Skanda Purana · Chapter 7.15

// pulastya uvāca // //
tataḥ śukreśvaraṃ gacchecchukreṇa sthāpitaṃ purā //
yaṃ dṛṣṭvā mānavaḥ sadyaḥ sarvapāpaiḥ pramucyate

dṛṣṭvā daityānpurā devairnirjitānnṛpasattama //
cintayāmāsa medhāvī bhārgavastānprati dvijaḥ

kathaṃ daityāḥ surāñjitvā prāpsyaṃti ca mahāyaśaḥ //
ārādhya śaṃkaraṃ siddhiṃ gacchāmi manasepsitam

evaṃ sa niścayaṃ kṛtvā gato'rbudamathācalam //
bhūme vivaramāsādya tapastepe sudāruṇam

śivaliṃgaṃ pratiṣṭhāpya dhūpagaṃdhānulepanaiḥ //
aniśaṃ pūjayāmāsa śraddhayā parayānvitaḥ

tato varṣasahasrāṃte tutoṣa bhagavāñchivaḥ //
tasya saṃdarśanaṃ dattvā vākyametaduvāca ha

// śrīmahādeva uvāca // //
parituṣṭo'smi te vipra bhaktyā tava dvijottama //
varaṃ varaya bhadraṃ te yadyapi syātsudurlabham

// śukra uvāca // //
yadi tuṣṭo mahādeva vidyāṃ dehi maheśvara //
yayā jīvaṃti saṃprāptā mṛtyuṃ saṃkhyepi jaṃtavaḥ

// pulastya uvāca // //
pradāya vai śivastasmai tāṃ vidyāṃ nṛpasattama //
abravīcca punaḥ śukraṃ varamanyaṃ vṛṇīṣva me

// śukra uvāca // //
etatkārtikamāsasya śuklāṣṭamyāṃ tu yaḥ spṛśet //
tato liṃgaṃ pūjayecca yaḥ pumāñchraddhayānvitaḥ

alpamṛtyubhayaṃ tasya mā bhūttava prasādataḥ //
iṣṭānkāmānavāpnotu ihaloke paratra ca

// pulastya uvāca // //
evamastviti sa procya tatraivāṃtaradhīyata //
śukropi dānavānsaṃkhye hatāndevairanekaśaḥ

vidyāyāśca prabhāvena jīvayāmāsa tānmuniḥ //
tasyāgre'sminmahākuṇḍaṃ nirmalaṃ pāpanāśanam

tatra snāto naraḥ samyakpātakaiśca pramucyate //
tatra śrāddhena rājeṃdra tuṣṭā yāṃti pitāmahāḥ

tarpitāḥ salilenaiva kiṃ punaḥ piṃḍadānataḥ //
tasmātsarvaprayatnena snānaṃ tatra samācaret

iti śrīskāṃde mahāpurāṇaekāśītisāhasryāṃ saṃhitāyāṃ saptame prabhāsa khaṇḍe tṛtīye'rbudakhaṇḍe śukreśvaramāhātmyavarṇanaṃnāma paṃcadaśo'dhyāyaḥ