Skanda Purana · Verses 7.13-4

// sārasvata uvāca // //
chittvā śubhāśubhaṃ karma muktimicchecchivāṃ tataḥ //
idaṃ na śakyate karttuṃ śubhaṃ kāryaṃ tadā naraiḥ

utthāyotthāya snātavyaṃ pūjyau hariharau svayam //
satyaṃ vācyaṃ hitaṃ kāryaṃ dānaṃ deyaṃ svaśaktitaḥ

parāpavādabhīrutvaṃ paradārānvivarjayet //
suvarṇabhūmiharaṇabrahmadevasvavarjanam

brāhmaṇastrīnareṃdrāṇāṃ bālavṛddhatapasvinām //
pitṛmātṛgurūṇāṃ ca nāpriyaṃ manasā vadet

deśakālaparijñānaṃ pātrāpātravivecanam //
chāyā nṛṇāṃ na vaktavyā takrāgnīṃdhanakāṃjikam

auṣadhaṃ śākamarthibhyo dātavyaṃ gṛha medhibhiḥ //
ekādaśīpaṃcadaśīcaturdaśyaṣṭamīṣu ca

amāvāsyāvyatīpātasaṃkrāṃtigrahaṇeṣu ca //
vaidhṛte pitṛmātrośca kṣayāhadivaseṣu ca

yugādimanvādidine gṛhe kāryo mahotsavaḥ //
tīrthe vā gamanaṃ kāryaṃ gṛhācchataguṇaṃ yataḥ

idriyāṇāṃ jayaḥ kāryo madyaṃ dyūtaṃ vivarjayet //
vivādaṃ gamanaṃ yuddhaṃ gṛhī yatnena varjayet

snānaṃ dānaṃ japo homo devapūjā dvijārcanam //
akṣayaṃ jāyate sarvaṃ vidhivaccedbhavetkṛtam

ekāpi gauḥ pradātavyā vastrālaṃkārabhūṣaṇā //
dogdhrī savatsā taruṇī dvijamukhyāya kalpitā

saṃprāpya bhārataṃ khaṃḍaṃ mānuṣaṃ janma cottamam //
dhanyo dadāti yo dhenuṃ sa naraḥ sūryamaṇḍalam//
bhittvā yāti vimānena gamyamāno gavādibhiḥ

sapta janmāni pāpāni kṛtvā pāpīha cādhamaḥ//
eko dadāti yo dhenuṃ mucyate sarvapātakaiḥ

yadā sa nīyate baddho yamamārgeṇa kiṃkaraiḥ //
tadā naṃdā samāgatya svaṃ putramiva paśyati

vijitya huṃkṛtenaiva tāndūtāndūrataḥ sthitān //
gopradaṃ taṃ samādāya prayāti śivamandiram

vṛṣo dharma hati prokto yena muktaḥ sa mucyate //
goṣu madhye pitṝnsarvānharamuddiśya vā harim

sūryabrahmapure vāso jāyate brahmavāsare //
dṛḍhaṃ kakudminaṃ saṃtaṃ yuvānaṃ bhārasādhanam

halakṣamaṃ balīvardaṃ dattvā viprāya parvasu //
tamāruhya naro yāti golokaṃ śivasaṃnidhau

aśvaṃ sāstaraṇaṃ dattvā khalīnena ca saṃyutam //
aśvarājabalātsvarge modate brāhmavāsaram

gajadānādgajeṃdreṇa nīyate naṃdanaṃ vanam //
pṛthivyāṃ sāgarāṃtāyāmeṣa rājā bhaviṣyati

gṛhaṃ sopaskaraṃ dattvā viprāya gṛhamedhine //
labhate naṃdane divyaṃ vimānaṃ sārvakāmikam

dravyaṃ pṛthivyāṃ paramaṃ suvarṇaṃ hṛṣyaṃti devā yadi dīyate tataḥ //
sūryopi tasmai ruciraṃ vimānaṃ dadāti tāvadbhramate'tra yāvat

raupyaṃ pitṝṇāmativallabhaṃ taddattvā naro nirmalatāmupaiti //
somasya lokaṃ labhate sa tāvadbhuve nivaddhā ṛṣayo hi yāvat

śrīkhaṃḍakarpūrasamākulāni tāṃbūlaratnādiphalāni dattvā //
puṣpāṇi vastrāṇi sukhena yāti sākaṃ śaśāṃkaṃ divi devavṛṃdaiḥ //

takrodakatailaghṛtadugdhekṣurasamadhūni yo dadyāt //
kharjūrakhaṃḍadrākṣāvātāmāṃjīrakaiḥ sākam

darbhākṣatamṛdgomayadūrvāyajñopavītāni //
tilacarmasūryapiṭakaṃ dattvā khyātaściraṃ svarge

ātmāhārāccaturbhāgaṃ siddhānnādyadi dīyate //
hantakāraḥ sa taṃ dattvā dhruvaṃ yāti dhruvālaye //

ātmāhārapramāṇena pratyahaṃ goṣu dīyate //
gavāhnikaṃ tāsu dattvā naro yāti surālayam

kaṃḍanīpeṣaṇīcullīmārjanībhiśca yatkṛtam //
pāpaṃ gṛhī kṣālayati dadadbhikṣāṃ dinaṃ prati

grāsamātrā bhavedbhikṣā sā nityaṃ yatra dīyate //
tadgṛhaṃ gṛhamanyacca smaśānamiva dṛśyate

kumbhānsodakasiddhānnāṃśchatropānatkamaṃḍalum //
aṃgulīyakavāsāṃsi dattvā yāti naro divi

śrāṃtasya yānaṃ tṛṣitasya pānamannaṃ kṣudhārttasya naro narendra //
dattvā vimānena surāṃganābhiḥ saṃstūyamānastridivaṃ sa yāti

bhojanaṃ satataṃ deyaṃ yathāśaktyā ghṛta plutam //
tanmayā hi yataḥ prāṇā ataḥ puṣyaṃti prāṇinaḥ

kṣutpīḍā mahatī loke hyannaṃ tadbheṣajaṃ smṛtam //
tena sā śāṃtimāyāti tatonnaṃ deyamuttamam

annaṃ vastraṃ phalaṃ toyaṃ takraṃ śākaṃ ghṛtaṃ madhu //
patraṃ puṣpaṃ tathopānatkaṃthāṃ yaṣṭiṃ kamaṃḍalum

chatrapātre vrataṃ vidyā akṣamālā surārcanam //
kanyā kuśopavītāni bījauṣadhagṛhāṇi ca

sasyaṃ kṣetraṃ yajñapātraṃ yogapaṭṭaṃ ca pāduke //
kṛṣṇājinaṃ buddhidānaṃ dharmādeśakathānakam

athaitatsaṃtataṃ deyaṃ tena śreyo mahadbhavet //
sarvapāpakṣayaṃ kṛtvā dātā yāti śivālayam

śrāddhe gṛhasthā bhoktavyāḥ kulīnā vedapāragāḥ //
akrodhanāḥ snānaśīlāḥ svadeśācāratatparāḥ

āmaṃtrya pūrvadivase nirīhā api ye dvijāḥ //
alolupā vyādhihīnā na tu ye grāmayājinaḥ

teṣāṃ puraḥ pradātavyaṃ piṃḍadānaṃ vidhānataḥ //
śrāddhaṃ śraddhāvihīnena kṛtamapyakṛtaṃ bhavet

tasmācchraddhānvitaiḥ śrāddhaṃ karttavyaṃ krodhavarjitaiḥ //
vānaprastho brahmacārī pathikastīrthasevakaḥ

atithirvaiśvadevāṃte sa pūjyaḥ śrāddhakarmaṇi //
sarvadā yatayaḥ pūjyāḥ svaśaktyā gṛhamedhibhiḥ

yātrāvidhimatho vakṣye setihāsaṃ nṛpottama

iti śrīskānde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍe dvitīye vastrāpathakṣetramāhātmye tīrthayātrāvidhivarṇane śrāddhadānādimāhātmyavarṇanaṃnāma trayodaśo'dhyāyaḥ //