સ્કંદ પુરાણ · અધ્યાય 7.121

॥ ઈશ્વર ઉવાચ ॥ ॥
તતો ગચ્છેન્મહાદેવિ રામેશ્વરમનુત્તમમ્ ॥
જામદગ્ન્યેન રામેણ સ્વયં તત્ર પ્રતિષ્ઠિતમ્

ગોપીશ્વરાચ્ચ વાયવ્યે ધનુષાં ત્રિંશકેઽન્તરે ॥
સ્થિતં મહાપ્રભાવં હિ લિંગં પાતકનાશનમ્

યદા રામેણ દેવેશિ જમદગ્નિસુતેન વૈ ॥
કૃતો માતૃવધો ઘોરઃ પિતુરાજ્ઞાનુવર્તિના

તદા મનસિ સંતાપં કૃત્વા નિર્વેદમાગતઃ ॥
તતઃ પ્રસન્નતાં યાતો જમદગ્નિર્મહાતપાઃ

દદૌ વરં તતસ્તુષ્ટો રેણુકાયાશ્ચ જીવિતમ્ ॥
એવં યદ્યપિ સા તત્ર જીવિતા વરવર્ણિની

તથાપિ સઘૃણો દેવિ જામદગ્ન્યો મહાપ્રભઃ ॥
પ્રભાસં ક્ષેત્રમાસાદ્ય તપશ્ચક્રે તતોઽદ્ભુતમ્

પ્રતિષ્ઠાપ્ય મહાદેવં શંકરં લોકશંકરમ્ ॥
દિવ્યં વર્ષશતં સાગ્રં તતસ્તુષ્ટો મહેશ્વરઃ

દદૌ તસ્યેપ્સિતં સર્વં સ્વયં તત્રૈવ સંસ્થિતઃ ॥
તતઃ કૃતાર્થતાં પ્રાપ્તો જામદગ્ન્યો મહાઋષિઃ

ત્રિઃસપ્તકૃત્વઃ પૃથિવીં જિત્વા હત્વા ચ ક્ષત્રિયાન્ ॥
કૃત્વા પંચનદં તત્ર કુરુક્ષેત્રે મહામનાઃ

રક્તૈઃ સંપૂર્ણતાં નીત્વા ક્ષત્રિયાણાં વરાનને ॥
આનૃણ્યં સમનુ પ્રાપ્તઃ પિતૄણાં યો મહાબલઃ

એવં ક્ષત્ત્રાન્તકં કૃત્વા દત્ત્વા વિપ્રેષુ મેદિનીમ્ ॥
કૃતાર્થતામનુપ્રાપ્તસ્ત્રૈલોક્યે ખ્યાતપૌરુષઃ

તેન તત્સ્થાપિતં લિંગં ક્ષેત્રે પ્રાભાસિકે શુભે ॥
યસ્તં પૂજયતે ભક્ત્યા પાપયુક્તોઽપિ માનવઃ ॥
સ મુક્તઃ પાતકૈઃ સર્વૈર્યાતિ લોકમુમાપતેઃ

જ્યેષ્ઠકૃષ્ણચતુર્દશ્યાં જાગૃયાત્તત્ર યો નરઃ ॥
સોઽશ્વમેધફલં પ્રાપ્ય મોદતે દિવિ દેવવત્

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે જામદગ્ન્યેશ્વરમાહાત્મ્યવર્ણનં- નામૈકવિંશત્યુત્તરશતતમોઽધ્યાયઃ