Skanda Purana · Chapter 7.146

/ īśvara uvāca // //
tato gacchenmahādevi dharmarājapratiṣṭhitam //
yameśvaraṃ mahādevaṃ tasyai vottarataḥ sthitam

yadā śapto dharmarājaśchāyayā varavarṇini //
tadā tasyāpatatpādaḥ sa ca duḥkhānvito'bhavat

tataḥ prābhāsike kṣetre tapastepe mahātapāḥ //
sthāpayāmāsa liṃgaṃ tu tatra devasya śūlinaḥ

tasya tuṣṭo mahādevastataḥ pratyakṣatāṃ gataḥ //
abravīddharma bhadraṃ te varaṃ varaya cepsitam

tadā'bravīddharmarājaḥ pādaḥ prapatito mama //
prasādāttava deveśa jāyatāṃ punareva hi

etalliṃgaṃ suraśreṣṭha yanmayā nirmitaṃ tava //
etadye bhaktisaṃyuktāḥ paśyaṃti prāṇino bhuvi

teṣāṃ tava prasādena bhūyātpāpavimokṣaṇam

evaṃ bhaviṣyatītyuktā hyantardhānaṃ gato haraḥ //
yamo'pi labdhapādastu punareva divaṃ yayau

tasmindṛṣṭe suraśreṣṭha yamalokasamudbhavam //
na bhayaṃ vidyate nṛṇāmapi duṣkṛtakāriṇām //

bhrātṛdvitīyāsaṃyoge snātvā puṣkariṇījale //
yameśvarasamīpastho yameśamavalokayet

tilapātraṃ pradātavyaṃ dīpaṃ gāḥ kāṃcanā dikam //
yamadevaṃ samuddiśya mucyate sarvapātakaiḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye yameśvaramāhātmyavarṇanaṃnāma ṣaṭcatvāriṃśaduttaraśatatamo'dhyāyaḥ