Skanda Purana · Chapter 7.152

// // īśvara uvāca // //
tṛtīyo bhairavaḥ proktaścaturthaṃ bhairavaṃ śṛṇu //
brahmeśātpaścime bhāge dhanuṣāṃ tritaye sthitam

sarvapāpapraśamanaṃ sarva kāmapradaṃ nṛṇām //
nāradeśvaranāmānaṃ sthāpitaṃ nāradena vai

brahmaloke sthitaḥ pūrvaṃ nārado bhagavānṛṣiḥ //
tatra dṛṣṭvā mahāvīṇāṃ divyāṃ taṃtryayutai ryutām

sarasvatyā vinirmuktāṃ brahmaloke mahāprabhām //
tenāsau kautukāviṣṭo vādayāmāsa tāṃ tadā

taṃtrībhyo vādyamānābhyo brāhmaṇāḥ patitā bhuvi //
sapta svarāste vikhyātā mūrcchitāḥ ṣaḍjakādayaḥ

tāndṛṣṭvā vismayāviṣṭo muktvā vīṇāṃ prayatnataḥ //
papraccha devaṃ brahmāṇaṃ kimidaṃ kautukaṃ vibho

vādyamānāsu tantrīṣu patitā brāhmaṇā bhuvi //
ka ete brāhmaṇā deva kiṃ mṛtā iva śerate

// brahmovāca // //
ete svarā mahābhāga mūrcchitāḥ patitā bhuvi //
ajñānavādanenaiva pāpaṃ jātaṃ tavādhunā

saptabrāhmaṇavidhvaṃsapātakaṃ te samā gatam //
tasmācchīghraṃ vraja mune prabhāsaṃ kṣetramuttamam

samārādhaya deveśaṃ sarvapāpaviśuddhaye //
ityukto nāradastatra saṃtapya ca muhurmuhuḥ

kṛtvā viṣādaṃ bahuśaḥ prabhāsaṃ kṣetramāgataḥ //
tatraiva brahmakuṇḍaṃ tu samāsādya prayatnataḥ

bhairavaṃ pūjayāmāsa divyābdānāṃ śataṃ priye //
tato niṣkalmaṣo bhūtvā gītajñaścābhavattathā

tataḥ prabhṛti talliṃgaṃ nāradeśvarabhairavam //
khyātaṃ loke mahādevi sarvapātakanāśanam

ajñānādvādayedyastu vīṇāṃ caiva tathā svarān //
sa tatpātakaśuddhyarthaṃ tatra gacchenmaheśvari

māghe māsi jitāhārastrikālaṃ yo'rcayettataḥ //
nāradeśaṃ bhairavaṃ sa svargarāmāmanoharaḥ

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetra māhātmye brahmakuṇḍamāhātmye nāradeśvarabhairavamāhātmyavarṇanaṃnāma dvipaṃcāśaduttaraśatatamo'dhyāyaḥ