viprendrāḥ kālindīsara uttamam//
kālindī sūryatanayā saraścakre tvanuttamam

tatra snātvā naro bhaktyā na durgatimavāpnuyāt //
sāṃbatīrthaṃ tato gacchetsarvapāpapraṇāśanam

kṛtvā śrāddhaṃ ca vidhivallabhedgodānajaṃ phalam

gacchecca śāṃkaraṃ tīrthaṃ tatastrailokyapāvanam //
yatra snātvā naro bhaktyā labhedbahusuvarṇakam

tato nāgasaro gacchettīrthaṃ pāpapraṇāśanam //
pitṝnsantarpya vidhivannāgalokamavāpnuyāt

lakṣmīṃ nadīṃ tato gacchedgacchantīṃ sāgaraṃ prati //
yasyā darśanamātreṇa mucyate sarvapātakaiḥ

śrāddhe kṛte tu viprendrāḥ pitaro muktimāpnuyuḥ //
dāne manorathāvāptirjāyate nātra saṃśayaḥ

kaṃbusarastato gacchettīrthaṃ pāpapraṇāśanam//
tarpaṇe ca kṛte śrāddhe hyagniṣṭomaphalaṃ labhet

kuśatīrthaṃ tato gacchetsnātvā santarpayetpitṝn//
dānaṃ dattvā yathāśaktyā nirmalaṃ lokamāpnuyāt

dyumnatīrthaṃ ca tatraiva sarvapāpapraṇāśanam//
kṛtvā śrāddhaṃ ca tatraiva vājimedhaphalaṃ labhet

kuśatīrthaṃ tato gacchetpitṝṇāṃ tṛptirakṣayā //
yatra śrāddhāttarpaṇācca jāyate nātra saṃśayaḥ //

jālatīrthaṃ tato gacchetsarvapāpaharaṃ śubham //
durvāsasā yatra śaptāḥ kopādyadukumārakāḥ

devo jāleśvarastatra saṃ babhūva umāpatiḥ //
jāleśvaraṃ naro dṛṣṭvā sadyaḥ pāpātpramucyate

saṃpūjya devaṃ bhaktyā ca śivalokamavāpnuyāt

cakrasvāmisutīrthaṃ ca tato gaccheddhi mānavaḥ //
kṛtvā snānaṃ pitṝṃstarpya viṣṇulokamavāpnuyāt

jaratkārukṛtaṃ tīrthaṃ sarvapāpapraṇāśanam //
snātvā tatra dvijaśreṣṭhā na durgatimavāpnuyāt

tato gaccheddvijaśreṣṭhāstīrthaṃ khañjanakābhidham //
āsītkhañjanako nāma daityaścātibalānvitaḥ

tataḥ khañjanakaṃ tīrthaṃ tasya nāmneti viśrutam //
tatra snātvā naro yāti somalokaṃ na saṃśayaḥ

santi tīrthānyanekāni suguptāni dvijottamāḥ //
tāni gacchettu viprendrāḥ sarvapāpāpanuttaye

tato gaccheddvijaśreṣṭhāstīrthamānakadundubheḥ //
śūratīrthaṃ paramakaṃ gadatīrthamataḥ param

gāvalgaṇasya tīrthaṃ ca akrūrasya mahātmanaḥ //
baladevasya tīrthaṃ tu ugrasenasya cāparam

arjunasya ca tīrthaṃ tu subhadrātīrthameva ca //
devakītīrthamādyaṃ tu rohiṇītīrthameva ca

uddhavasya ca tīrthaṃ tu sāraṃgākhyaṃ tathaiva ca //
satyabhāmākṛtaṃ tīrthaṃ bhadrātīrthamataḥ param

jāmadagnyasya tīrthaṃ tu rāmasya ca mahātmanaḥ //
bhāsatīrthaṃ ca tatraiva śukatīrthamataḥ param

kardamasya ca tīrthaṃ tu kapilasya mahātmanaḥ //
somatīrthaṃ ca tatraiva rohiṇītīrthameva ca

etānyanyāni saṃkṣepānmayā vaḥ kathitāni ca //
sarvapāpaharāṇīha mokṣadāni na saṃśayaḥ

pracchannāni dvijavarāstīrthāni kalisaṃkrame //
plāvitāni samudreṇa pāṃsunā'pyudakena ca

etanmayā vaḥ kathitaṃ saṃkṣepāttīrthavistaram //
ātmaprajñānumānena kimanyacchrotumicchatha

śṛṇuyātparayā bhaktyā tīrthayātrāmimāṃ dvijāḥ //
sarvapāpavinirmukto viṣṇulokaṃ sa gacchati

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe caturthe dvārakā māhātmye tīrthavṛndamāhātmyavarṇanaṃnāma ṣoḍaśo'dhyāyaḥ