સ્કંદ પુરાણ · અધ્યાય 7.152

॥ ॥ ઈશ્વર ઉવાચ ॥ ॥
તૃતીયો ભૈરવઃ પ્રોક્તશ્ચતુર્થં ભૈરવં શૃણુ ॥
બ્રહ્મેશાત્પશ્ચિમે ભાગે ધનુષાં ત્રિતયે સ્થિતમ્

સર્વપાપપ્રશમનં સર્વ કામપ્રદં નૃણામ્ ॥
નારદેશ્વરનામાનં સ્થાપિતં નારદેન વૈ

બ્રહ્મલોકે સ્થિતઃ પૂર્વં નારદો ભગવાનૃષિઃ ॥
તત્ર દૃષ્ટ્વા મહાવીણાં દિવ્યાં તંત્ર્યયુતૈ ર્યુતામ્

સરસ્વત્યા વિનિર્મુક્તાં બ્રહ્મલોકે મહાપ્રભામ્ ॥
તેનાસૌ કૌતુકાવિષ્ટો વાદયામાસ તાં તદા

તંત્રીભ્યો વાદ્યમાનાભ્યો બ્રાહ્મણાઃ પતિતા ભુવિ ॥
સપ્ત સ્વરાસ્તે વિખ્યાતા મૂર્ચ્છિતાઃ ષડ્જકાદયઃ

તાન્દૃષ્ટ્વા વિસ્મયાવિષ્ટો મુક્ત્વા વીણાં પ્રયત્નતઃ ॥
પપ્રચ્છ દેવં બ્રહ્માણં કિમિદં કૌતુકં વિભો

વાદ્યમાનાસુ તન્ત્રીષુ પતિતા બ્રાહ્મણા ભુવિ ॥
ક એતે બ્રાહ્મણા દેવ કિં મૃતા ઇવ શેરતે

॥ બ્રહ્મોવાચ ॥ ॥
એતે સ્વરા મહાભાગ મૂર્ચ્છિતાઃ પતિતા ભુવિ ॥
અજ્ઞાનવાદનેનૈવ પાપં જાતં તવાધુના

સપ્તબ્રાહ્મણવિધ્વંસપાતકં તે સમા ગતમ્ ॥
તસ્માચ્છીઘ્રં વ્રજ મુને પ્રભાસં ક્ષેત્રમુત્તમમ્

સમારાધય દેવેશં સર્વપાપવિશુદ્ધયે ॥
ઇત્યુક્તો નારદસ્તત્ર સંતપ્ય ચ મુહુર્મુહુઃ

કૃત્વા વિષાદં બહુશઃ પ્રભાસં ક્ષેત્રમાગતઃ ॥
તત્રૈવ બ્રહ્મકુણ્ડં તુ સમાસાદ્ય પ્રયત્નતઃ

ભૈરવં પૂજયામાસ દિવ્યાબ્દાનાં શતં પ્રિયે ॥
તતો નિષ્કલ્મષો ભૂત્વા ગીતજ્ઞશ્ચાભવત્તથા

તતઃ પ્રભૃતિ તલ્લિંગં નારદેશ્વરભૈરવમ્ ॥
ખ્યાતં લોકે મહાદેવિ સર્વપાતકનાશનમ્

અજ્ઞાનાદ્વાદયેદ્યસ્તુ વીણાં ચૈવ તથા સ્વરાન્ ॥
સ તત્પાતકશુદ્ધ્યર્થં તત્ર ગચ્છેન્મહેશ્વરિ

માઘે માસિ જિતાહારસ્ત્રિકાલં યોઽર્ચયેત્તતઃ ॥
નારદેશં ભૈરવં સ સ્વર્ગરામામનોહરઃ

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્ર માહાત્મ્યે બ્રહ્મકુણ્ડમાહાત્મ્યે નારદેશ્વરભૈરવમાહાત્મ્યવર્ણનંનામ દ્વિપંચાશદુત્તરશતતમોઽધ્યાયઃ