Skanda Purana · Verses 7.13-2

// śrīprahlāda uvāca // //
iti kṛṣṇavacaḥ śrutvā gopyaḥ saṃhṛṣṭamānasāḥ //
tasminmayasare snātvā vimuktā'śeṣabandhanāḥ

kṛṣṇadarśanasaṃjātaparamānandasaṃplutāḥ //
ūcuśca vacanaṃ gopyo madhuraṃ mādhavaṃ prati

// gopya ūcuḥ // //
dhanyaḥ sa daityapravaro mayo yena kṛtaṃ saraḥ //
yasmiṃstvaṃ devataiḥ sārddhaṃ sameṣyasi jagatpate

yadi tuṣṭo'si bhagavannanugrāhyā vayaṃ yadi //
asmākamapi vārṣṇeya kārayasva sarottamam

kīrttanānmṛtyuloke'smiṃstava saṃdarśanena hi //
aharniśaṃ tava dhyānādyāsyāmaḥ paramāṃ gatim

// śrīkṛṣṇa uvāca // //
kariṣye vaḥ priyaṃ sādhvyo yūyaṃ mama parigrahāḥ //
anugrāhyā mayā nityaṃ bhaktigrāhyo'smi sarvadā

// prahlāda uvāca // //
ityuktvā bhagavānkṛṣṇo gopīnāṃ hitakāmyayā //
sarasaḥ sannidhau tasya sarastvanyaccakāra ha

tadagādhaṃ svacchajalaṃ nalinīdalaśobhitam //
haṃsasārasayugmaiśca cakravākaiśca śobhitam

kumudotpalakahlārapadminīkhaṇḍamaṇḍitam //
sevitaṃ dvijamukhyaiśca siddhavidyādharaistathā

sevitaṃ yadunārībhistathā yadukumārakaiḥ //
divārātrau susaṃpūrṇaṃ sarvairjānapadairjanaiḥ

taṃ dṛṣṭvā jalakallolaiḥ susaṃpūrṇaṃ jalāśayam //
harṣādgopījanaṃ kṛṣṇaḥ provāca vacanaṃ tadā

paśyadhvaṃ gopikāḥ śubhraṃ saraḥ saraṃ samīpataḥ //
svacchamiṣṭajalāpūrṇaṃ sajjanānāṃ yathā manaḥ

kāraṇādbhavatīnāṃ ca yasmātkṛtamidaṃ saraḥ //
bhavatīnāṃ tathā nāmnā khyātametadbhaviṣyati

gorvācāvācakaḥ śabdo bhavatībhirmayā saha //
gopracāreti vai nāmnāṃ khyātiṃ loke gamiṣyati

yuṣmākaṃ priyakāmārthaṃ yasmātkṛtamidaṃ saraḥ //
tasmādgopīsara iti khyātiṃ loke gamiṣyati

// gopya ūcuḥ // //
anugrāhyā yadi vayamasmannāmnā kṛtaṃ saraḥ //
anyatkimapi vārṣṇeya prārthayāmo vadasva naḥ

// śrīkṛṣṇa uvāca // //
prārthyatāṃ yadabhipretaṃ yadvo manasi vartate //
bhaktyā samāgatā yūyaṃ nāstyadeyaṃ tato mayā

// gopya ūcuḥ // //
yadi tuṣṭo'si bhagavanyadi deyo varo hi naḥ //
tasmāttvayā sadā kṛṣṇa narayānena mādhava

atrāgatya nabhasye'sminsnātavyaṃ niyamena hi //
yatra tvaṃ tatra devāśca yajñāstīrthāni keśava

yatra tvaṃ tatra dānāni vratāni niyamāśca ye //
oṃkāraśca vaṣaṭkāraḥ svāhākāraḥ svadhā tathā

bhūrbhuvaḥsvarmaharlloko janaḥ satyaṃ tapastathā //
tvanmayaṃ hi jagatsarvaṃ sadevāsuramānuṣam

tasmāttvayi jagannāthe hyatra snāte janārdane //
snātamatra tribhuvanaṃ bhaviṣyati na saṃśayaḥ

trailokyapāvanī gaṃgā tava pādajalaṃ hi tat //
lakṣmīrvakṣaḥsthalasthāne mukhe devī sarasvatī

sarvabhūtamayaścātra tatastvaṃ jagadīśvara //
yaddadāsi manuṣyāṇāṃ bhaviṣyāṇāṃ kalau yuge //
tadvadasva mahābāho kṛpāṃ kṛtvā jagatpate

yātrāyāmāgatānāṃ ca atha ṣaṇmāsavāsinām //
sadaivātra sthitānāṃ ca yatphalaṃ tadvadasva naḥ

// śrīkṛṣṇa uvāca // //
yatphalaṃ hi manuṣyāṇāṃ snātānāṃ gopikāsare //
tacchṛṇudhvamasaṃdigdhaṃ prasanne mayi gopikāḥ

sopaskarāṃ savatsāṃ ca vastrālaṃkārabhūṣitām //
yathoktadakṣiṇopetāṃ brāhmaṇāya kuṭuṃbine

sadācārāya śuddhāya daridrāyānukāriṇe //
gāṃ dattvā phalamāpnoti snānamātreṇa tatphalam

yāvatpadāni manujaḥ kṛṣṇena saha gacchati //
kulāni devyastāvaṃti vasaṃti harimandire

kṛṣṇena saha gacchanti gītavāditranisvanaiḥ //
stuvanto vividhaiḥ stotrairgoviṃdaṃ gopikāsare

na māturjaṭhare teṣāṃ yātanā jāyate nṛṇām //
sarvānkāmānavāpyāṃte vaiṣṇavaṃ lokamāpnuyuḥ

arghyaṃ dattvā vidhānena snānaṃ kuryādvicakṣaṇaḥ //
maṃtreṇānena vai sādhvyaḥ śraddhayā parayā yutaḥ

namaste goparūpāya viṣṇave paramātmane //
gopracāre jagannātha gṛhāṇārghyaṃ namo'stu te

arghyaṃ dattvā vidhānena mṛdamālipya pāṇinā //
snāyācchraddhāsamāyuktastarpayetpitṛdevatāḥ

śrāddhaṃ kuryyāttato bhaktyā ekacittaḥ samāhitaḥ //
yathoktadakṣiṇā dadyādrajataṃ rukmameva ca

viśeṣataḥ pradātavyaṃ tāṃbūlaṃ kajjalaṃ tathā //
dukūlāni ca deyāni tathā kausuṃbhakāni ca

daṃpatyorvāsasī caiva bhūṣaṇāni svaśaktitaḥ //
gāvo deyā dvijātibhyo vṛṣabhāśca dhuraṃdharāḥ //
dīnāṃdhakṛpaṇānāṃ ca dānaṃ deyaṃ svaśaktitaḥ

evaṃ kṛtvā naraḥ samyaguttamāṃ gatimāpnuyāt //
prayāṃti paramaṃ lokaṃ pitarastrikulodbhavāḥ

labhate putrakāmastu putrāniṣṭānmanoramān

yaṃ yaṃ kāmayate kāmaṃ svargamokṣādikaṃ naraḥ //
tatsarvaṃ samavāpnoti yaḥ snāti gopikāsare

yāvallokā bhaviṣyaṃti tāvatsthāsyati vai saraḥ //
yāvatsaro yaśastāvadbhavatīnāṃ bhaviṣyati

yāvatkīrtirmanuṣyeṣu tāvatsvarge mahīyate //
vimuktāḥ sakalātpāpādyāsyaṃti paramāṃ gatim

tatpuṇyaṃ gopīsara idaṃ jalaiḥ pūrṇaṃ sadaiva hi //
avagāhyaṃ mayā gopyo nabhasye niyamena hi

bhavatyaḥ patibhāvena brahmabhāvena vā punaḥ //
ciṃtayaṃtyaḥ paraṃ māṃ hi parāgatimavāpsyatha

// prahlāda uvāca // //
anujñātā bhagavatā tatastā gopakanyakāḥ //
namaskṛtya ca goviṃdaṃ yayuḥ sarvā yathāgatā

bhagavānapi goviṃda uddhavena samanvitaḥ //
visṛjya gopikāḥ kṛṣṇaḥ svakaṃ maṃdiramāviśat

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe caturthe dvārakāmāhātmye gopīsarastīrthamāhātmyavarṇanaṃnāma trayodaśo'dhyāyaḥ