Skanda Purana · Verses 7.13-3

// devyuvāca // //
yadā bhramisthaḥ savitā takṣitaḥ kṣuradhārayā //
śvaśureṇa mahādeva jāmātā prītipūrvakam

tattejaḥ śātitaṃ bhūri prabhāse yatpapāta vai //
tadabhūtkiṃ tadā deva prabhāsātkathayasva me

// īśvara uvāca // //
śṛṇu devi pravakṣyāmi sūryamāhātmyamuttamam //
yacchrutvā mānavo bhaktyā mucyate sarvapātakaiḥ

dehāvatāro devasya prabhāse'rkasthalasya ca //
purāṇākhyānamācakṣe tava devi yaśasvini

śākadvīpe mahādevi bhramisthasya tadā raveḥ //
varṣāṇāṃ tu śataṃ sāgraṃ takṣyamāṇe vibhāvasau

yadādya bhāgajaṃ tejastatprabhāse'patatpriye //
patitaṃ tatra tattejaḥ sthalākāraṃ vyajāyata

jāṃbūnadamayaṃ devi tatpūrvamabhavatkṣitau //
tiṣyamāhātmyayogena śailībhūtaṃ ca sāṃpratam

tatra cārkamayaṃ rūpaṃ kṛtvā devo divākaraḥ //
utpannaḥ sarvabhūtānāṃ hitāya dharaṇītale

hiraṇyagarbhanāmeti kṛte sūryeti kīrtitam //
tretāyāṃ savitānāma dvāpare bhāskaraḥ smṛtaḥ

kalau cārkasthalonāma triṣu lokeṣu kīrtitaḥ //
avatīrṇamidaṃ devi svayameva pratiṣṭhitam

yadā svārociṣo devi dvitīyo'bhūnmanuḥ purā //
tasminkāle'vatīrṇo'sau devastatra divākaraḥ

bhaktimukti prado devi vyādhiduḥkhavināśakṛt //
tasya tejodbhavairvyāptaṃ reṇubhiḥ pañcayojanam

dakṣiṇottarato devi pañcapūrvāpareṇa tu //
uttareṇa samudrasya yāvanmāheśvarī nadī

nyaṃkumatyāścāparato yāvadeva kṛtasmaram //
etadvyāptaṃ mahādevi tattejoreṇubhiḥ śubhaiḥ

tasya sūkṣmā prabhā yā tu āditejoviniḥsṛtā //
tayā vyāptaṃ mahādevi yāvaddvādaśayojanam

uttare bhāskarasutā dakṣiṇe saritāṃ patiḥ //
pūrvapaścimato devi rukmiṇīdvitayaṃ smṛtam

etasminnantare devi sauraṃ tejaḥ prasarppitam //
tena pāvitryamānītaṃ kṣetraṃ dvādaśayojanam

tasya madhyasya yanmadhyaṃ tadgṛhaṃ mama sundari //
tejomaṇḍalamadhyasthaṃ mama sthānaṃ maheśvari

cakṣurmaṃḍalamadhye tu yathā devi kanīnikā //
pūrvapaścimato devi gomukhādā''śvamedhikam

dakṣiṇottarato devi samudrātkauraveśvarīm //
etasminnaṃtare kṣetre kṣetrajño'haṃ varānane

yasmādarkasya tejobhirbhāsitaṃ mama tadgṛham //
tasmātprabhāsanāmeti kalpe'sminprathitaṃ priye

tatra paśyati yaḥ sūryamarkkarūpaṃ narottamaḥ //
sarvapāpavinirmuktaḥ sūryaloke mahīyate

sa snātaḥ sarvatīrtheṣu tena ceṣṭaṃ mahāmakhaiḥ //
sarvadānāni dattāni pūrvajāstena toṣitāḥ

arkarūpī yataḥ sūryastatra jāto mahītale //
tasmāttyājyaḥ sadā cārko bhojane'tra na saṃśayaḥ

yo dṛṣṭvārkasthalaṃ marttyaścārkapatreṣu bhuṃjati //
gomāṃsabhakṣaṇaṃ tena kṛtaṃ bhavati bhāmini

bhakṣito bhāskarastena sa kuṣṭhī jāyate naraḥ //
tasmātsarvaprayatnena cārkapatrāṇi varjayet

yātrāyāṃ prathamaṃ devi dṛṣṭo yenārkabhāskaraḥ //
taṃ dṛṣṭvā mahiṣīṃ dadyādbrāhmaṇāya vipaścite //

tāmravarṇaṃ raktavastraṃ tatastuṣyati bhāskaraḥ //
tasya caiva tu sāṃnidhye vahnikoṇe vyavasthitam

nātidūre mahābhāge siddheśvaramiti smṛtam //
sarvasiddhipradaṃ devi liṃgaṃ trailokyapūjitam

jaigīṣavyeśvaraṃnāma pūrvaṃ kṛtayuge'bhavat //
kalau siddheśvaramiti prasiddhimagamatpriye

taṃ dṛṣṭvā manujo devi sarvasiddhimavāpnuyāt //
tatraiva devadeveśi nātidūre vyavasthitam

sūryadakṣiṇanairṛtye pātālavivaraṃ priye //
maṃdehā rākṣasā yatra tathā śālakaṭaṃkaṭāḥ

sūryasya tejasā dagdhāḥ pātālamagamanpurā //
kalau taddvāramevāsti na pātāle gatiḥ priye

yoginyastatra rakṣaṃti brāhmyādyā mātarastathā //
māghekṛṣṇacaturdaśyāṃ rātrau mātṛgaṇānyajet //
balipuṣpopahāraiśca tataḥ siddhirbhaviṣyati

iti hi sakaladharmabhāvahetorharakamalāsanaviṣṇusaṃstutasya//
tanuparilikhanaṃ niśamya bhānorvrajati divākaralokamāyuṣoṃ'te

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye prabhāsapavitranāmakaraṇārkasthalotpattivarṇanaṃnāma trayodaśo'dhyāyaḥ //