Skanda Purana · Chapter 7.154

// īśvara uvāca // //
tato gacchenmahādevi liṃgaṃ pāpavimocanam //
hiraṇyeśvaravāyavye dhanuṣāṃ tritaye sthitam

pāpaghnaṃ sarvajaṃtūnāṃ darśanātsparśanādapi //
ādyaṃ liṃgaṃ mahādevi gāyatryā saṃpratiṣṭhitam

talliṃgaṃ samanuprāpya gāyatrīṃ japate tu yaḥ //
brāhmaṇastu śucirbhūtvā mucyate duṣpratigrahāt

jyeṣṭhasya pūrṇimāyāṃ tu daṃpatī yastu bhojayet //
paridhāpya yathāśaktyā daurbhāgyairmucyate naraḥ

gaṃdhapuṣpopahāraiśca paurṇamāsyāṃ tu yo'rcayet //
brāhmaṇyaṃ jāyate tasya sapta janmāni suṃdari

ityevaṃ kathitaṃ devi māhātmyaṃ pāpanāśanam //
brahmakuṇḍaprasādena sārātsārataraṃ priye

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye brahmakuṇḍamāhātmye gāyatrīśvaramāhātmyavarṇanaṃnāma catuḥpañcāśaduttaraśatatamo'dhyāyaḥ