Skanda Purana · Chapter 7.153

// īśvara uvāca // //
tato gacchenmahādevi hiraṇyeśvaramuttamam //
brahmakuṇḍasya vāyavye dhanuṣāṃ dvitaye sthitam

sarvapāpapraśamanaṃ dāridryaughavināśanam //
kṛtasmarācca parato hyagnitīrthācca pūrvataḥ

yameśvarācca nairṛtye samudrasyottare tathā //
tasya liṃgasya prāgbhāge brahmā tepe mahattapaḥ //
ārādhayāmāsa tadā devadevaṃ trilocanam

tatastuṣṭo mahādevo brahmanbrūhi varo mama

// brahmovāca // //
yadi tuṣṭo'si me deva yāja yāmīti me matiḥ //
sthānaṃ ca yanmahāpuṇyaṃ tanmamākhyātumarhasi

// īśvara uvāca // //
kṛtasmarādbrahmakuṃḍaṃ yameśātsāgarāvadhi //
etadaṃtaramāsādya pāpī cāpi vimucyate

vahedviṣuvatī tatra sadā puṇyātmanāṃ nṛṇām //
yatra tatra kuru vibho manasā te yathepsitam

ityuktaḥ sa tadā brahmā prārebhe yajñamuttamam

tato bhāgārthino devā indrādyāstatra cāgatāḥ//
ṛṣayo bhāgakāmāstu sarve tatra samāgatāḥ

tato yajñāgatebhyaḥ sa dakṣiṇāmadadātpunaḥ //
tato'tha dakṣiṇā kṣīṇā dīyamānā yaśasvini

tatobrahmā bahūdvigno dadhyau vai manasā tadā //
baddhāñjalipuṭo bhūtvā idaṃ vacanamabravīt

bhagavanvai virūpākṣa kraturnaiva samāpyate //
dakṣiṇāhai(dai?)nyato deva na yāti paripūrṇatām

dakṣiṇāsahitāḥ sarve yathā yāṃti tathā kuru //
pitāmahavacaḥ śrutvā kṛtvā dhyānaṃ tadā mayā

smṛtā sarasvatī devī devānāṃ hitakāmyayā //
āgatā sā mahāpuṇyā uktā devī mayā tadā

padmayonerdhanaṃ kṣīṇaṃ kraturvai na samāpyate //
tasmānmama prasādena bhava kāñcanavāhinī

sarasvatyāstataḥ srota utthitaṃ paścimāmukham //
kāñcanānāṃ tu padmāni ucchritāni sahasraśaḥ

kāñcanena pravāheṇa toyaṃ sārasvataṃ śubham //
daityasūdanamāsādya agnitīrthāvadhi priye //
pūrayāmāsa padmaiśca koṭiśaśca samaṃtataḥ

kāñcanāni tu tānyeva dattvā vipreṣu dakṣiṇām //
yajñaṃ nirvartayāmāsa hṛṣṭo brahmā dvijaiḥ saha

śeṣāṇi yāni padmāni tāni niḥkṣipya bhūtale //
tadūrdhvaṃ sthāpayāmāsa ligaṃ tu kanake śvaram

tatra liṃgaṃ pratiṣṭhāpya sarvadevanamaskṛtam //
ṛṣibhyo dakṣiṇāṃ prādādekaikasya yathākramam //
kāñcanānāṃ ca padmānāṃ pratyekamayutaṃ dadau

tataḥ śeṣāṇi padmāni nihitāni dharātale //
brahmakuṇḍasya madhye tu nāpuṇyo labhate naraḥ

tatkuṇḍatoyamadyāpi nānāvarṇaṃ pradṛśyate //
tatrādhaḥ padmasaṃyogānnīraṃ svarṇāyate kṣaṇāt

hiraṇmayāni padmāni adhaḥ kṛtvā prajāpatiḥ //
liṃgamūrdhvaṃ pratiṣṭhāpya svayaṃ pūjitavāṃstadā //
hiraṇyakamalairdivyairhiraṇyeśastato'bhavat

sarvapāpapraśamanaṃ tathā dāridryanāśanam //
dṛṣṭvā hiraṇmayeśānaṃ sarvapāpaiḥ pramucyate

māgha māse caturdaśyāṃ yastalliṃgaṃ prapūjayet //
pūjitaṃ tena sakalaṃ brahmāṇḍaṃ sacarācaram

sarvadānāni dattāni sarve devāśca toṣitāḥ //
brahmāṇḍaṃ tena dattaṃ syādyena talliṃgamarcitam

etanmayā te kathitaṃ snehena varavarṇini //
na kasyacinmayā''khyātaṃ mahāgopyaṃ varānane / २७ //
ya idaṃ śṛyuyādbhaktyā paṭhedvā bhaktisaṃyutaḥ //
sa gaccheddevalokaṃ tu muktaḥ sarvaistu pātakaiḥ

iti te cātivikhyātāḥ pavitrāḥ pañca bhairavāḥ //
brahmakuṇḍasamīpasthāḥ kathitāstava sundari

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe prathame prabhāsakṣetramāhātmye brahmakuṇḍamāhātmye hiraṇyeśvaramāhātmyavarṇanaṃnāma tripañcāśaduttaraśatatamo'dhyāyaḥ