Skanda Purana · Verses 7.14-3

// devyuvāca // //
yadetadbhavatā proktaṃ māhātmyaṃ sūryadaivatam//
tanme vistarato brūhi devadeva jagatpate

kathamarkasthalo bhūtaḥ prabhāsakṣetrabhūṣaṇaḥ //
pūjanīyo mahādevaḥ samyagyātrāphalepsubhiḥ

ke maṃtrāḥ kiṃ vidhānaṃ tu keṣu parvasu pūjayet//
jaigīṣavyeśvaro bhūtvā hyabhūtsiddheśvaraḥ katham //
tanme kathaya deveśa vistarātsarvameva hi

pātāle vivaraṃ tatra yoginyastatra kiṃ purā //
tathā mātṛgaṇaścaiva kathametadabhūtpurā

etatsarvamaśeṣeṇa dayāṃ kṛtvā jagatpate //
mamācakṣva virūpākṣa yadyahaṃ te priyā hara

// īśvara uvāca // //
sādhu pṛṣṭaṃ tvayā devi kathayāmi samāsataḥ //
siddheśvaro hyabhūdyena jaigīṣavyeśvaro haraḥ

pūjāvidhānaṃ vistīrya tanme nigadataḥ śṛṇu //
āsīdasminkṛte devi sarva jñānaviśāradaḥ

putraḥ śatakalākasya jaigīṣavya iti śrutaḥ //
prabhāsakṣetramāsādya sa cakre duścaraṃ tapaḥ

atiṣṭhadvāyubhakṣaśca varṣāṇāṃ śatakaṃ kila //
ambubhakṣaḥ sahasraṃ tu śākāhāro'yutaṃ tathā

cāṃdrāyaṇasahasraṃ ca kṛtaṃ sāṃtapanaṃ punaḥ //
śoṣayitvā mitāhāro digvāsāḥ samapadyata

pūrve kalpe svayaṃ bhūtaṃ mahodayamiti śrutam //
sa liṃgaṃ devadevasya pratiṣṭhāpyārcayannapi

bhasmaśāyī bhasmadigdho nṛtta gītairatoṣayat //
japena vṛṣanādaiśca tapasā bhāvitaḥ śuciḥ

tamevaṃ toṣayāṇaṃ tu bhaktyā paramayā yutam //
bhagavāṃśca tamabhyetya idaṃ vacanamabravīt

jaigīṣavya mahābuddhe paśya māṃ divyacakṣuṣā //
tuṣṭo'smi varadaścāhaṃ brūhi yatte manogatam

sa evamukto devena devaṃ dṛṣṭvā trilocanam//
praṇamya śirasā pādāvidaṃ vacanamabravīt

// jaigīṣavya uvāca // //
bhagavandevadeveśa mama tuṣṭo yadi prabho //
jñānayogaṃ hi me dehi yaḥ saṃsāranikṛntanam

bhagavannānyadicchāmi yogātparataraṃ hitam //
tvayi bhaktiśca nityaṃ me devyāṃ skande gaṇeśvare //

na ca vyādhibhayaṃ bhūyānna ca tejo'pamānatā //
anutsekaṃ tathā kṣāṃtiṃ damaṃ śamamathāpi ca

etānvarānmahādeva tvadicchāmi trilocana

// īśvara uvāca // //
ajaraścāmaraścaiva sarvaśokavivarjitaḥ //
mahāyogī mahāvīryo yogaiśvaryasamanvitaḥ

prabhāvāccāsya kṣetrasya guhyasya mama śāśvatam //
yogāṣṭaguṇamaiśvaryaṃ prāpsyase paramaṃ mahat

bhaviṣyasi muniśreṣṭha yogācāryaḥ suviśrutaḥ

yaścedaṃ tvatkṛtaṃ ligaṃ niyamenārcayiṣyati //
sarvapāpavinirmukto yogaṃ divyamavāpsyati

jaigīṣavyaguhāṃ cemāṃ prāpya yogaṃ karoti yaḥ //
sa saptarātrādyuktātmā saṃsāraṃ saṃtariṣyati

māsena pūrvajātiṃ ca janmātītaṃ ca vetsyati //
ekarātrāttanuṃ śuddhāṃ dvābhyāṃ tārayate pitṝn//
trirātreṇa vyatītena tvaparānsapta tārayet

punaśca tava viprarṣe ajeyatvaṃ ca yogibhiḥ //
icchato darśanaṃ caiva bhaviṣyati ca te mama

iti devo varāndattvā tatraivāṃtaradhīyata //
etatkṛtayuge vṛttaṃ tava devi prabhāṣitam

tretāyuge mahādevi dvāpare'pi tathaiva ca //
kaliyugapraveśe tu vālakhilyā maharṣayaḥ

asminprābhāsike kṣetre sūryasthalasamīpataḥ //
ārādhayaṃto deveśaṃ guhāmadhyanivāsinam

aṣṭāśītisahasrāṇi ṛṣayaścorddharetasaḥ //
varṣāyutaṃ tapastaptvā siddhiṃ jagmustadātmikām

tataḥ siddheśvaraṃ liṃgaṃ kalau khyātaṃ varānane //
yadā somena saṃyuktā kṛṣṇā śivacaturdaśī //
tadaiva tasya devasya darśanaṃ devi durllabham

brahmāṃḍaṃ sakalaṃ dattvā yatpuṇyamupajāyate //
tatpuṇyaṃ labhate devi siddhaliṃgasya pūjanāt

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye siddheśvarotpattivarṇanaṃnāma caturdaśo'dhyāyaḥ