Skanda Purana · Chapter 7.131

// śrīdevyuvāca // //
yadetadbhavatā proktaṃ nāleśvaramiti śrutam //
dhruveśvareti talliṃgaṃ kathaṃ vai saṃbabhūva ha

// īśvara uvāca // //
śṛṇu devi pravakṣyāmi dhruveśvaramahodayam //
yacchrutvā mānavo devi mucyate bhavabaṃdhanāt

uttānapādanṛpateḥ putro'bhūddhruvasaṃjñitaḥ //
mahātmā jñānasaṃpannaḥ sarvajñaḥ priyadarśanaḥ

sa kadācitsamāsādya prabhāsaṃ kṣetramuttamam //
tatāpa vipulaṃ devi tapaḥ paramadāruṇam

divyaṃ varṣasahasraṃ tu pratiṣṭhāpya maheśvaram //
saṃpūjayati sadbhaktyā stauti stotraiḥ pṛthagvidhaiḥ

tatstotraṃ te pravakṣyāmi yenāhaṃ tuṣṭimāgataḥ

// dhruva uvāca // //
kailāsatuṃgaśikharaṃ pravikampyamānaṃ kailāsaśṛṃgasadṛśena daśānanena //
yaḥ pādapadmaparipīḍanayā dadhāra taṃ śaṃkaraṃ śaraṇadaṃ śaraṇaṃ vrajāmi

yenāsurāścāpi danośca putrā vidyādharoragagaṇaiśca vṛtāḥ samagrāḥ //
saṃyojitā na tu phalaṃ phalamūlamuktāstaṃ śaṃkaraṃ śaraṇadaṃ śaraṇaṃ vrajāmi

yasyākhilaṃ jagadidaṃ vaśavarti nityaṃ yo'ṣṭābhireva tanubhirbhuvanāni bhuṃkte //
yatkāraṇaṃ paramakāraṇakāraṇānāṃ taṃ śaṃkaraṃ śaraṇadaṃ śaraṇaṃ vrajāmi

yaḥ savyapāṇikamalāgranakhena devastatpaṃcamaṃ ca sahasaiva purātiruṣṭaḥ //
brāhmaṃ śirastaruṇapadmanibhaṃ cakarta taṃ śaṃkaraṃ śaraṇadaṃ śaraṇaṃ vrajāmi

/
yasya praṇamya caraṇau varadasya bhaktyā śrutvā ca vāgbhiramalābhirataṃdritābhiḥ //
dīptastamāṃsi nudati svakarairvivasvāṃstaṃ śaṃkaraṃ śaraṇadaṃ śaraṇaṃ vrajāmi //

yaḥ paṭhetstavamidaṃ rucirārthaṃ mānavo dhruvakṛtaṃ niyatātmā //
viprasaṃsadi sadā śucisiddhaḥ sa prayāti śivalokamanādim

tasyaivaṃ stuvato devi tuṣṭo'haṃ bhāvitātmanaḥ //
pūrṇe varṣasahasrāṃte dhruvasyāha mahātmanaḥ

putra tuṣṭo'smi bhadraṃ te jātastvaṃ nirmalo'dhunā //
divyaṃ dadāmi te cakṣuḥ paśya māṃ vigatajvaraḥ

yacca te manasā kiñcitkāṃkṣitaṃ phalamuttamam //
tatsarvaṃ te pradāsyāmi brūhi śīghraṃ mamāgrataḥ

brāhmyaṃ vā vaiṣṇavaṃ śākraṃ padamanyatsudurlabham //
dadāmi nātra saṃdeho bhaktyā saṃprīṇitastava

// dhruva uvāca // //
brāhmyaṃ vaiṣṇavaṃ māhendraṃ padamāvṛttilakṣaṇam//
viditaṃ mama tatsarvaṃ manasā'pi na kāmaye

yadi tuṣṭo'si me deva bhaktiṃ dehi sunirmalām//
asmim̐lliṃge sadā vāsaṃ kuru deva vṛṣadhvaja

īśvara uvāca//
iti yatprārthitaṃ sarvaṃ taddattaṃ sarvameva hi//
sthānaṃ ca tasya taddhrauvyaṃ tadviṣṇoḥ paramaṃ padam

śrāvaṇasya tvamāvāsyāṃ yastalliṃgaṃ prapūjayet //
āśvayukpaurṇamāsyāṃ vā so'śvamedhaphalaṃ labhet

aputro labhate putraṃ dhanārthī labhate dhanam //
rūpavānsubhago bhogī sarvaśāstraviśāradaḥ //
haṃsayuktavimānena rudraloke mahīyate

asurasuragaṇānāṃ pūjitasya dhruvasya kathayati kamanīyāṃ kīrtimetāṃ śṛṇoti //
sakalasukhanidhānarudralokaṃ suśāṃtaḥ suragaṇadanunāthairarcitaṃ yātyanaṃtam

iti śrīskāṃde mahāpurāṇa ekā śītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye dhruveśvaramāhātmyavarṇanaṃnāmaikatriṃśaduttaraśatatamo 'dhyāyaḥ