Skanda Purana · Chapter 7.136
// īśvara uvāca // //
tato gacchenmahādevi lomaśeśvaramuttamam //
duḥkhāntakāriṇīpūrve dhanuṣāṃ saptake sthitam
sthāpitaṃ tatra deveśi lomaśena maharṣiṇā //
guhāmadhye mahāliṃgaṃ tapaḥ kṛtvā suduścaram
koṭīnāṃ tritayaṃ sārdhamiṃdrādyāḥ svarbhujaḥ priye //
yadā nāśaṃ gamiṣyaṃti tadā tasya kṣayo dhruvam
yāvaṃti deharomāṇi indrāstāvanta eva ca //
kramādindre vinaṣṭe tu tallomapatanaṃ bhavet
evamīśaprasādena cirāyurlomaśo'bhavat //
brahmāṇaḥ ṣaḍvinaśyanti samagrāyuṣi lomaśe
ya evaṃ pūjayedbhaktyā talliṃgaṃ lomaśārcitam //
so'pi dīrghāyurāpnoti nirvyādhirnīrujaḥ sukhī
iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye lomaśeśvaramāhātmyavarṇanaṃnāma ṣaṭtriṃśaduttaraśatatamo'dhyāyaḥ
Original text: skandapurāṇam · Sanskrit Wikisource contributors · Sanskrit Wikisource · CC BY-SA 4.0