Skanda Purana · Chapter 7.140

tato gacchenmahādevi nadīṃ citrapathāṃ tataḥ //
brahmakuṇḍasamīpasthāṃ citrādityasya madhyataḥ

yadā ca citraḥ saṃnīto yamadūtaiḥ surapriye //
saśarīro mahāprājño yamādeśaparāyaṇaiḥ

evaṃ jñātvā tu tatrasthā bhaginī tasya duḥkhitā //
citrā nadī tato bhūtvā svasā tasya mahātmanaḥ

praviṣṭā sāgare devi anveṣantī ca bāṃdhavam //
tataścitrapathānāma tasyāścakrurdvijātayaḥ

evaṃ tatra samutpannā sā nadī varavarṇini

tasyāṃ snātvā naro yastu citrādityaṃ prapaśyati //
sa yāti paramaṃ sthānaṃ yatra devo divākaraḥ

asminkaliyuge devi aṃtardhānaṃ gatā nadī //
prāvṛṭkāle ca dṛśyeta durlabhaṃ tatra darśanam

snānaṃ dānaṃ viśeṣeṇa sarvapātakanāśanam

bhukto vāpyathavā'bhukto rātrau vā yadi vā divā //
parvakāle'thavā'kāle pavitro'pyathavā'śuciḥ

yadaiva dṛśyate tatra nadī citrapathā priye //
pramāṇaṃ darśanaṃ tasyā na kālastatra kāraṇam

dṛṣṭvā nadīṃ mahādevi pitaraḥ svargasaṃsthitāḥ //
gāyaṃti tatra sāmāni nṛtyanti ca hasaṃti ca

asmākaṃ vaṃśajaḥ kaścicchrāddhamatra kariṣyati //
yāvatkalpaṃ tathā'smākaṃ prītimutpādayiṣyati

evaṃ jñātvā narastatra snānaṃ śrāddhaṃ ca kārayet //
sarvapāpavināśārthaṃ pitṝṇāṃ prītaye tathā //

ityetatkathitaṃ devi yathā citrapathā nadī //
prabhāsakṣetramāsādya saṃsthitā pāpanāśinī

iti śrīskāṃde mahāpurāṇa ekā śītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye citrapathānadīmāhātmyavarṇanaṃnāma catvāriṃśaduttaraśatatamo'dhyāyaḥ ///