Skanda Purana · Chapter 7.159

// īśvara uvāca // //
tato gacchenmahādevi ratnakuṇḍamanuttamam //
ratneśāddakṣiṇe bhāge dhanuṣāṃ saptake sthitam //
mahāpāpopaśamanaṃ viṣṇunā nirmitaṃ svayam

aṣṭakoṭīstu tīrthāni bhūdyo'ntarikṣagāṇi tu //
samānīya tu kṛṣṇena tatra kṣiptāni bhūriśaḥ

gaṇānāṃ koṭirekā tu tatkuṇḍaṃ rakṣati priye //
kalau yuge tu saṃprāpte duṣprāpyamakṛtātmabhiḥ

tatra snātvā mahādevi vidhidṛṣṭena karmaṇā //
prāpnuyādaśvamedhasya phalaṃ śataguṇottaram

ekādaśyāṃ viśeṣeṇa piṃḍaṃ tatra pradāpayet //
akṣayyāṃ tṛptimāyāṃti pitarastasya bhāmini

kuryājjāgaraṇaṃ tatra ekādaśyāṃ vidhānataḥ //
vāñchitaṃ labhate devi yadi śraddhā dṛḍhā bhavet

deyāni pītavastrāṇi tathā dhenuḥ payasvinī //
tatra viṣṇuṃ samuddiśya samyagyātrāphalāptaye

hemakuṇḍaṃ kṛte proktaṃ tretāyāṃ raupyanāmakam //
dvāpare cakrakuṃḍaṃ tu ratnakuṃḍaṃ kalau smṛtam

pātālavāhinīgaṃgā srotāṃsi tatra bhūriśaḥ //
samānītāni hariṇā tatra tiṣṭhaṃti bhāmini

tatra snānena deveśi sarvatīrthābhiṣecanam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye ratneśvaramāhātmyavarṇanaṃ- nāmaikonaṣaṣṭyuttaraśatatamo'dhyāyaḥ