Skanda Purana · Verses 7.15-2

// prahlāda uvāca / //
śrutvā tamāgataṃ devaṃ brahmāṇaṃ pitaraṃ svakam //
sanakādyā namaskarttuṃ jagmuḥ sarve pitāmaham

taṃ dṛṣṭvā lokakarttāraṃ daṇḍavatpraṇatāḥ kṣitau //
tato dṛṣṭvā sa tanayānsaṃgṛhya pariṣasvaje

pṛṣṭaścānāmayaṃ taistu pṛṣṭvā tānsamuvāca ha //
ārādhito yairbhagavāndhanyā yūyaṃ vayaṃ tathā

saṃsiddhiṃ paramāṃ yātā bhagavaddarśanena hi //
na jñātaṃ putrakāḥ samyagajñānādbālabuddhibhiḥ

yenārcito mahādevastasya tuṣyati keśavaḥ //
anarcite nīlakaṇṭhe na gṛhṇātyarcanaṃ hariḥ //
tasmātsarvaprayatnena pūjyatāṃ nīlalohitaḥ

yena saṃpūrṇatāṃ yāti kṛṣṇapūjā kṛtā sadā//
tacchrutvā vacanaṃ tasyā brahmaputrā yayustadā

devāgārāgrato gatvā yogasiddhā maharṣayaḥ//
liṃgaṃ saṃsthāpayāmāsuḥ śivabhaktipuraskṛtā

saṃsthāpya śivaliṃgaṃ te snānārthaṃ munisattamāḥ//
kūpaṃ cakrustataḥ sarva ṛṣayaḥ saṃśitavratāḥ

dṛṣṭvā tamamṛtaprakhyaṃ jalapūrṇaṃ sunirmalam //
saṃhṛṣṭā ṛṣayaḥ sarve sādhusādhviti cābruvan

sthāpitaṃ śivaliṃgaṃ ca dṛṣṭvā lokapitāmahaḥ //
uvāca vacanaṃ brahmā prītaḥ putrāṃstadā dvijāḥ

// brahmovāca // //
bhavadbhiryogasaṃsiddhairyasmātsaṃsthāpitaḥ śivaḥ //
tasmātsiddheśvara iti khyātiṃ loke gamiṣyati

samīpe śitikaṇṭhasya kūpoyamṛṣibhiḥ kṛtaḥ //
ṛṣitīrthamiti khyātaṃ tasmālloke bhaviṣyati/

vinā śrāddhena viprendrā dānena pitṛtarpaṇāt //
bhaktitaḥ snānamātreṇa pitṛbhiḥ saha mucyate

asatyavādino ye ca paranindā parāyaṇāḥ //
snānamātreṇa śudhyanti ṛṣitīrthe na saṃśayaḥ

snānaṃ praśastaṃ viṣuve manvādiṣu tathaiva ca //
tathā kṛtayugādyāyāṃ māghasya dvijasattamāḥ

śivarātrau vasedyastu liṃge siddheśasaṃjñite //
snātvā ṛṣikṛte tīrthe kiṃ tasyānyena vai dvijāḥ //
gatvā tatra mahābhāgā gṛhītvā phalamuttamam

arghyaṃ dattvā vidhānena kṛtvā ca karayoḥ kuśān //
gṛhṇaṃtvarghyamimaṃ devā yogasiddhā maharṣayaḥ

ṛṣitīrthe ca pāpaghne siddheśvarasamanvite //
dattvārghyaṃ mṛdamālabhya snānaṃ kuryātsamāhitaḥ

tarpayecca pitṝndevānmanuṣyāṃśca yathākramam //
tataḥ śrāddhaṃ prakurvīta pitṝṇāṃ śraddhayā'nvitaḥ

tathā ca dakṣiṇāṃ dadyādvittaśāṭhyavivarjitaḥ //
viśeṣataḥ pradeyāni phalāni rasavaṃti ca

dadyācchayāmākanīvārānvidrumaṃ cājināni ca //
saptadhānyāni śālīṃśca saktūṃśca guḍasaṃyutān

gaṃdhamālyāni tāṃbūlaṃ vastrāṇi ca tathā payaḥ //
evaṃ kṛtvā samagraṃ ca kṛtakṛtyo bhavennaraḥ

pūjayitvā mahādevaṃ siddheśvaramumāpatim //
saphalaṃ janma martyasya jīvitaṃ ca sujīvitam

yaḥ snātvā ṛṣitīrthe tu paśyetsiddheśvaraṃ śivam //
pitarastasya tuṣyanti tuṣyanti ca pitāmahāḥ

aputrā putriṇaḥ syuste putriṇaścāpi pautriṇaḥ //
nirdhanā dhanavaṃtaśca siddheśvararatā narāḥ

duṣkṛtaṃ yāti vilayaṃ sukṛtaṃ ca vivarddhate //
bhavenmanorathāvāptiḥ praṇate siddhanāyake

ṛṣitīrthe naraḥ snātvā dṛṣṭvā siddheśvaraṃ haram //
sarvānkāmānavāpnoti nātra kāryā vicāraṇā

śivarātryāṃ viśeṣeṇa siddheśaḥ saṃprapūjitaḥ //
yaṃyaṃ kāmayate kāmaṃ taṃ dadāti na saṃśayaḥ //
cintāmaṇisamaḥ svāmī hyathavā cākṣayo nidhiḥ

śrutvādhyāyamimaṃ puṇyaṃ sarvāghaharaṇaṃ param //
prayāti paramaṃ sthānaṃ mānavaḥ śraddhayānvitaḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe caturthe dvārakā māhātmya ṛṣitīrthasiddheśvaramāhātmyavarṇanaṃnāma pañcadaśo'dhyāyaḥ