Skanda Purana · Chapter 7.139

// īśvara uvāca // //
tato gacchenmahādevi citrādityamanuttamam //
tasyaiva dakṣiṇe bhāge brahmakuṇḍasamīpataḥ

mahāprabhāvo deveśi sarvadāridryanāśanaḥ //
mitro nāma purā devi dharmātmā'bhūddharātale //
kāyasthaḥ sarvabhūtānāṃ nityaṃ bhūtahite rataḥ

tasyāpatyadvayaṃ jajña ṛtukālābhigāminaḥ //
putraḥ paramatejasvī citronāma varānane

tathā citrā'bhavatkanyā rūpāḍhyā śīlamaṃḍanā

ābhyāṃ tu jātamātrābhyāṃ mitraḥ pañcatvameyivān //
atha tasya varā bhāryā saha tenāgnimāviśat

atha tau bālakau dīnāvṛṣibhiḥ paripālitau //
vṛddhiṃ gatau mahāraṇye bālāveva sthitau vrate

prabhāsaṃ kṣetramāsādya tapaḥ paramamāsthitau //
pratiṣṭhāpya mahā devaṃ bhāskaraṃ vāritaskaram

pūjayāmāsa dharmātmā dhūpamālyānulepanaiḥ //
vasiṣṭhakathitaiścaiva hyaṣṭaṣaṣṭisamanvitaiḥ //
nāmabhiḥ sūryadeveśaṃ tuṣṭāva prāñjaliḥ prabhum

// citra uvāca // //
praṇamya śirasā devaṃ bhāskaraṃ gaganādhipam //
ādidevaṃ jagannāthaṃ pāpaghnaṃ roganāśanam

/
sahasrākṣaṃ sahasrāṃśuṃ sahasrakiraṇadyutim

tamahaṃ saṃstaviṣyāmi saṃpṛktaṃ guhyanāmabhiḥ //
muṃḍīrasvāminaṃ prātargaṃgāsāgarasaṃgame //
kālapriyaṃ tu madhyāhne yamunātīramāśritam

mūlasthānaṃ cāstamane candrabhāgātaṭe sthitam//
yatra sāṃbaḥ svayaṃ siddha upavāsaparāyaṇaḥ

vārāṇasyāṃ lohitākṣaṃ gobhilākṣe bṛhanmukham //
prayāgeṣu pratiṣṭhānaṃ vṛddhādityaṃ mahādyutim

koṭyakṣe dvādaśādityaṃ gaṃgādityaṃ caturghaṭe //
naimiṣe caiva goghne ca bhadraṃ bhadrapuṭe sthitam

jayāyāṃ vijayādityaṃ prabhāse svarṇavetasam //
kurukṣetre ca sāmaṃtaṃ trimaṃtraṃ ca ilāvṛte

mahendre kramaṇādityamṛṇe siddheśvaraṃ viduḥ //
kauśāṃbyāṃ padmabodhaṃ ca brahmabāhau divākaram

kedāre caṇḍakāṃtiṃ ca nitye ca timirāpaham //
gaṃgāmārge śivadvāramādityaṃ bhūpradī pane

haṃsaṃ sarasvatītīre viśvāmitraṃ pṛthūdake //
ujjayinyāṃ naradvīpaṃ siddhāyāmamaladyutim

sūryaṃ kuntīkumāre ca pañcanadyāṃ vibhāvasum ///
mathurāyāṃ vimalādityaṃ saṃjñādityaṃ tu saṃjñike

śrīkaṇṭhe caiva mārtaṇḍaṃ daśārṇe daśakaṃ smṛtam //
godhane gopatiṃ devaṃ karṇaṃ caiva marusthale

/
puṣpaṃ devapure caiva keśavārkaṃ tu lohite //
vaidiśe caiva śārdūlaṃ śoṇe vāruṇavāsinam

vardhamāne ca sāṃbākhyaṃ kāmarūpe śubhaṃkaram //
mihiraṃ kānyakubje ca maṃdāraṃ puṇyavardhane

gandhāre kṣobhaṇādityaṃ laṃkāyāmamaradyutim //
karṇādityaṃ ca caṃpāyāṃ prabodhe śubhadarśinam

dvārā vatyāṃ tu pārvatyaṃ himavante himāpaham //
mahātejaṃ tu lauhitye amalāṃge ca dhūjaṭim

rohike tu kumārākhyaṃ padmāyāṃ padmasaṃbhavam//
dharmādityaṃ tu lāṭāyāṃ marddake sthaviraṃ viduḥ

sukhapradaṃ tu kauberyāṃ kosale gopatiṃ tathā //
kauṃkaṇe tu padmadevaṃ tāpanaṃ vindhyaparvate

tvaṣṭāraṃ caiva kāśmīre caritre ratnasaṃbhavam //
puṣkare hemagarbhasthaṃ vidyātsūryaṃ gabhastike

prakāśāyāṃ tu mujjhālaṃ tīrthagrāme prabhākaram //
kāṃpilye rillakādityaṃ dhanake dhanavāsinam

analaṃ narmadātīre sarvatra gamanādhikam//
aṣṭaṣaṣṭiṃ tu devasya bhāskarasyāmitadyuteḥ

prātarutthāya vai nityaṃ śaktimāñchucimānnaraḥ //
yaḥ paṭhecchṛṇuyādvāpi sarvapāpaiḥ pramucyate

rājyārthī labhate rājyaṃ dhanārthī labhate dhanam //
putrārthī labhate putrānsaukhyārthī labhate sukham

rogārto mucyate rogādbaddho mucyeta bandhanāt //
yānyānprārthayate kāmāṃstāṃstānprāpnoti mānavaḥ

//
// īśvara uvāca // //
evaṃ ca stuvatastasya citrasya vimalātmanaḥ //
tatastuṣṭaḥ sahasrāṃśuḥ kālena mahatā vibhuḥ

abravīdvatsa bhadraṃ te varaṃ varaya suvrata

so'bravīdyadi me tuṣṭo bhagavaṃstīkṣṇadīdhiteḥ //
prauḍhatvaṃ sarvakāryeṣu naya māṃ jñānitāṃ tathā

tattatheti prati jñātaṃ sūryeṇa varavarṇini //
tataḥ sarvajñatāṃ prāptaścitro mitrakulodbhavaḥ

taṃ jñātvā dharmarājastu buddhyā paramayā yutam//
ciṃtayāmāsa medhāvī lekha ko'yaṃ bhavedyadi

tato me sarvasiddhiḥ syānnirvṛtiśca parā bhavet //
evaṃ ciṃtayatastasya dharmarājasya bhāmini

agnitīrthe gate citre snā nārthaṃ lavaṇāmbhasi //
sa tatra praviśanneva nītastu yamakiṃkaraiḥ

saśarīro mahādevi yamādeśaparāyaṇaiḥ //
sa citraguptanāmā'bhūdviśvacāritralekhakaḥ

citrādityetināmā'bhūttato loke varānane

saptamyāṃ niyatāhāro yastaṃ pūjayate naraḥ //
sapta janmāni dāridryaṃ na duḥkhaṃ tasya jāyate

tatraiva cāśvo dātavyaḥ sakoṣaṃ khaḍgameva ca //
hiraṇyaṃ caiva viprāya evaṃ yātrāphalaṃ labhet

iti śrīskāṃde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye citrādityamāhātmyavarṇanaṃnāmaikonacatvāriṃśaduttaraśatatamo'dhyāyaḥ