સ્કંદ પુરાણ · શ્લોક 7.13-2

॥ શ્રીપ્રહ્લાદ ઉવાચ ॥ ॥
ઇતિ કૃષ્ણવચઃ શ્રુત્વા ગોપ્યઃ સંહૃષ્ટમાનસાઃ ॥
તસ્મિન્મયસરે સ્નાત્વા વિમુક્તાઽશેષબન્ધનાઃ

કૃષ્ણદર્શનસંજાતપરમાનન્દસંપ્લુતાઃ ॥
ઊચુશ્ચ વચનં ગોપ્યો મધુરં માધવં પ્રતિ

॥ ગોપ્ય ઊચુઃ ॥ ॥
ધન્યઃ સ દૈત્યપ્રવરો મયો યેન કૃતં સરઃ ॥
યસ્મિંસ્ત્વં દેવતૈઃ સાર્દ્ધં સમેષ્યસિ જગત્પતે

યદિ તુષ્ટોઽસિ ભગવન્નનુગ્રાહ્યા વયં યદિ ॥
અસ્માકમપિ વાર્ષ્ણેય કારયસ્વ સરોત્તમમ્

કીર્ત્તનાન્મૃત્યુલોકેઽસ્મિંસ્તવ સંદર્શનેન હિ ॥
અહર્નિશં તવ ધ્યાનાદ્યાસ્યામઃ પરમાં ગતિમ્

॥ શ્રીકૃષ્ણ ઉવાચ ॥ ॥
કરિષ્યે વઃ પ્રિયં સાધ્વ્યો યૂયં મમ પરિગ્રહાઃ ॥
અનુગ્રાહ્યા મયા નિત્યં ભક્તિગ્રાહ્યોઽસ્મિ સર્વદા

॥ પ્રહ્લાદ ઉવાચ ॥ ॥
ઇત્યુક્ત્વા ભગવાન્કૃષ્ણો ગોપીનાં હિતકામ્યયા ॥
સરસઃ સન્નિધૌ તસ્ય સરસ્ત્વન્યચ્ચકાર હ

તદગાધં સ્વચ્છજલં નલિનીદલશોભિતમ્ ॥
હંસસારસયુગ્મૈશ્ચ ચક્રવાકૈશ્ચ શોભિતમ્

કુમુદોત્પલકહ્લારપદ્મિનીખણ્ડમણ્ડિતમ્ ॥
સેવિતં દ્વિજમુખ્યૈશ્ચ સિદ્ધવિદ્યાધરૈસ્તથા

સેવિતં યદુનારીભિસ્તથા યદુકુમારકૈઃ ॥
દિવારાત્રૌ સુસંપૂર્ણં સર્વૈર્જાનપદૈર્જનૈઃ

તં દૃષ્ટ્વા જલકલ્લોલૈઃ સુસંપૂર્ણં જલાશયમ્ ॥
હર્ષાદ્ગોપીજનં કૃષ્ણઃ પ્રોવાચ વચનં તદા

પશ્યધ્વં ગોપિકાઃ શુભ્રં સરઃ સરં સમીપતઃ ॥
સ્વચ્છમિષ્ટજલાપૂર્ણં સજ્જનાનાં યથા મનઃ

કારણાદ્ભવતીનાં ચ યસ્માત્કૃતમિદં સરઃ ॥
ભવતીનાં તથા નામ્ના ખ્યાતમેતદ્ભવિષ્યતિ

ગોર્વાચાવાચકઃ શબ્દો ભવતીભિર્મયા સહ ॥
ગોપ્રચારેતિ વૈ નામ્નાં ખ્યાતિં લોકે ગમિષ્યતિ

યુષ્માકં પ્રિયકામાર્થં યસ્માત્કૃતમિદં સરઃ ॥
તસ્માદ્ગોપીસર ઇતિ ખ્યાતિં લોકે ગમિષ્યતિ

॥ ગોપ્ય ઊચુઃ ॥ ॥
અનુગ્રાહ્યા યદિ વયમસ્મન્નામ્ના કૃતં સરઃ ॥
અન્યત્કિમપિ વાર્ષ્ણેય પ્રાર્થયામો વદસ્વ નઃ

॥ શ્રીકૃષ્ણ ઉવાચ ॥ ॥
પ્રાર્થ્યતાં યદભિપ્રેતં યદ્વો મનસિ વર્તતે ॥
ભક્ત્યા સમાગતા યૂયં નાસ્ત્યદેયં તતો મયા

॥ ગોપ્ય ઊચુઃ ॥ ॥
યદિ તુષ્ટોઽસિ ભગવન્યદિ દેયો વરો હિ નઃ ॥
તસ્માત્ત્વયા સદા કૃષ્ણ નરયાનેન માધવ

અત્રાગત્ય નભસ્યેઽસ્મિન્સ્નાતવ્યં નિયમેન હિ ॥
યત્ર ત્વં તત્ર દેવાશ્ચ યજ્ઞાસ્તીર્થાનિ કેશવ

યત્ર ત્વં તત્ર દાનાનિ વ્રતાનિ નિયમાશ્ચ યે ॥
ઓંકારશ્ચ વષટ્કારઃ સ્વાહાકારઃ સ્વધા તથા

ભૂર્ભુવઃસ્વર્મહર્લ્લોકો જનઃ સત્યં તપસ્તથા ॥
ત્વન્મયં હિ જગત્સર્વં સદેવાસુરમાનુષમ્

તસ્માત્ત્વયિ જગન્નાથે હ્યત્ર સ્નાતે જનાર્દને ॥
સ્નાતમત્ર ત્રિભુવનં ભવિષ્યતિ ન સંશયઃ

ત્રૈલોક્યપાવની ગંગા તવ પાદજલં હિ તત્ ॥
લક્ષ્મીર્વક્ષઃસ્થલસ્થાને મુખે દેવી સરસ્વતી

સર્વભૂતમયશ્ચાત્ર તતસ્ત્વં જગદીશ્વર ॥
યદ્દદાસિ મનુષ્યાણાં ભવિષ્યાણાં કલૌ યુગે ॥
તદ્વદસ્વ મહાબાહો કૃપાં કૃત્વા જગત્પતે

યાત્રાયામાગતાનાં ચ અથ ષણ્માસવાસિનામ્ ॥
સદૈવાત્ર સ્થિતાનાં ચ યત્ફલં તદ્વદસ્વ નઃ

॥ શ્રીકૃષ્ણ ઉવાચ ॥ ॥
યત્ફલં હિ મનુષ્યાણાં સ્નાતાનાં ગોપિકાસરે ॥
તચ્છૃણુધ્વમસંદિગ્ધં પ્રસન્ને મયિ ગોપિકાઃ

સોપસ્કરાં સવત્સાં ચ વસ્ત્રાલંકારભૂષિતામ્ ॥
યથોક્તદક્ષિણોપેતાં બ્રાહ્મણાય કુટુંબિને

સદાચારાય શુદ્ધાય દરિદ્રાયાનુકારિણે ॥
ગાં દત્ત્વા ફલમાપ્નોતિ સ્નાનમાત્રેણ તત્ફલમ્

યાવત્પદાનિ મનુજઃ કૃષ્ણેન સહ ગચ્છતિ ॥
કુલાનિ દેવ્યસ્તાવંતિ વસંતિ હરિમન્દિરે

કૃષ્ણેન સહ ગચ્છન્તિ ગીતવાદિત્રનિસ્વનૈઃ ॥
સ્તુવન્તો વિવિધૈઃ સ્તોત્રૈર્ગોવિંદં ગોપિકાસરે

ન માતુર્જઠરે તેષાં યાતના જાયતે નૃણામ્ ॥
સર્વાન્કામાનવાપ્યાંતે વૈષ્ણવં લોકમાપ્નુયુઃ

અર્ઘ્યં દત્ત્વા વિધાનેન સ્નાનં કુર્યાદ્વિચક્ષણઃ ॥
મંત્રેણાનેન વૈ સાધ્વ્યઃ શ્રદ્ધયા પરયા યુતઃ

નમસ્તે ગોપરૂપાય વિષ્ણવે પરમાત્મને ॥
ગોપ્રચારે જગન્નાથ ગૃહાણાર્ઘ્યં નમોઽસ્તુ તે

અર્ઘ્યં દત્ત્વા વિધાનેન મૃદમાલિપ્ય પાણિના ॥
સ્નાયાચ્છ્રદ્ધાસમાયુક્તસ્તર્પયેત્પિતૃદેવતાઃ

શ્રાદ્ધં કુર્ય્યાત્તતો ભક્ત્યા એકચિત્તઃ સમાહિતઃ ॥
યથોક્તદક્ષિણા દદ્યાદ્રજતં રુક્મમેવ ચ

વિશેષતઃ પ્રદાતવ્યં તાંબૂલં કજ્જલં તથા ॥
દુકૂલાનિ ચ દેયાનિ તથા કૌસુંભકાનિ ચ

દંપત્યોર્વાસસી ચૈવ ભૂષણાનિ સ્વશક્તિતઃ ॥
ગાવો દેયા દ્વિજાતિભ્યો વૃષભાશ્ચ ધુરંધરાઃ ॥
દીનાંધકૃપણાનાં ચ દાનં દેયં સ્વશક્તિતઃ

એવં કૃત્વા નરઃ સમ્યગુત્તમાં ગતિમાપ્નુયાત્ ॥
પ્રયાંતિ પરમં લોકં પિતરસ્ત્રિકુલોદ્ભવાઃ

લભતે પુત્રકામસ્તુ પુત્રાનિષ્ટાન્મનોરમાન્

યં યં કામયતે કામં સ્વર્ગમોક્ષાદિકં નરઃ ॥
તત્સર્વં સમવાપ્નોતિ યઃ સ્નાતિ ગોપિકાસરે

યાવલ્લોકા ભવિષ્યંતિ તાવત્સ્થાસ્યતિ વૈ સરઃ ॥
યાવત્સરો યશસ્તાવદ્ભવતીનાં ભવિષ્યતિ

યાવત્કીર્તિર્મનુષ્યેષુ તાવત્સ્વર્ગે મહીયતે ॥
વિમુક્તાઃ સકલાત્પાપાદ્યાસ્યંતિ પરમાં ગતિમ્

તત્પુણ્યં ગોપીસર ઇદં જલૈઃ પૂર્ણં સદૈવ હિ ॥
અવગાહ્યં મયા ગોપ્યો નભસ્યે નિયમેન હિ

ભવત્યઃ પતિભાવેન બ્રહ્મભાવેન વા પુનઃ ॥
ચિંતયંત્યઃ પરં માં હિ પરાગતિમવાપ્સ્યથ

॥ પ્રહ્લાદ ઉવાચ ॥ ॥
અનુજ્ઞાતા ભગવતા તતસ્તા ગોપકન્યકાઃ ॥
નમસ્કૃત્ય ચ ગોવિંદં યયુઃ સર્વા યથાગતા

ભગવાનપિ ગોવિંદ ઉદ્ધવેન સમન્વિતઃ ॥
વિસૃજ્ય ગોપિકાઃ કૃષ્ણઃ સ્વકં મંદિરમાવિશત્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે ચતુર્થે દ્વારકામાહાત્મ્યે ગોપીસરસ્તીર્થમાહાત્મ્યવર્ણનંનામ ત્રયોદશોઽધ્યાયઃ