Skanda Purana · Chapter 7.125

// īśvara uvāca // //
tato gacchenmahāliṃgaṃ mahādevi surapriyam //
rāvaṇeśvaravāyavye dhanuṣāṃ triṃśake'ntare

sthitaṃ kāmapradaṃ liṃgaṃ sarvapātakanāśanam //
paulomīśvaranāmāḍhacaṃ paulomyā saṃpratiṣṭhitam

tārakeṇa yadā dhvastāstridaśāḥ saṃgare sthitāḥ //
trailokyaṃ vihṛtaṃ sarvaṃ svayamindratvamāgataḥ

tadā śakraḥ suduḥkhārto bhayodvigno nanāśa vai //
tadā tadbhāryayā devi indrāṇyā śokakarṣayā

indrasya jayamicchantyā śaṃbhurārādhitastayā //
tatastuṣṭo mahādevastāmuvāca śubhekṣaṇām

// bhagavānuvāca // //
utpatsyati suto'smākaṃ ṣaṇmukhastu mahābalaḥ //
tārakaṃ daityarājānaṃ sa cainaṃ ghātayiṣyati

gaccha tvaṃ vijvarā bhūtvā śṛṇu bhūyo vacaśca me

atra sthitamidaṃ liṃgaṃ yo'smākaṃ pūjayiṣyati //
sa nūnaṃ me gaṇo bhūtvā matsakāśamupeṣyati

evamuktā gatā sādhvī devarāḍyatra saṃsthitaḥ //
sarvadduḥkhavinirmuktā sarvadaityabhayojjhitā

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye paulomośvaramāhātmyavarṇanaṃnāma pañcaviṃśatyuttaraśatatamo'dhyāyaḥ