Skanda Purana · Chapter 7.121

// īśvara uvāca // //
tato gacchenmahādevi rāmeśvaramanuttamam //
jāmadagnyena rāmeṇa svayaṃ tatra pratiṣṭhitam

gopīśvarācca vāyavye dhanuṣāṃ triṃśake'ntare //
sthitaṃ mahāprabhāvaṃ hi liṃgaṃ pātakanāśanam

yadā rāmeṇa deveśi jamadagnisutena vai //
kṛto mātṛvadho ghoraḥ piturājñānuvartinā

tadā manasi saṃtāpaṃ kṛtvā nirvedamāgataḥ //
tataḥ prasannatāṃ yāto jamadagnirmahātapāḥ

dadau varaṃ tatastuṣṭo reṇukāyāśca jīvitam //
evaṃ yadyapi sā tatra jīvitā varavarṇinī

tathāpi saghṛṇo devi jāmadagnyo mahāprabhaḥ //
prabhāsaṃ kṣetramāsādya tapaścakre tato'dbhutam

pratiṣṭhāpya mahādevaṃ śaṃkaraṃ lokaśaṃkaram //
divyaṃ varṣaśataṃ sāgraṃ tatastuṣṭo maheśvaraḥ

dadau tasyepsitaṃ sarvaṃ svayaṃ tatraiva saṃsthitaḥ //
tataḥ kṛtārthatāṃ prāpto jāmadagnyo mahāṛṣiḥ

triḥsaptakṛtvaḥ pṛthivīṃ jitvā hatvā ca kṣatriyān //
kṛtvā paṃcanadaṃ tatra kurukṣetre mahāmanāḥ

raktaiḥ saṃpūrṇatāṃ nītvā kṣatriyāṇāṃ varānane //
ānṛṇyaṃ samanu prāptaḥ pitṝṇāṃ yo mahābalaḥ

evaṃ kṣattrāntakaṃ kṛtvā dattvā vipreṣu medinīm //
kṛtārthatāmanuprāptastrailokye khyātapauruṣaḥ

tena tatsthāpitaṃ liṃgaṃ kṣetre prābhāsike śubhe //
yastaṃ pūjayate bhaktyā pāpayukto'pi mānavaḥ //
sa muktaḥ pātakaiḥ sarvairyāti lokamumāpateḥ

jyeṣṭhakṛṣṇacaturdaśyāṃ jāgṛyāttatra yo naraḥ //
so'śvamedhaphalaṃ prāpya modate divi devavat

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye jāmadagnyeśvaramāhātmyavarṇanaṃ- nāmaikaviṃśatyuttaraśatatamo'dhyāyaḥ