Skanda Purana · Chapter 7.16

// pulastya uvāca // //
tato gacchennṛpaśreṣṭha tīrthaṃ pāpapraṇāśanam//
maṇikarṇikasaṃjñaṃ tu sarvalokeṣu viśrutam

yatra siddhiṃ gatā rājanvālakhilyā maharṣayaḥ//
taistatra nirmitaṃ kuṇḍaṃ suramyaṃ giri gahvare

teṣāṃ tatropaviṣṭānāṃ munīnāṃ bhāvitātmanām //
mahāścaryamabhūttatra tattvaṃ śṛṇu narādhipa

kirātavanitā kācinnāmnā ca maṇikarṇikā //
atikṛṣṇā virūpākṣī karālā bhīṣaṇākṛtiḥ

tṛṣārttā tatra saṃprāptā madhyaṃdinagate ravau //
graste ca rāhuṇā sūrye praviṣṭā salile tu sā

etasminneva kāle tu divyarūpavapurdharā //
munīnāṃ paśyatāṃ caiva viniṣkrāṃtā sumadhyamā

atha tasyāḥ patiḥ prāptastadanveṣaṇatatparaḥ //
papraccha tāṃ varārohāṃ patnyā duḥkhena duḥkhitaḥ

mama bhāryātra saṃprāptā yadi dṛṣṭā sumadhyame //
śīghraṃ vada varārohe bālako'yaṃ tadudbhavaḥ

tṛṣārttaśca kṣudhāviṣṭo rudate ca muhurmuhuḥ //
dṛṣṭā cetkathyatāṃ subhrūrvinā'yaṃ tāṃ mariṣyati

// stryuvāca // //
sā'haṃ te dayitā kānta tīrthasyāsya prabhāvataḥ //
divyarūpamidaṃ prāptā devairapi sudurlabham

tvaṃ cāpi salile hyasminkuru snānaṃ tvarānvitaḥ //
prāpsyasi tvaṃ paraṃ rūpaṃ yathā prāptaṃ mayā'nagha

athāsau saha putreṇa praviṣṭastatra nirjhare //
vimukte bhāskare rājanvirūpaścābhavatpunaḥ

duḥkhena mṛtyumāpannastasminneva jalāśaye //
atha sā bhartṛśokācca maraṇe kṛtaniścayā

citiṃ kṛtvā samaṃ tena jvālayāmāsa pāvakam //
atha te munayo dṛṣṭvā tathāśīlāṃ śubhāṃganām

kṛpayā parayāviṣṭāstāmūcurvismayānvitāḥ //
sarve tasyāśca saṃdṛṣṭvā sāhasaṃ ca nṛpottama

// ṛṣaya ūcuḥ // //
divyarūpaṃ tvayā prāptaṃ devairapi sudurlabham //
kasmādenaṃ supāpmānamanugacchasi bhāmini

// stryuvāca // //
pativratāhaṃ viprendrāḥ sadā bhartṛparāyaṇā //
kiṃ rūpeṇa kariṣyāmi vinā patyā nijena ca

virūpo vā surūpo vā daridro vā dhanādhipaḥ //
strīṇāmekaḥ patirbharttā gatirnānyā jagattraye

bālako'yaṃ muniśreṣṭhā bhavaccharaṇamāgataḥ //
ahaṃ kāntena saṃyuktā praviśāmi hutāśanam

// pulastya uvāca // //
atha te munayaḥ sarve jñātvā tasyāḥ suniścayam //
kṛpayā parayāviṣṭāḥ saṃvīkṣya ca parasparam

tato jīvāpayāmāsustatpatiṃ te munīśvarāḥ //
sadrūpeṇa samāyuktaṃ divya lakṣaṇalakṣitam

etasminneva kālaṃ tu vimānaṃ manasepsitam //
devakanyāsamākīrṇaṃ sadyastatra samāgatam

atha tau daṃpatī teṣāṃ munīnāṃ bhāvitātmanām //
purataḥ praṇipatyātha prasthitau tridivaṃ prati

atha tairmunibhiḥ proktā sā nārī maṇikarṇikā //
varaṃ varaya kalyāṇi sarve tuṣṭā vayaṃ tava

pativratatvena tuṣṭāḥ satyena ca viśeṣataḥ //
nāsmākaṃ darśanaṃ vyarthaṃ jāyate ca kathaṃcana

// maṇikarṇikovāca // //
yadi māṃ munayastuṣṭāḥ prayacchatha varaṃ mudā //
yadatrāsti mahāliṃgaṃ mannāmnā tadbhaviṣyati

etadeva mamābhīṣṭaṃ nānyadasti prayojanam//
sarveṣāṃ ca prasādena svargaṃ gacchāmi sāṃpratam

// ṛṣaya ūcuḥ // //
evaṃ bhavatu te khyātistīrthaliṃge varānane //
tava nāmānvitaṃ jātaṃ tīrthaṃ vai maṇikarṇikā

// pulastya uvāca // //
bhartrā saha divaṃ prāptā putreṇaiva samanvitā //
vālakhilyāstaponiṣṭhā viśeṣāttatra saṃsthitāḥ

tatra sūryagrahe prāpte snānadānādikāḥ kriyāḥ //
yaḥ karoti phalaṃ tasya kurukṣetra samaṃ bhavet

yaṃ yaṃ kāmamabhidhyāya snānaṃ tatra karoti yaḥ //
taṃ taṃ prāpnoti rājendra samyagdhyānasamanvitaḥ

tasmātsarvaprayatnena snānaṃ tatra samācaret //
tīrthe dānaṃ yathāśaktyā devarṣipitṛtarpaṇam

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe tṛtīye'rbudakhaṇḍe maṇikarṇikeśvaramāhātmyavarṇanaṃnāma ṣoḍaśo'dhyāyaḥ