સ્કંદ પુરાણ · અધ્યાય 7.128

॥ ઈશ્વર ઉવાચ ॥
તતો ગચ્છેન્મહાદેવિ સાગરાદિત્યમુત્તમમ્ ॥
ભૈરવેશાત્પશ્ચિમતો રુદ્રાન્મૃત્યુઞ્જયાત્તથા

કામેશાદ્દક્ષિણાગ્નેયે નાતિદૂરે વ્યવસ્થિતમ્ ॥
સર્વ રોગપ્રશમનં દારિદ્ર્યૌઘવિઘાતકમ્ ॥
પ્રતિષ્ઠિતં મહાદેવિ સગરેણ મહાત્મના

ષષ્ટિપુત્રસહસ્રાણિ યઃ પ્રાપારાતિસૂદનઃ ॥
સૂર્યં તત્ર સમારાધ્ય સગરઃ પૃથિવીપતિઃ

ય એષ સાગરો દેવિ યોજનાયતવિસ્તરઃ ॥
આયતોઽશીતિસાહસ્રં યોજનાનાં પ્રકીર્તિતઃ

અસ્મિન્મન્વન્તરે ક્ષિપ્તઃ સાગરૈશ્ચ ચતુર્દિશમ્ ॥
તસ્યેદં કીર્તિતં દેવિ નામ સાગરસંજ્ઞિતમ્

યસ્યાદ્યાપીહ ગાયન્તિ પુરાણે પ્રથિતં યશઃ ॥
તેનાયં સ્થાપિતો દેવો ભાસ્કરો વારિતસ્કરઃ

તં દૃષ્ટ્વા ન જડો નાન્ધો ન દરિદ્રો ન દુઃખિતઃ ॥
ન ચૈવેષ્ટવિયોગી સ્યાન્ન રોગી નૈવ પાપકૃત્

માઘે માસિ મહાદેવિ સિતે પક્ષે જિતેન્દ્રિયઃ ॥
ષષ્ઠ્યામુપોષિતો ભૂત્વા રાત્રૌ તસ્યાગ્રતઃ સ્વપેત્

વિબુદ્ધસ્ત્વથ સપ્તમ્યાં ભક્ત્યા ભાનું સમર્ચયેત્ ॥
બ્રાહ્મણાન્ભોજયેદ્ભક્ત્યા વિત્તશાઠ્યં વિવર્જયેત્

સુતપ્તેનેહ તપસા યજ્ઞૈર્વા બહુદક્ષિણૈઃ ॥
તાં ગતિં ન નરા યાન્તિ યાં ગતાઃ સૂર્યમાશ્રિતાઃ

ભક્ત્યા તુ પુરુષૈઃ પૂજા કૃતા દૂર્વાંકુરૈરપિ ॥
ભાનુર્દદાતિ હિ ફલં સર્વયજ્ઞૈઃ સુદુર્લભમ્

તસ્માત્સર્વપ્રયત્નેન સૂર્યમેવાભિપૂજયેત્ ॥
જનકાદયો યથા સિદ્ધિં ગતા ભાનું પ્રપૂજ્ય ચ

સર્વાત્મા સર્વલોકેશો દેવદેવઃ પ્રજાપતિઃ ॥
સૂર્ય એવ ત્રિલોકસ્ય મૂલં પરમદૈવતમ્

વસન્તે કપિલઃ સૂર્યો ગ્રીષ્મે કાઞ્ચનસપ્રભઃ ॥
શ્વેતવર્ણશ્ચ વર્ષાસુ પાંડુઃ શરદિ ભાસ્કરઃ

હેમન્તે તામ્રવર્ણસ્તુ શિશિરે લોહિતો રવિઃ ॥
એવં વર્ણવિશેષેણ ધ્યાયેત્સૂર્યં યથાક્રમમ્

પૂજયિત્વા વિધાનેન યતાત્મા સંયતેન્દ્રિયઃ ॥
પઠેન્નામસહસ્રં તુ સર્વપાતકનાશનમ્ ॥

॥ દેવ્યુવાચ ॥ ॥
નામ્નાં સહસ્રં મે બ્રૂહિ પ્રસાદાઞ્છંકર પ્રભો ॥
તુલ્યં નામસહસ્રસ્ય કિમપ્યન્યત્પ્રકીર્તય

॥ ॥ ઈશ્વર ઉવાચ ॥ ॥
અલં નામસહસ્રેણ પઠસ્વૈવં શુભં સ્તવમ્ ॥
યાનિ ગુહ્યાનિ નામાનિ પવિત્રાણિ શુભાનિ ચ ॥
તાનિ તે કીર્તયિષ્યામિ પ્રયત્નાદવધારય

વિકર્તનો વિવસ્વાંશ્ચ માર્તણ્ડો ભાસ્કરો રવિઃ ॥
લોકપ્રકાશકઃ શ્રીમાઁલ્લોકચક્ષુર્ગ્રહેશ્વરઃ

લોકસાક્ષી ત્રિલોકેશઃ કર્ત્તા હર્ત્તા તમિસ્રહા ॥
તપનસ્તાપનશ્ચૈવ શુચિઃ સપ્તાશ્વવાહનઃ

ગભસ્તિહસ્તો બ્રહ્મા ચ સર્વદેવનમસ્કૃતઃ ॥
એકવિંશતિરિત્યેષ સ્તવ ઇષ્ટો મહાત્મનઃ

શરીરારોગ્યદશ્ચૈવ ધનવૃદ્ધિયશસ્કરઃ ॥
સ્તવરાજ ઇતિ ખ્યાતસ્ત્રિષુ લોકેષુ વિશ્રુતઃ ॥

યશ્ચાનેન મહાદેવિ દ્વે સંધ્યેઽસ્તમનોદયે ॥
સ્તૌત્યર્કં પ્રયતો ભૂત્વા સર્વપાપૈઃ પ્રમુચ્યતે ॥
સર્વકામસમૃદ્ધાત્મા સૂર્યલોકં સ ગચ્છતિ

ઇત્યેવં કથિતં દેવિ માહાત્મ્યં સાગરાર્કજમ્ ॥
શ્રુતં દુઃખૌઘશમનં મહાપાતકનાશનમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે સાગરાદિત્યમાહાત્મ્યવર્ણનંનામાષ્ટાવિંશત્યુત્તરશતતમોઽધ્યાયઃ ॥