Skanda Purana · Verses 7.14-2

// śrīprahrāda uvāca // //
saṃtyanekāni tīrthāni bahvāścaryakarāṇi ca //
prāpte kaliyuge ghore tāni pupluvirerṇave

uddeśato mayā viprāḥ kīrtyamānā nibodhata //
saṃkṣepato vipravarā yathā teṣāṃ ca yāḥ kriyāḥ

saṃhṛtya ca bhuvo bhāraṃ sādhū nsaṃsthāpya satpathe //
dvāravatyāmagātkṛṣṇo vṛṣṇisaṃghaiḥ samāvṛtaḥ

darśanārthaṃ tadā brahmā daivataiḥ parivāritaḥ //
varuṇo yamavitteśau sūryyācandramasau tathā

āgatya saha kṛṣṇena kāryaṃ saṃsādhya cātmanaḥ //
vedhāścakre tadā tīrthaṃ svanāmnā kīrtitaṃ bhuvi

brahmakuṇḍamiti khyātaṃ sarvapāpaharaṃ śubham //
tattīre sthāpayāmāsa sahasrakiraṇaṃ prabhum

mūlaṃ surāṇāṃ hi kila brahmā lokapitāmahaḥ //
tena saṃsthāpitaṃ yasmānmūla sthānamiti smṛtam

brahmatīrthaṃ tu taddṛṣṭvā candraścakre tataḥ saraḥ //
taḍāgaṃ candranāmnā vai sarvapāpapraṇāśanam

taṃ dṛṣṭvā tejasā yuktaṃ saṃhṛṣṭāḥ surasattamāḥ //
ūcuste lokasraṣṭāraṃ śṛṇuṣva vacanaṃ hi naḥ

yo'tra snānaṃ prakurute pitṝnsaṃtarpayiṣyati //
pūjayiṣyati deveśaṃ mūlasthānaṃ surarṣabha

sarvapāpavinirmukto dhanadhānyasamanvitaḥ //
saptamyāṃ māghamāsasya śuklapakṣe dvijarṣabhāḥ //
yo'tra snānaṃ prakurute mānavo bhaktisaṃyutaḥ

mūlasthānaṃ ca deveśa saṃsnāpya pravilepayet //
pūjayiṣyati vastrādyaiḥ svaśaktyā bhūṣaṇaistathā

puṣpadhūpādibhiścaiva naivedyena ca mānavaḥ //
sarvānkāmānavāpnoti brahmalokaṃ sa gacchati

sāvitrīṃ ca tato dṛṣṭvā brahmaṇā sthāpitāṃ ca vai //
kṛtvā cāyatanaṃ divyaṃ svāṃ mūrtiṃ sanniveśya ca //
nāma cakre tadā devyāḥ svayaṃ tasyāḥ pitāmahaḥ

yaḥ paśyati svayaṃ bhaktyā kṛṣṇaṃ dṛṣṭvā jagatpatim //
sāvitrīṃ sa sukhī bhūtvā sarvānkāmānavāpnuyāt

āyurārogyamaiśvaryyaṃ putrasantānameva ca //
na daurbhāgyaṃ bhavettasya na dāridyaṃ na mūrkhatā //
na ca vyādhibhayaṃ tasya yaḥ paśyati vidhiṃ naraḥ

gatvā saṃsnāpayeddevīṃ kuṃkumena kusuṃbhakaiḥ //
saṃchādya vastraiḥ saṃpūjya puṣpairnānāvidhai stathā

naivedyaphalatāṃbūlagrīvāsūtrakadīpakaiḥ //
saṃpūjya parayā bhaktyā yātrāṃ ca saphalā labhet

na vaidhavyaṃ na daurbhāgyaṃ na vaṃdhyā na mṛtaprajā //
vidhirdṛṣṭo narairyaistu kule teṣāṃ prajāyate

tasmātsarvaprayatnena vidhiṃ paśyetsubhāvataḥ //
parituṣṭo bhavetkṛṣṇo yātrā ca saphalā bhavet

// prahlāda uvāca // //
brahmaṇā sthāpitaṃ dṛṣṭvā saraḥ paramaśobhanam //
indraścakre mahābhāgaḥ saraḥ paramaśobhanam

sthāpayāmāsa deveśo liṃgamapratimaujasam //
tasminsnātvā ca labhate yasmādindrapadaṃ naraḥ

tasmādindrapadaṃ nāma suprasiddhaṃ dharātale //
indreṇa sthāpitaṃ liṃgaṃ yasmādbhāvanayā saha //
prasiddhamiṃdranāmnā vā indreśvaramiti smṛtam

yasya prasiddhiratulā vṛddhiliṃgamiti dvijāḥ//
yasya darśanamātreṇa mucyate sarvapātakaiḥ

pitṝṇāmakṣayā tṛptirjāyate dvijasattamāḥ //
aṣṭamyāṃ ca caturddaśyāṃ snātvā cendrapade naraḥ

indreśvaraṃ ca saṃpūjya yāti muktipadaṃ naraḥ //
viśeṣatastu saṃpūjyo makarasthe divākare

uttarāyaṇasaṃkrāṃtau liṃgapūraṇakena hi //
śivarātrau viśeṣeṇa saṃpūjya umayā saha //
rātrau jāgaraṇaṃ kṛtvā paramaṃ lokamāpnuyāt

// prahlāda uvāca// //
brahmatīrthaṃ ca taddṛṣṭvā tathā śakrasarobhavam //
darśayanviṣṇunā sārddhamekarūpatvamāpnuyāt

saraścakāra deveśo bhagavānpārvatīpatiḥ //
sumṛṣṭanirmalajalaṃ nalinīdalaśobhitam

utpalaiḥ sarvataśchannaṃ saraḥ sārasaśobhitam //
tadagādhajalaṃ dṛṣṭvā svayameva pinākadhṛk //
sabrahmaviṣṇunā sārddhaṃ snātastatra vṛṣadhvajaḥ

te devāstatsaro dṛṣṭvā brahmaviṣṇusurā'surāḥ //
ūcuḥ sarve susaṃhṛṣṭā vīkṣaṃtaḥ pārvatīpatim

yasmātkṛtamidaṃ devā īśvareṇa mahatsaraḥ //
mahādeva saronāma suprasiddhaṃ bhaviṣyati

yo'tra snānaṃ prakurute pitṝṇāṃ tarpaṇaṃ tathā //
śrāddhaṃ pitṝṇāṃ bhaktyā ca sa gacchetparamāṃ gatim

suprasannā bhaviṣyanti sarve devā na saṃśayaḥ //
darśanātpāpanirmukto mahādevasarasya ca

maheśasya ca taddṛṣṭvā saraḥ paramaśobhanam //
cakāra pārvatī tatra saraścāpratimaṃ tathā

gaurīsara iti khyātaṃ sarvapāpapraṇāśanam //
tatra snātvā naro bhaktyā na durgatimavāpnuyāt

na daurbhāgyaṃ striyaścaiva na vaidhavyaṃ kadācana //
snātvā gaurītīrthavare sarvānkāmānavāpnuyāt

varuṇaśca tato dṛṣṭvā puṇyānyāyatanāni ca //
cakāra ca saro divyaṃ viṣṇubhaktisamanvitaḥ

nāmnā varuṇapadaṃ tacca pāpakṣayakaraṃ bhuvi //
nabhasye paurṇamāsyāṃ ca saṃtarpya pitṛdevatāḥ

śrāddhaṃ kṛtvā vidhānena pitṝṇāṃ śraddhayānvitaḥ //
uttamaṃ lokamāpnoti yatra gatvā na śocati

pradadyādudakumbhāṃśca dadhyodanasamanvitān //
gāśca vāsāṃsi ratnāni viṣṇurme prīyatāmiti

saro dṛṣṭvā jaleśasya saraścakre dhaneśvaraḥ //
yakṣādhipasaronāma suprasiddhaṃ dharātale

tathā tatra naro bhaktyā saṃpūjya pitṛdevatāḥ //
sarvānkāmānavāpnoti dadyādvastradvijātaye

// prahlāda uvāca // //
viṣṇuṃ varapradaṃ śrutvā bhrātṝṇāṃ brahmanaṃdanāḥ //
maṃdākinī vasiṣṭhena samānītā dharātale

ambarīṣādayaḥ sarva ājagmuḥ kṛṣṇapālitām//
dvāravatyāṃ ca te dṛṣṭvā gomatīṃ sāgaraṃgamām

tīrthāni devatānāṃ ca puṇyānyāyatanāni ca //
tīrthaṃ paṃcanadaṃ cakruḥ prajānāṃ patayastathā

paṃca nadyaḥ samāhūtāstatrā''jagmuḥ surānvitāḥ //
marīcaye gomatī ca lakṣmaṇā cātraye tathā

caṃdrabhāgā cāṃgirase pulahāya kuśāvatī //
pāvanārthaṃ jāṃbavatī jagāma kratave tathā

tāsu snātvā mahābhāgā brahmaputrā yaśasvinaḥ //
nāma tasya tadā cakruḥ paṃcanadyaśca tāpasāḥ

tasmātpaṃcanadaṃ tīrthaṃ sarvapāpapraṇāśanam //
snātavyaṃ tatra manujaiḥ svargamokṣārthibhistadā

tatra gatvā suniyato gṛhītvārghyaṃ phalena hi //
maṃtreṇānena vai viprā dadyādarghyaṃ vidhānataḥ

brahmaputraiḥ samānītāḥ paṃcaitāḥ saritāṃ varāḥ //
gṛhṇaṃtvarghyamimaṃ devyaḥ sarvapāpapraśāṃtaye

// ityarghyamantraḥ // //
snānaṃ kṛtvā vidhānena pitṝnsaṃtarppayennaraḥ //
śrāddhaṃ kuryyādvidhānena śradbhayā parayā yutaḥ

paṃcaratnaṃ tato deyaṃ saptadhānyaṃ dvijātaye //
dīnāṃdhakṛpaṇānāṃ ca dānaṃ dadyātsvaśaktitaḥ

sarvānkāmānavāpnoti viṣṇulokaṃ sa gacchati //
putrapautrasamāyuktaḥ paraṃ sukhamavāpnuyāt

pretayoniṃ gatā ye ca ye ca kīṭatvamāgatāḥ //
sarve te muktimāyāṃti pitarastrikulodbhavāḥ

śrutvā'dhyāyamimaṃ puṇyaṃ śivaloke ca modate //
sarvapāpa vinirmuktaḥ sa yāti paramaṃ padam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe caturthe dvārakāmāhātmye pañcanadatīrthamāhātmyavarṇanaṃnāma caturdaśo'dhyāyaḥ