Skanda Purana · Chapter 7.130

// īśvara uvāca // //
tato gacchenmahādevi devaṃ pāśupateśvaram //
ugraseneśvarāddevi pūrvabhāge vyavasthitam

gopādityāttathāgneyyāṃ dhruveśāddakṣiṇāṃ śritam //
sarvapāpaharaṃ devi pūrvabhāge vyavasthitam

gopādityāttathā liṃgaṃ darśanātsarvakāmadam //
asminyuge samākhyātaṃ saṃtoṣeśvarasaṃjñitam

saṃtuṣṭo bhagavānyasmātteṣāṃ tatra tapasvinām //
tena saṃtoṣanāmnā tu prakhyātaṃ dharaṇītale

yugaliṃgaṃ mahādevi siddhisthānaṃ mahāprabham //
sthānaṃ pāśupatānāṃ ca bheṣajaṃ pāparogiṇām

catvāro munayaḥ siddhāstasmim̐lliṃge yaśasvini//
vāmadevastu sāvarṇiraghoraḥ kapilastathā//
tasmim̐lliṃge tu saṃsiddhā anādīśe niraṃjane

tasya devasya sāmīpye vane śrīmukhasaṃjñitam//
lakṣmīsthānaṃ mahādevi siddhayogaistu sevitam

tatra pāśupatāḥ śreṣṭhā mama liṃgārcane ratāḥ//
teṣāṃ caiva nivāsārthaṃ taddevyā nirmitaṃ vanam

tasya madhye tu suśroṇi liṃgaṃ pūrvamukhaṃ sthitam //
tasminpāśupatāḥ siddhā aghorādyā maharṣayaḥ //
anenaiva śarīreṇa gatāste śivamandiram

tatra prābhāsike kṣetre surasiddhaniṣevite //
rocate me sadā vāsastasminnāyatane śubhe //
sarveṣāmeva sthānānāmatiramyamatipriyam

tatra pāśupatā devi mama dhyānaparāyaṇāḥ //
mama putrāstu te sarve brahmacaryeṇa saṃyutāḥ

dāntāḥ śāṃtā jitakrodhā brāhmaṇāste tapasvinaḥ //
talliṃgasya prabhāvena siddhiṃ te paramāṃ gatāḥ

tasmāttaṃ pūjayennityaṃ kṣetravāsī dvijottamaḥ

// devyuvāca // //
bhagavandevadeveśa saṃsārārṇavatāraka //
prabhāse tu mahākṣetre tvadīyavratacāriṇām

sthānaṃ teṣāṃ mahatpuṇyaṃ yogaṃ pāśupataṃ tathā //
kathayasva prasādena liṃgamāhātmyamuttamam

kimādināma devasya kathaṃ pūjyo narottamaiḥ //
kathaṃ pāśupatāstatra sadehāḥ svargamāgatāḥ

etatkathaya deveśa dayāṃ kṛtvā mama prabho

// īśvara uvāca // //
yastvayā pṛchyate bhadre yogaḥ pāśupato mahān //
teṣāṃ caiva prabhāvo yastathā liṃgasya suvrate

anādīśasya devasya ādināma mahāprabhe //
tasmim̐lliṃge tu ye devi madīyavratamāśritāḥ

ciraṃ niyogaṃ suśroṇi vrataṃ pāśupataṃ mahat //
dhārayaṃti yathoktaṃ tu mama vismayakārakam //
teṣāmanugrahārthāya mama cittaṃ pradhāvati

// sūta uvāca // //
harasya vacanaṃ śrutvā devī vismayamāgatā //
uvāca vacanaṃ viprāḥ sarvalokapatiṃ patim

/ /
mamāpi kautukaṃ deva kimakārṣīttato bhavān //
tadbrūhi me mahādeva yadyahaṃ tava vallabhā

tasyāstadvacanaṃ śrutvā mahādevo jagāda tām //
śṛṇu devi pravakṣyāmi mama bhaktaviceṣṭitam

dṛṣṭvā caiva taponiṣṭhāṃ teṣāmādyaḥ sureśvaraḥ //
uvāca vacanaṃ devaḥ praṇatānpārśvataḥ sthitān

//
// īśvara uvāca // //
gaccha śīghraṃ nandikeśa yatra te mama putrakāḥ //
caraṃti ca vrataṃ ghoraṃ madīyaṃ cātiduṣkaram

tatkṣetrasya prabhāvena bhaktyā ca mama nityaśaḥ //
tena te munayaḥ siddhāḥ svaśarīreṇa suvratāḥ

tasmānmadvacanānnandingaccha prābhāsikaṃ śubham //
āmantraya tvaṃ tānsarvānkailāsaṃ śīghramānaya

idaṃ padmaṃ gṛhāṇa tvaṃ sanālaṃ kalikojjvalam //
liṃgasya mūrdhni dattvedaṃ padmanālamihānaya

muktastadā sa vai nandī devadevena śaṃbhunā //
kailāsanilayāttasmātprabhāsaṃ kṣetramāgataḥ

dṛṣṭvā caiva punarliṅgaṃ devadevasya śūlinaḥ //
dṛṣṭvā tāṃścaiva yogīndrānparaṃ vismayamāgataḥ

keciddhyānaratāstatra kecidyogaṃ samāśritāḥ //
kecidvyākhyāṃ prakurvanti vicāramapi cāpare

kurvantyanye liṃgapūjāṃ praṇāmaṃ ca tathā'pare //
pradakṣiṇaṃ prakurvanti sāṣṭāṃgaṃ praṇamanti ca

kecitstutiṃ prakurvanti bhāvayajñaistathā pare //
kecitpūjāṃ ca kurvanti ahiṃsākusumaiḥ śubhaiḥ

bhasmasnānaṃ prakurvaṃti gaṇḍukaiḥ snāpayanti ca //
evaṃ vyākulatāṃ yātaṃ tapasvigaṇamaṇḍalam

tattādṛśamathālokya nandī vismayamāgataḥ //
cintayāmāsa manasā sarvaṃ teṣāṃ nirīkṣya ca

āgato'hamimaṃ deśaṃ na kaścinmāṃ nirīkṣate//
na kenacidahaṃ pṛṣṭo'bhyāgataḥ kutra kasya ca

ahaṃkārāvṛtāḥ sarve na vadanti ca māṃ kvacit //
evaṃ manasi saṃdhāya liṃgapārśvamupāgataḥ //

dattaṃ liṃgasya tatpadmanālaṃ chittvā tu nandinā //
arcayitvā tu tannandī liṃgaṃ pāśupateśvaram //
nālaṃ gṛhītvā yatnena ṛṣīnvacanamabravīt

// nandikeśvara uvāca // //
śāsanāddevadevasya bhavatāṃ pārśvamāgataḥ //
ājñāpayati deveśastapasvigaṇamaṇḍalam

/
yuṣmābhistatra gantavyaṃ yatra devaḥ sanātanaḥ //
yuṣmānsarvānsamādāya gamiṣyāmi bhavālayam

uttiṣṭhatāśu gacchāmaḥ kailāsaṃ parvatottamam //
tūṣṇīṃbhūtāstataḥ sarve procuste saṃjñayā dvijāḥ //
gamyatāmagrato nandinpaścādeṣyāmahe vayam

evamuktastu munibhirnandī śīghrataraṃ gataḥ //
kathayāmāsa tatsarvaṃ kupitenāntarātmanā

// nandikeśvara uvāca // //
deva tatra gato'haṃ vai yatra te yoginaḥ sthitāḥ //
santoṣito na caivāhaṃ kenacittatra saṃsthitaḥ

na māṃ deva nirīkṣante nālapaṃti kathaṃcana //
padmaṃ tatra mayā deva sthāpitaṃ liṃga mūrdhani

/
uktaṃ deva mayā teṣāṃ yogīndrāṇāṃ maheśvara //
ājñaptā devadevena ihāgacchata mā ciram

etacchrutvā vacaḥ svāminsarve tatra maharṣayaḥ //
āgamiṣyāma iti vai pṛṣṭhato gaccha mā ciram

ityukte taistathā deva ahaṃ śīghramihāgataḥ //
śṛṇu cemaṃ gṛhāṇa tvaṃ yatheṣṭaṃ kuru me prabho

ekaṃ me saṃśayaṃ deva cchettumarhasi sāṃpratam //
mayā vinā mahādeva āgamiṣyaṃti te katham //
saṃśayo me mahādeva kathayasva maheśvara

/ //
// īśvara uvāca // //
śṛṇu naṃdinyathāścaryaṃ teṣāṃ vai bhāvitātmanām //
na dṛśyanta ime siddhā māṃ muktvā'nyaiḥ surairapi

madbhāvabhāvitāste vai yogaṃ viṃdaṃti śāṃkaram //
paśyaitatkautukaṃ naṃdindarśayāmi tavādhunā

ānītaṃ yattvayā nālaṃ tasminnāle tu sūkṣmavat //
praviśya cāgatāḥ sarve yogaiśvaryabalena ca

evamuktastadā naṃdī vismayotphullalocanaḥ //
apaśyannālamadhyasthānmaharṣīnparamāṇuvat

yathārkaraśmimadhyasthā dṛśyante paramāṇavaḥ //
evaṃ tannālamadhyasthā dṛśyaṃta ṛṣayaḥ pṛthak

evaṃ dṛṣṭvā tadā naṃdī vismayotphullalocanaḥ //
āścaryaṃ paramaṃ gatvā kiñcinnevābravītpunaḥ

evaṃ tatkautukaṃ dṛṣṭvā devī vacanamabravīt //
kiṃ dṛśyate mahādeva hṛṣṭaḥ kasmānmaheśvara

ityukte vacane devyā provācedaṃ maheśvaraḥ//

// īśvara uvāca // //
yogayuktā mahātmāno yoge pāśupate sthitāḥ //
ete māṃ ca samārādhya prabhāsakṣetravāsinam //
īdṛśīṃ siddhimāpannāḥ svacchaṃdagaticāriṇaḥ

ityuktavati deveśa ṛṣayaste mahāprabhāḥ //
padmanālādviniḥsṛtya sarve vai yogamāyayā //
pradakṣiṇāṃ prakurvaṃti devaṃ devyā bahiṣkṛtam

// devyuvāca // //
kimarthaṃ māṃ na paśyaṃti durācārā ime dvijāḥ //
vismayo'yaṃ mahādeva kathayasva prasādataḥ

//
// īśvara uvāca // //
prakṛtitvānna paśyaṃti siddhā hyete mahātapāḥ //
evamuktā tu girijā devedevena śūlinā

cukopa teṣāṃ suśroṇī śaśāpa krodhitānanā //
strīlaulyena durācārā nāśameṣyatha garviṇaḥ

rājapratigrahāsaktā vṛttyā devārcane ratāḥ//
bhaviṣyatha kalau prāpte liṃgadravyopajīvinaḥ

veśyāsaktāśca saṃbhrāṃtā sarvalokabahiṣkṛtāḥ //
devadravyavināśāya bhaviṣyatha kalau yuge

iti datte tadā śāpa ṛṣīṇāṃ ca mahātmanām //
gaurīṃ prasādayāmāsuste ca sarve sureśvarāḥ

devadevasya vacanātprasannā sā'bhavatpunaḥ //
nālaṃ devo'pi saṃgṛhya dakṣiṇāśāṃ samākṣipat

patitaṃ tacca vai nālaṃ prabhāsakṣetramadhyataḥ //
tadeva liṃgaṃ saṃjātaṃ mahānāleti viśrutam

kalau yuge ca saṃprāpte taddhruveśvarasaṃjñitam//
saṃsthitaṃ cottareśāne tasmātpāśupateśvarāt

purā'nādīśanāmeti paścātpāśupateśvaraḥ //
prabhāse tu mahākṣetre sthitaḥ pātakanāśanaḥ

idaṃ sthānaṃ paraṃ śreṣṭhaṃ mama vrataniṣevaṇam //
idaṃ liṃgaṃ paraṃ brahma anādīśeti saṃjñitam

atra siddhiśca muktiśca brāhmaṇānāṃ na saṃśayaḥ //
anenaiva śarīreṇa ṣaḍbhirmāsastu siddhyati

saṃsārasya vimokṣārthamidaṃ liṃgaṃ tu dṛśyatām //
durlabhaṃ sarvalokānāmidaṃ mokṣapradaṃ param//
idaṃ pāśupataṃ jñānamasmim̐lliṃge pratiṣṭhitam

yaścainaṃ pūjayedbhaktyā māghe māsi niraṃtaram //
sarveṣāṃ vai kratūnāṃ ca dānānāṃ labhate phalam

hiraṇyaṃ tatra dātavyaṃ samyagyātrāphalepsubhiḥ

ityetatkathitaṃ devi māhātmyaṃ pāpanāśanam //
paśupāśavimokṣārthaṃ samyakpāśupateśvaram

caturṇāmapi varṇānāṃ pūjyo brāhmaṇa ucyate //
tasya caivādhikāro'sti cāsminpāśupateśvare

yaddevatānāṃ prathamaṃ pavitraṃ viśvavrataṃ pāśupataṃ babhūva //
ayaṃ panthā naiṣṭhiko vai mayokto yena devā yāṃti bhuvanāni viśvā

surāṃ pītvā gurudārāṃśca gatvā steyaṃ kṛtvā brāhmaṇaṃ cāpi hatvā //
bhasmacchanno bhasmaśayyāśayāno rudrādhyāyī mucyate pātakebhyaḥ

agnirityādinā bhasma gṛhītvāṃgāni saṃspṛśet //
gṛhṇīyātsaṃyate cāgnau bhasma tadgṛhavāsinām

agniriti bhasma vāyuriti bhasma jalamiti bhasma sthalamiti bhasma sarvaṃ ha vā idaṃ bhasmābhavat //
etāni cakṣūṃṣi nādīkṣitaḥ saṃspṛśet

brāhmaṇaiśca samādeyaṃ na tu śūdraiḥ kadācana //
nādhikāro'sti śūdrasya vrate pāśupate sadā

brāhmaṇeṣvadhikāro'sti vrate pāśupate śubhe //
brāhmaṇīṃ tanumāsthāya saṃbhavāmi yugeyuge

caṇḍālaveśmanyatha vā smaśāne rājñaśca mārgeśvatha vartmamadhye //
karīṣamadhye niḥsṛtā narādhamāḥ śaivaṃ padaṃ yāṃti na saṃśayo'tra

iti śrīskāṃde mahāpurāṇa ekāśī tisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye pāśupateśvaramāhātmyavarṇanaṃnāma triṃśaduttaraśatatamodhyāyaḥ