Skanda Purana · Chapter 7.14

// pulastya uvāca // //
tato gacchennṛpaśreṣṭha devaṃ siddheśvaraṃ param //
siddhidaṃ prāṇināṃ samyaksiddhena sthāpitaṃ purā

tatra viśvāvasurnāma siddhastepe mahātapaḥ //
bahuvarṣāṇi saṃsthāpya śivaṃ bhaktiparāyaṇaḥ

jitakrodho jitamado jitasarveṃdriyakriyaḥ //
tāvadvarṣasahasrāṃte bhagavānvṛṣabhadhvajaḥ //
tutoṣa nṛpatestasya svayaṃ darśanamāyayau

abravīttaṃ mahādevo varadosmīti pārthiva

// śrībhagavānuvāca // //
varaṃ varaya bhadraṃ te yatte manasi varttate //
dāsyāmi te prasanno'haṃ yadyapi syātsudurlabham

//
// viśvāvasuruvāca // //
etalliṃgaṃ suraśreṣṭha dhyātvā manasi niścayam //
sarvānkāmānavāpnotu prasādāttava śaṃkara

// pulastya uvāca // //
evamastviti sa procya tatraivāṃtaradhīyata //
siddheśvaraṃ tato gatvā siddhiṃ yāti sahasraśaḥ

prabhāvāttasya liṃgasya kāmāniṣṭānavāpnuyuḥ //
tato dharmakriyāḥ sarvā gatā nāśaṃ dharātale

na kaścidyajate yajñairna dānāni prayacchati //
siddheśvaraprasādena siddhiṃ yāṃti narā bhuvi

ucchinneṣu ca yajñeṣu dāneṣu nṛpasattama //
indrādyāstridaśāḥ sarve paraṃ duḥkhamupāgatāḥ

jñātvā yajñavighātaṃ ca tadvighātāya vāsavaḥ //
vajreṇācchādayāmāsa yathā siddhirna jāyate

tathāpi saṃnidhau tasya siddheśasya nṛpottama //
karmaṇo jāyate siddhiḥ pātakasya parikṣayaḥ

yastu māghacaturddaśyāṃ somavāre nṛpottama //
śuklāyāṃ vātha kṛṣṇāyāṃ spṛṣṭvā siddho bhavennaraḥ

adyāpi jāyate siddhiḥ satyametanmayoditam//
tasmātsiddheśvaraṃ gatvā natvā yāsyati sadgatim

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe siddheśvaramāhātmyavarṇanaṃnāma caturddaśo'dhyāyaḥ